ऋग्वेद · अध्याय 8.073
उद् ईराथाम् ऋतायते युञ्जाथाम् अश्विना रथम् ।
अन्ति षद् भूतु वाम् अवः ॥
निमिषश् चिज् जवीयसा रथेना यातम् अश्विना ।
अन्ति षद् भूतु वाम् अवः ॥
उप स्तृणीतम् अत्रये हिमेन घर्मम् अश्विना ।
अन्ति षद् भूतु वाम् अवः ॥
कुह स्थः कुह जग्मथुः कुह श्येनेव पेतथुः ।
अन्ति षद् भूतु वाम् अवः ॥
यद् अद्य कर्हि कर्हि चिच् छुश्रूयातम् इमं हवम् ।
अन्ति षद् भूतु वाम् अवः ॥
अश्विना यामहूतमा नेदिष्ठं याम्य् आप्यम् ।
अन्ति षद् भूतु वाम् अवः ॥
अवन्तम् अत्रये गृहं कृणुतं युवम् अश्विना ।
अन्ति षद् भूतु वाम् अवः ॥
वरेथे अग्निम् आतपो वदते वल्ग्व् अत्रये ।
अन्ति षद् भूतु वाम् अवः ॥
प्र सप्तवध्रिर् आशसा धाराम् अग्नेर् अशायत ।
अन्ति षद् भूतु वाम् अवः ॥
इहा गतं वृषण्वसू शृणुतम् म इमं हवम् ।
अन्ति षद् भूतु वाम् अवः ॥
किम् इदं वाम् पुराणवज् जरतोर् इव शस्यते ।
अन्ति षद् भूतु वाम् अवः ॥
समानं वां सजात्यं समानो बन्धुर् अश्विना ।
अन्ति षद् भूतु वाम् अवः ॥
यो वां रजांस्य् अश्विना रथो वियाति रोदसी ।
अन्ति षद् भूतु वाम् अवः ॥
आ नो गव्येभिर् अश्व्यैः सहस्रैर् उप गच्छतम् ।
अन्ति षद् भूतु वाम् अवः ॥
मा नो गव्येभिर् अश्व्यैः सहस्रेभिर् अति ख्यतम् ।
अन्ति षद् भूतु वाम् अवः ॥
अरुणप्सुर् उषा अभूद् अकर् ज्योतिर् ऋतावरी ।
अन्ति षद् भूतु वाम् अवः ॥
अश्विना सु विचाकशद् वृक्षम् परशुमाँ इव ।
अन्ति षद् भूतु वाम् अवः ॥
पुरं न धृष्णव् आ रुज कृष्णया बाधितो विशा ।
अन्ति षद् भूतु वाम् अवः ॥
मूल पाठ: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0