વિષ્ણુપુરાણ (સમીક્ષિત આવૃત્તિ) · અધ્યાય 5.38

અર્જુનો ઽપિ તદાન્વિષ્ય કૃષ્ણરામકલેવરે
સંસ્કારં લમ્ભયામ્ આસ તથાન્યેષામ્ અનુક્રમાત્ ॥

અષ્ટૌ મહિષ્યઃ કથિતા રુક્મિણીપ્રમુખાસ્ તુ યાઃ
ઉપગુહ્ય હરેર્ દેહં વિવિશુસ્ તા હુતાશનમ્ ॥

રેવતી ચૈવ રામસ્ય દેહમ્ આશ્લિષ્ય સત્તમ
વિવેશ જ્વલિતં વહ્નિં તત્સઙ્ગાહ્લાદશીતલમ્ ॥

ઉગ્રસેનસ્ તુ તચ્ છ્રુત્વા તથૈવાનકદુન્દુભિઃ
દેવકી રોહિણી ચૈવ વિવિશુર્ જાતવેદસમ્ ॥

તતો ઽર્જુનઃ પ્રેતકાર્યં કૃત્વા તેષાં યથાવિધિ
નિશ્ચક્રામ જનં સર્વં ગૃહીત્વા વજ્રમ્ એવ ચ ॥

દ્વારવત્યા વિનિષ્ક્રાન્તાઃ કૃષ્ણપત્ન્યઃ સહસ્રશઃ
વજ્રં જનં ચ કૌન્તેયઃ પાલયઞ્ છનકૈર્ યયૌ ॥

સભા સુધર્મા કૃષ્ણેન મર્ત્યલોકે સમુજ્ઝિતે
સ્વર્ગં જગામ મૈત્રેય પારિજાતશ્ ચ પાદપઃ ॥

યસ્મિન્ દિને હરિર્ યાતો દિવં સંત્યજ્ય મેદિનીમ્
તસ્મિન્ન્ એવાવતીર્ણો ઽયં કાલકાયો બલી કલિઃ ॥

પ્લાવયામ્ આસ તાં શૂન્યાં દ્વારકાં ચ મહોદધિઃ
યદુદેવગૃહં ત્વ્ એકં નાપ્લાવયત સાગરઃ ॥

નાતિક્રાન્તુમ્ અલં બ્રહ્મંસ્ તદ્ અદ્યાપિ મહોદધિઃ
નિત્યં સંનિહિતસ્ તત્ર ભગવાન્ કેશવો યતઃ ॥

તદ્ અતીવ મહાપુણ્યં સર્વપાતકનાશનમ્
વિષ્ણુક્રીડાન્વિતં સ્થાનં દૃષ્ટ્વા પાપાત્ પ્રમુચ્યતે ॥

પાર્થઃ પઞ્ચનદે દેશે બહુધાન્યસમન્વિતે
ચકાર વાસં સર્વસ્ય જનસ્ય મુનિસત્તમ ॥

તતો લોભઃ સમભવત્ પાર્થેનૈકેન ધન્વિના
દૃષ્ટ્વા સ્ત્રિયો નીયમાના દસ્યૂનાં નિહતેશ્વરાઃ ॥

તતસ્ તે પાપકર્માણો લોભોપહતચેતસઃ
આભીરા મન્ત્રયામ્ આસુઃ સમેત્યાત્યન્તદુર્મદાઃ ॥

અયમ્ એકો ઽર્જુનો ધન્વી સ્ત્રીજનં નિહતેશ્વરમ્
નયત્ય્ અસ્માન્ અતિક્રમ્ય ધિગ્ એતદ્ ભવતાં બલમ્ ॥

હત્વા ગર્વં સમારૂઢો ભીષ્મદ્રોણજયદ્રથાન્
કર્ણાદીંશ્ ચ ન જાનાતિ બલં ગ્રામનિવાસિનામ્ ॥

હે હે યષ્ટીર્ મહાયામા ગૃહ્ણીતાયં સુદુર્મતિઃ
સર્વાન્ એવાવજાનાતિ કિં વો બાહુભિર્ ઉન્નતૈઃ ॥

તતો યષ્ટિપ્રહરણા દસ્યવો લોપ્ત્રહારિણઃ
સહસ્રશો ઽભ્યધાવન્ત તં જનં નિહતેશ્વરમ્ ॥

તતો નિવૃત્ય કૌન્તેયઃ પ્રાહાભીરાન્ હસન્ન્ ઇવ
નિવર્તધ્વમ્ અધર્મજ્ઞા યદિ ન સ્થ મુમૂર્ષવઃ ॥

અવજ્ઞાય વચસ્ તસ્ય જગૃહુસ્ તે તદા ધનમ્
સ્ત્રીજનં ચૈવ મૈત્રેય વિષ્વક્સેનપરિગ્રહમ્ ॥

તતો ઽર્જુનો ધનુર્ દિવ્યં ગાણ્ડીવમ્ અજરં યુધિ
આરોપયિતુમ્ આરેભે ન શશાક ચ વીર્યવાન્ ॥

ચકાર સજ્જં કૃચ્છ્રાચ્ ચ તચ્ ચાભૂચ્ છિથિલં પુનઃ
ન સસ્માર તથાસ્ત્રાણિ ચિન્તયન્ન્ અપિ પાણ્ડવઃ ॥

શરાન્ મુમોચ ચૈતેષુ પાર્થો વૈરિષ્વ્ અમર્ષિતઃ
ત્વગ્ભેદં તે પરં ચક્રુર્ અસ્તા ગાણ્ડીવધન્વના ॥

વહ્નિના યે ઽક્ષયા દત્તાઃ શરાસ્ તે ઽપિ ક્ષયં યયુઃ
યુધ્યતઃ સહ ગોપાલૈર્ અર્જુનસ્ય ભવક્ષયે ॥

અચિન્તયચ્ ચ કૌન્તેયઃ કૃષ્ણસ્યૈવ હિ તદ્ બલમ્
યન્ મયા શરસંઘાતૈઃ સકલા ભૂભૃતો જિતાઃ ॥

મિષતઃ પાણ્ડુપુત્રસ્ય તતસ્ તાઃ પ્રમદોત્તમાઃ
આભીરૈર્ અપકૃષ્યન્ત કામાચ્ ચાન્યાઃ પ્રવવ્રજુઃ ॥

તતઃ શરેષુ ક્ષીણેષુ ધનુષ્કોટ્યા ધનંજયઃ
જઘાન દસ્યૂંસ્ તે ચાસ્ય પ્રહારાઞ્ જહસુર્ મુને ॥

પ્રેક્ષતશ્ ચૈવ પાર્થસ્ય વૃષ્ણ્યન્ધકવરસ્ત્રિયઃ
જગ્મુર્ આદાય તે મ્લેચ્છાઃ સમસ્તા મુનિસત્તમ ॥

તતઃ સુદુઃખિતો જિષ્ણુઃ કષ્ટં કષ્ટમ્ ઇતિ બ્રુવન્
અહો ભગવતા તેન મુક્તો ઽસ્મીતિ રુરોદ વૈ ॥

તદ્ ધનુસ્ તાનિ શસ્ત્રાણિ સ રથસ્ તે ચ વાજિનઃ
સર્વમ્ એકપદે નષ્ટં દાનમ્ અશ્રોત્રિયે યથા ॥

અહો ઽતિબલવદ્ દૈવં વિના તેન મહાત્મના
યદ્ અસામર્થ્યયુક્તે ઽપિ નીચવર્ગે જયપ્રદમ્ ॥

તૌ બાહૂ સ ચ મે મુષ્ટિઃ સ્થાનં તત્ સો ઽસ્મિ ચાર્જુનઃ
પુણ્યેનૈવ વિના તેન ગતં સર્વમ્ અસારતામ્ ॥

મમાર્જુનત્વં ભીમસ્ય ભીમત્વં તત્ કૃતં ધ્રુવમ્
વિના તેન યદ્ આભીરૈર્ જિતો ઽહં કથમ્ અન્યથા ॥

ઇત્થં વદન્ યયૌ જિષ્ણુર્ મથુરાખ્યં પુરોત્તમમ્
ચકાર તત્ર રાજાનં વજ્રં યાદવનન્દનમ્ ॥

સ દદર્શ તતો વ્યાસં ફાલ્ગુનઃ કાનનાશ્રયમ્
તમ્ ઉપેત્ય મહાભાગં વિનયેનાભ્યવાદયત્ ॥

તં વન્દમાનં ચરણાવ્ અવલોક્ય મુનિશ્ ચિરમ્
ઉવાચ પાર્થં વિચ્છાયઃ કથમ્ અત્યન્તમ્ ઈદૃશઃ ॥

અવીરજોઽનુગમનં બ્રહ્મહત્યાથવા કૃતા
દૃઢાશાભઙ્ગદુઃખીવ ભ્રષ્ટચ્છાયો ઽસિ સામ્પ્રતમ્ ॥

ઉર્જ્જે દત્તં નૈવ કૃષ્ણે ચ પક્ષે દુર્વર્ણં વા અન્નગોધૂમમિશ્રમ્
વિષ્ણું નત્વા સર્વકામપ્રદં ભો તેનેદં તે રૂપમ્ ઈદૃગ્ વિભાતિ ॥

સાન્તાનિકાદયો વા તે યાચમાના નિરાકૃતાઃ
અગમ્યસ્ત્રીરતિર્ વા ત્વં તેનાસિ વિગતપ્રભઃ ॥

ભુઙ્ક્તે ઽપ્રદાય વિપ્રેભ્યો એકો મિષ્ટમ્ અથો ભવાન્
કિં વા કૃપણવિત્તાનિ હૃતાનિ ભવતાર્જુન ॥

કચ્ચિત્ ત્વં શૂર્પવાતસ્ય ગોચરત્વં ગતો ઽર્જુન
દુષ્ટચક્ષુર્હતો વાપિ નિઃશ્રીકઃ કથમ્ અન્યથા ॥

સ્પૃષ્ટો નખામ્ભસા વાથ ઘટવાર્યુક્ષિતો ઽપિ વા
તેનાતીવાસિ વિચ્છાયો ન્યૂનૈર્ વા યુધિ નિર્જિતઃ ॥

તતઃ પાર્થો વિનિશ્વસ્ય શ્રૂયતાં ભગવન્ન્ ઇતિ
પ્રોક્તો યથાવદ્ આચષ્ટે વ્યાસાયાત્મપરાભવમ્ ॥

યદ્ બલં યચ્ ચ નસ્ તેજો યદ્ વીર્યં યઃ પરાક્રમઃ
યા શ્રીશ્ છાયા ચ નઃ સો ઽસ્માન્ પરિત્યજ્ય હરિર્ ગતઃ ॥

ઇતરેણેવ મહતા સ્મિતપૂર્વાભિભાષિણા
હીના વયં મુને તેન જાતાસ્ તૃણમયા ઇવ ॥

અસ્ત્રાણાં સાયકાનાં ચ ગાણ્ડીવસ્ય તથા મમ
સારતા યાભવન્ મૂર્તા સ ગતઃ પુરુષોત્તમઃ ॥

યસ્યાવલોકનાદ્ અસ્માઞ્ શ્રીર્ જયઃ સંપદ્ ઉન્નતિઃ
ન તત્યાજ સ ગોવિન્દસ્ ત્યક્ત્વાસ્માન્ ભગવાન્ ગતઃ ॥

ભીષ્મદ્રોણાઙ્ગરાજાદ્યાસ્ તથા દુર્યોધનાદયઃ
યત્પ્રભાવેન નિર્દગ્ધાઃ સ કૃષ્ણસ્ ત્યક્તવાન્ ભુવમ્ ॥

નિર્યૌવના હતશ્રીકા ભ્રષ્ટચ્છાયેવ મે મહી
વિભાતિ તાત નૈકો ઽહં વિરહે તસ્ય ચક્રિણઃ ॥

યસ્યાનુભાવાદ્ ભીષ્માદ્યૈર્ મય્ય્ અગ્નૌ શલભાયિતમ્
વિના તેનાદ્ય કૃષ્ણેન ગોપાલૈર્ અસ્મિ નિર્જિતઃ ॥

ગાણ્ડીવં ત્રિષુ લોકેષુ ખ્યાતિં યદનુભાવતઃ
ગતં તેન વિનાભીરૈર્ લગુડૈસ્ તન્નિરાકૃતમ્ ॥

સ્ત્રીસહસ્રાણ્ય્ અનેકાનિ મન્નાથાનિ મહામુને
યતતો મમ નીતાનિ દસ્યુભિર્ લગુડાયુધૈઃ ॥

આનીયમાનમ્ આભીરૈઃ કૃષ્ણ કૃષ્ણાવરોધનમ્
હૃતં યષ્ટિપ્રહરણૈઃ પરિભૂય બલં મમ ॥

નિઃશ્રીકતા ન મે ચિત્રં યજ્ જીવામિ તદ્ અદ્ભુતમ્
નીચાવમાનપઙ્કાઙ્કી નિર્લજ્જો ઽસ્મિ પિતામહ ॥

કૃષ્ણશબ્દસ્ય ભાજો વૈ ત્રય એવ મહામુને ॥

અહં ચ ત્વં ચ દેવશ્ ચ યથાર્હં કૃતવાન્ વિભુઃ ॥

કૃષ્ણે તસ્મિન્ મહાબાહૌ મહાત્મનિ મહીપતૌ ॥

મમ ચિત્તં યથાશક્તં નાન્યો વેદેહ વેદ્મ્ય્ અહમ્ ॥

ભક્તાન્નપાનક્રીડાભિર્ ભૂમૌ ઽસૌ દેવકીસુતઃ ॥

કૃતવાન્ યો મમ પ્રીતિં સએવાકર્ષતિ મે મનઃ ॥

કલેવરમ્ ઇદં ત્યક્ષ્યે પાસ્યે વા વિષમ્ ઉલ્બણમ્ ॥

પતે વા પર્વતાગ્રાત્ તુ જલં વા પ્રવિશે મુને ॥

પ્રવેક્ષ્યામ્ય્ અગ્નિમ્ ઉજ્વાલ્ય વત્સ્યે પ્રાયોપવેશનમ્ ॥

તં વિના દેવદેવેશમ્ ઇદં મે પાઞ્ચભૌતિકમ્ ॥

શરીરમ્ ઇદમ્ અત્યુગ્રં કઠિનં ક્લિષ્ટકલ્પનમ્ ॥

અમેધ્યમૂત્રસંપૂર્ણ ભાજનં પરિચાપલમ્ ॥

અતિકષ્ટં કષ્ટતરં જીવિતું નોત્સહે ક્ષણમ્ ॥

સર્વં શૂન્યમ્ ઇદં વિશ્વં પ્રતિભાતિ મહામુને ॥

શઙ્ખચક્રગદાશાર્ઙ્ગ નન્દકાયુધધારિણમ્ ॥

વિના તં પુણ્ડરીકાક્ષં દેવદેવં ખગધ્વજમ્ ॥

હરિવિરઞ્ચિહરયોર્ ઈશં ચિત્રધ્વજં મુને ॥

અપશ્યમાનો જીવામિ કથમ્ અત્ર મહામુને ॥

ત્વમ્ એવેત્થં x મહર્ષેર્ આવયો પ્રાણસંસ્થિતિમ્ ॥

કથં તેન વિના જિષ્ણું વિષ્ણુમ્ અત્યદ્ભુતં મુને ॥

યત્ સર્વં તદીયમ્ ઇતિ લોકે વિશ્રુતમ્ અદ્ભુતમ્ ॥

મદીયમ્ એવ જાનાતિ સત્યે નૈવ ચ મે શપે ॥

વિના તેનૈવ કૃષ્ણેન કૃષ્ણે જિષ્ણો મહદ્ભુતમ્ ॥

ક્રૂરે ઽસ્મિઞ્ જગતિ ક્રૂરઃ સોઢું જીવં મહામુને ॥

ન શક્નોમિ હરેઃ પદ્ભ્યાં શપે તસ્ય મહાત્મનઃ ॥

અલં તે વ્રીડયા પાર્થ ન ત્વં શોચિતુમ્ અર્હસિ
અવેહિ સર્વભૂતેષુ કાલસ્ય ગતિર્ ઈદૃશી ॥

કાલો ભવાય ભૂતાનામ્ અભાવાય ચ પાણ્ડવ
કાલમૂલમ્ ઇદં જ્ઞાત્વા ભવ સ્થૈર્યધનો ઽર્જુન ॥

નદ્યઃ સમુદ્રા ગિરયઃ સકલા ચ વસુંધરા
દેવા મનુષ્યાઃ પશવસ્ તરવઃ સસરીસૃપાઃ ॥

સૃષ્ટાઃ કાલેન કાલેન પુનર્ યાસ્યન્તિ સંક્ષયમ્
કાલાત્મકમ્ ઇદં સર્વં જ્ઞાત્વા શમમ્ અવાપ્નુહિ ॥

કાલસ્વરૂપી ભગવાન્ કૃષ્ણઃ કમલલોચનઃ ॥

યચ્ ચાત્થ કૃષ્ણમાહાત્મ્યં તત્ તથૈવ ધનંજય
ભારાવતારકાર્યાર્થમ્ અવતીર્ણઃ સ મેદિનીમ્ ॥

ભારાક્રાન્તા ધરા યાતા દેવાનાં સમિતિં પુરા
તદર્થમ્ અવતીર્ણો ઽસૌ કાલરૂપી જનાર્દનઃ ॥

તચ્ ચ નિષ્પાદિતં કાર્યમ્ અશેષા ભૂભૃતો હતાઃ
વૃષ્ણ્યન્ધકકુલં સર્વં તથા પાર્થોપસંહૃતમ્ ॥

ન કિંચિદ્ અન્યત્ કર્તવ્યમ્ અસ્ય ભૂમિતલે પ્રભોઃ
અતો ગતઃ સ ભગવાન્ કૃતકૃત્યો યથેચ્છયા ॥

સૃષ્ટિં સર્ગે કરોત્ય્ એષ દેવદેવઃ સ્થિતૌ સ્થિતિમ્
અન્તે ઽન્તાય સમર્થો ઽયં સામ્પ્રતં વૈ યથા કૃતમ્ ॥

તસ્માત્ પાર્થ ન સંતાપસ્ ત્વયા કાર્યઃ પરાભવાત્
ભવન્તિ ભવકાલેષુ પુરુષાણાં પરાક્રમાઃ ॥

ત્વયૈકેન હતા ભીષ્મ દ્રોણકર્ણાદયો નૃપાઃ
તેષામ્ અર્જુન કાલોત્થઃ કિં ન્યૂનાભિભવો ન સઃ ॥

વૈકુણ્ઠાદ્ આગતો વિષ્ણુસ્ તમ્ એવ ગતવાન્ પ્રભુઃ ॥

તસ્માત્ પાર્થ ન શોચસ્ ત્વમ્ અશોચ્યો ભગવાન્ હરિઃ ॥

વિષ્ણોસ્ તસ્યાનુભાવેન યથા તેષાં પરાભવઃ
ત્વત્તસ્ તથૈવ ભવતો દસ્યુભ્યો ઽન્તે તદુદ્ભવઃ ॥

સ દેવો ઽન્યશરીરાણિ સમાવિશ્ય જગત્સ્થિતિમ્
કરોતિ સર્વભૂતાનાં નાશં ચાન્તે જગત્પતિઃ ॥

તવોદ્ભવે સ કૌન્તેય સહાયો ઽભૂજ્ જનાર્દનઃ ॥

ભાવાભાવે ચ સ તદા સહયોગં જનાર્દનઃ ॥

ભવાન્તે ત્વદ્વિપક્ષાસ્ તે કેશવેનાવલોકિતાઃ ॥

કઃ શ્રદ્દધ્યાત્ સગાઙ્ગેયાન્ હન્યાસ્ ત્વં સર્વકૌરવાન્
આભીરેભ્યશ્ ચ ભવતઃ કઃ શ્રદ્દધ્યાત્ પરાભવમ્ ॥

પાર્થૈતત્ સર્વભૂતસ્ય હરેર્ લીલાવિચેષ્ટિતમ્
ત્વયા યત્ કૌરવા ધ્વસ્તા યદ્ આભીરૈર્ ભવાઞ્ જિતઃ ॥

ગૃહીતા દસ્યુભિર્ યચ્ ચ ભવતા શોચિતાઃ સ્ત્રિયઃ
તદ્ અપ્ય્ અહં યથાવૃત્તં કથયામિ તવાર્જુન ॥

અષ્ટાવક્રઃ પુરા વિપ્રો જલવાસરતો ઽભવત્
બહૂન્ વર્ષગણાન્ પાર્થ ગૃણન્ બ્રહ્મ સનાતનમ્ ॥

જિતેષ્વ્ અસુરસંઘેષુ મેરુપૃષ્ઠે મહોત્સવઃ
બભૂવ તત્ર ગચ્છન્ત્યો દદૃશુસ્ તં સુરસ્ત્રિયઃ ॥

રમ્ભાતિલોત્તમાદ્યાશ્ ચ શતશો ઽથ સહસ્રશઃ
તુષ્ટુવુસ્ તં મહાત્માનં પ્રશશંસુશ્ ચ પાણ્ડવ ॥

આકણ્ઠમગ્નં સલિલે જટાભારધરં મુનિમ્
વિનયાવનતાશ્ ચૈનં પ્રણેમુઃ સ્તોત્રતત્પરાઃ ॥

યથા યથા પ્રસન્નો ઽસૌ તુષ્ટુવુસ્ તં તથા તથા
સર્વાસ્ તાઃ કૌરવશ્રેષ્ઠ વરિષ્ઠં તં દ્વિજન્મનામ્ ॥

પ્રસન્નો ઽહં મહાભાગા ભવતીનાં યદ્ ઇષ્યતે
મત્તસ્ તદ્ વ્રિયતાં સર્વં પ્રદાસ્યામ્ય્ અતિદુર્લભમ્ ॥

રમ્ભાતિલોત્તમાદ્યાસ્ તં વૈદિક્યો ઽપ્સરસો ઽબ્રુવન્
પ્રસન્ને ત્વય્ય્ અપર્યાપ્તં કિમ્ અસ્માકમ્ ઇતિ દ્વિજ ॥

ઇતરાસ્ ત્વ્ અબ્રુવન્ વિપ્ર પ્રસન્નો ભગવાન્ યદિ
તદ્ ઇચ્છામઃ પતિં પ્રાપ્તું વિપ્રેન્દ્ર પુરુષોત્તમમ્ ॥

એવં ભવિષ્યતીત્ય્ ઉક્ત્વા ઉત્તતાર જલાન્ મુનિઃ
તમ્ ઉત્તીર્ણં ચ દદૃશુર્ વિરૂપં વક્રમ્ અષ્ટધા ॥

તં દૃષ્ટ્વા ગૂહમાનાનાં યાસાં હાસઃ સ્ફુટો ઽભવત્
તાઃ શશાપ મુનિઃ કોપમ્ અવાપ્ય કુરુનન્દન ॥

યસ્માદ્ વિરૂપરૂપં માં મત્વા હાસાવમાનના
ભવતીભિઃ કૃતા તસ્માદ્ એષં શાપં દદામિ વઃ ॥

મત્પ્રસાદેન ભર્તારં લબ્ધ્વા તુ પુરુષોત્તમમ્
મચ્છાપોપહતાઃ સર્વા દસ્યુહસ્તં ગમિષ્યથ ॥

ઇત્ય્ ઉદીરિતમ્ આકર્ણ્ય મુનિસ્ તાભિઃ પ્રસાદિતઃ
પુનઃ સુરેન્દ્રલોકં વૈ પ્રાહ ભૂયો ગમિષ્યથ ॥

એવં તસ્ય મુનેઃ શાપાદ્ અષ્ટાવક્રસ્ય કેશવમ્
ભર્તારં પ્રાપ્ય તા યાતા દસ્યુહસ્તં વરાઙ્ગનાઃ ॥

તત્ ત્વયા નાત્ર કર્તવ્યઃ શોકો ઽલ્પો ઽપિ હિ પાણ્ડવ
તેનૈવાખિલનાથેન સર્વં તદ્ ઉપસંહૃતમ્ ॥

ભવતાં ચોપસંહારમ્ આસન્નં તેન કુર્વતા
બલં તેજસ્ તથા વીર્યં માહાત્મ્યં ચોપસંહૃતમ્ ॥

જાતસ્ય નિયતો મૃત્યુઃ પતનં ચ તથોન્નતેઃ
વિપ્રયોગાવસાનશ્ ચ સંયોગઃ સંચયાત્ ક્ષયઃ ॥

વિજ્ઞાય ન બુધાઃ શોકં ન હર્ષમ્ ઉપયાન્તિ યે
તેષામ્ એવેતરે ચેષ્ટાં શિક્ષન્તઃ સન્તિ તાદૃશાઃ ॥

તસ્માત્ ત્વયા નરશ્રેષ્ઠ જ્ઞાત્વૈતદ્ ભ્રાતૃભિઃ સહ
પરિત્યજ્યાખિલં તન્ત્રં ગન્તવ્યં તપસે વનમ્ ॥

તદ્ ગચ્છ ધર્મરાજાય નિવેદ્યૈતદ્ વચો મમ
પરશ્વો ભ્રાતૃભિઃ સાર્ધં યથા યાસિ તથા કુરુ ॥

ઇત્ય્ ઉક્તો ઽભ્યેત્ય પાર્થાભ્યાં યમાભ્યાં ચ સહાર્જુનઃ
દૃષ્ટં ચૈવાનુભૂતં ચ કથિતં તદ્ વિશેષતઃ ॥

વ્યાસવાક્યં ચ તે સર્વે શ્રુત્વાર્જુનસમીરિતમ્
રાજ્યે પરીક્ષિતં કૃત્વા યયુઃ પાણ્ડુસુતા વનમ્ ॥

ઇત્ય્ એતત્ તવ મૈત્રેય વિસ્તરેણ મયોદિતમ્
જાતસ્ય યદ્ યદોર્ વંશે વાસુદેવસ્ય ચેષ્ટિતમ્ ॥

યશ્ ચૈતચ્ ચરિતં તસ્ય કૃષ્ણસ્ય શૃણુયાત્ સદા ॥

સર્વપાપવિનિર્મુક્તો વિષ્ણુલોકં સ ગચ્છતિ ॥