ऋग्वेद · अध्याय 1.097
अप नः शोशुचद् अघम् अग्ने शुशुग्ध्य् आ रयिम् ।
अप नः शोशुचद् अघम् ॥
सुक्षेत्रिया सुगातुया वसूया च यजामहे ।
अप नः शोशुचद् अघम् ॥
प्र यद् भन्दिष्ठ एषाम् प्रास्माकासश् च सूरयः ।
अप नः शोशुचद् अघम् ॥
प्र यत् ते अग्ने सूरयो जायेमहि प्र ते वयम् ।
अप नः शोशुचद् अघम् ॥
प्र यद् अग्नेः सहस्वतो विश्वतो यन्ति भानवः ।
अप नः शोशुचद् अघम् ॥
त्वं हि विश्वतोमुख विश्वतः परिभूर् असि ।
अप नः शोशुचद् अघम् ॥
द्विषो नो विश्वतोमुखाति नावेव पारय ।
अप नः शोशुचद् अघम् ॥
स नः सिन्धुम् इव नावयाति पर्षा स्वस्तये ।
अप नः शोशुचद् अघम् ॥
मूल पाठ: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0