ऋग्वेद · अध्याय 10.144

अयं हि ते अमर्त्य इन्दुर् अत्यो न पत्यते ।
दक्षो विश्वायुर् वेधसे ॥

अयम् अस्मासु काव्य ऋभुर् वज्रो दास्वते ।
अयम् बिभर्त्य् ऊर्ध्वकृशनम् मदम् ऋभुर् न कृत्व्यम् मदम् ॥

घृषुः श्येनाय कृत्वन आसु स्वासु वंसगः ।
अव दीधेद् अहीशुवः ॥

यं सुपर्णः परावतः श्येनस्य पुत्र आभरत् ।
शतचक्रं यो3 ऽह्यो वर्तनिः ॥

यं ते श्येनश् चारुम् अवृकम् पदाभरद् अरुणम् मानम् अन्धसः ।
एना वयो वि तार्य् आयुर् जीवस एना जागार बन्धुता ॥

एवा तद् इन्द्र इन्दुना देवेषु चिद् धारयाते महि त्यजः ।
क्रत्वा वयो वि तार्य् आयुः सुक्रतो क्रत्वायम् अस्मद् आ सुतः ॥