પૈપ્પલાદ-સંહિતા · અધ્યાય 20.50

અભિ ત્વા પઞ્ચશાખેન
હસ્તેનાધાં સહીયસા ।
યથા ન વિદ્વિષાવહૈ
ન વિભવાવ કદા ચન ॥

ચાક્રવાકં સંવનનમ્
અસ્યસ્ય સ્વંકરમ્ ।
અમું સ્વં કૃણોતુ મે
યમ્ અહં કામયે પ્રિયમ્ ॥

યત્ કક્ષીવાં સંવનનં
ચ્યવનશ્ ચક્ર આસુરઃ ।
તદ્ વાં કૃણોમિ દમ્પતી
સં પ્રિયૌ ભવતં યુવમ્ ॥

યથા સંયુક્તૌ પક્ષિણૌ
સંપ્રિયૌ ચરતો મૃગૌ ।
એવા સંયુક્તૌ બ્રહ્મણા
સંપ્રિયૌ ભવતં યુવમ્ ॥

પ્રેહિ પ્ર હર પાદાવ્
આ ગૃહેભ્યઃ સ્વસ્તયે ।
કપિઞ્જલ પ્રદક્ષિણં
શતપત્રાભિ નો વદ ॥

ભદ્રં વદ દક્ષિણતો
ભદ્રમ્ ઉત્તરતો વદ ।
ભદ્રં પુરસ્તાન્ નો વદ
ભદ્રં પશ્ચાત્ કપિઞ્જલ ॥

શુનં વદ દક્ષિણતઃ
શુનમ્ ઉત્તરતો વદ ।
શુનં પુરસ્તાન્ નો વદ
શુનં પશ્ચાત્ કપિઞ્જલ ॥

યૌવનાનિ મહયસિ
જિગ્યુષામ્ ઇવ દુન્દુભિઃ ।
કપિઞ્જલ પ્રદક્ષિણં
શતપત્રાભિ નો વદ ॥