Rig Veda · Chapter 8.073

ud īrāthām ṛtāyate yuñjāthām aśvinā ratham |
anti ṣad bhūtu vām avaḥ ||

nimiṣaś cij javīyasā rathenā yātam aśvinā |
anti ṣad bhūtu vām avaḥ ||

upa stṛṇītam atraye himena gharmam aśvinā |
anti ṣad bhūtu vām avaḥ ||

kuha sthaḥ kuha jagmathuḥ kuha śyeneva petathuḥ |
anti ṣad bhūtu vām avaḥ ||

yad adya karhi karhi cic chuśrūyātam imaṁ havam |
anti ṣad bhūtu vām avaḥ ||

aśvinā yāmahūtamā nediṣṭhaṁ yāmy āpyam |
anti ṣad bhūtu vām avaḥ ||

avantam atraye gṛhaṁ kṛṇutaṁ yuvam aśvinā |
anti ṣad bhūtu vām avaḥ ||

varethe agnim ātapo vadate valgv atraye |
anti ṣad bhūtu vām avaḥ ||

pra saptavadhrir āśasā dhārām agner aśāyata |
anti ṣad bhūtu vām avaḥ ||

ihā gataṁ vṛṣaṇvasū śṛṇutam ma imaṁ havam |
anti ṣad bhūtu vām avaḥ ||

kim idaṁ vām purāṇavaj jarator iva śasyate |
anti ṣad bhūtu vām avaḥ ||

samānaṁ vāṁ sajātyaṁ samāno bandhur aśvinā |
anti ṣad bhūtu vām avaḥ ||

yo vāṁ rajāṁsy aśvinā ratho viyāti rodasī |
anti ṣad bhūtu vām avaḥ ||

ā no gavyebhir aśvyaiḥ sahasrair upa gacchatam |
anti ṣad bhūtu vām avaḥ ||

mā no gavyebhir aśvyaiḥ sahasrebhir ati khyatam |
anti ṣad bhūtu vām avaḥ ||

aruṇapsur uṣā abhūd akar jyotir ṛtāvarī |
anti ṣad bhūtu vām avaḥ ||

aśvinā su vicākaśad vṛkṣam paraśumām̐ iva |
anti ṣad bhūtu vām avaḥ ||

puraṁ na dhṛṣṇav ā ruja kṛṣṇayā bādhito viśā |
anti ṣad bhūtu vām avaḥ ||