पैप्पलाद-संहिता · अध्याय 20.50

अभि त्वा पञ्चशाखेन
हस्तेनाधां सहीयसा ।
यथा न विद्विषावहै
न विभवाव कदा चन ॥

चाक्रवाकं संवननम्
अस्यस्य स्वंकरम् ।
अमुं स्वं कृणोतु मे
यम् अहं कामये प्रियम् ॥

यत् कक्षीवां संवननं
च्यवनश् चक्र आसुरः ।
तद् वां कृणोमि दम्पती
सं प्रियौ भवतं युवम् ॥

यथा संयुक्तौ पक्षिणौ
संप्रियौ चरतो मृगौ ।
एवा संयुक्तौ ब्रह्मणा
संप्रियौ भवतं युवम् ॥

प्रेहि प्र हर पादाव्
आ गृहेभ्यः स्वस्तये ।
कपिञ्जल प्रदक्षिणं
शतपत्राभि नो वद ॥

भद्रं वद दक्षिणतो
भद्रम् उत्तरतो वद ।
भद्रं पुरस्तान् नो वद
भद्रं पश्चात् कपिञ्जल ॥

शुनं वद दक्षिणतः
शुनम् उत्तरतो वद ।
शुनं पुरस्तान् नो वद
शुनं पश्चात् कपिञ्जल ॥

यौवनानि महयसि
जिग्युषाम् इव दुन्दुभिः ।
कपिञ्जल प्रदक्षिणं
शतपत्राभि नो वद ॥