વિષ્ણુપુરાણ (સમીક્ષિત આવૃત્તિ) · અધ્યાય 5.19

એવમ્ અન્તર્ જલે વિષ્ણુમ્ અભિષ્ટૂય સ યાદવઃ
અર્ચયામ્ આસ સર્વેશં પુષ્પધૂપૈર્ મનોમયૈઃ ॥

પરિત્યક્તાન્યવિષયં મનસ્ તત્ર નિવેશ્ય સઃ
બ્રહ્મભૂતે ચિરં સ્થિત્વા વિરરામ સમાધિતઃ ॥

કૃતકૃત્યમ્ ઇવાત્માનં મન્યમાનો મહામતિઃ
આજગામ રથં ભૂયો નિર્ગમ્ય યમુનામ્ભસઃ ॥

રામકૃષ્ણૌ ચ દદૃશે યથાપૂર્વં રથે સ્થિતૌ
વિસ્મિતાક્ષસ્ તદાક્રૂરસ્ તં ચ કૃષ્ણો ઽભ્યભાષત ॥

નૂનં તે દૃષ્ટમ્ આશ્ચર્યમ્ અક્રૂર યમુનાજલે
વિસ્મયોત્ફુલ્લનયનો ભવાન્ સંલક્ષ્યતે યતઃ ॥

અન્તર્ જલે યદ્ આશ્ચર્યં દૃષ્ટં તત્ર મયાચ્યુત
તદ્ અત્રાપિ હિ પશ્યામિ મૂર્તિમત્ પુરતઃ સ્થિતમ્ ॥

જગદ્ એતન્ મહાશ્ચર્યં રૂપં યસ્ય મહાત્મનઃ
તેનાશ્ચર્યપરેણાહં ભવતા કૃષ્ણ સંગતઃ ॥

તત્ કિમ્ એતેન મથુરાં પ્રયામો મધુસૂદન
બિભેમિ કંસાદ્ ધિગ્ જન્મ પરપિણ્ડોપજીવિનામ્ ॥

ઇત્ય્ ઉક્ત્વા ચોદયામ્ આસ તાન્ હયાન્ વાતરંહસઃ
સંપ્રાપ્તશ્ ચાતિસાયાહ્ને સો ઽક્રૂરો મથુરાં પુરીમ્ ॥

વિલોક્ય મથુરાં રામં કૃષ્ણં ચાહ સ યાદવઃ
પદ્ભ્યાં યાતં મહાવીર્યૌ રથેનૈકો વિશામ્ય્ અહમ્ ॥

ગન્તવ્યં વસુદેવસ્ય ન ભવદ્ભ્યાં તથા ગૃહમ્
યુવયોર્ હિ કૃતે વૃદ્ધઃ સ કંસેન નિરસ્યતે ॥

ઇત્ય્ ઉક્ત્વા પ્રવિવેશાથ સો ઽક્રૂરો મથુરાં પુરીમ્
પ્રવિષ્ટૌ રામકૃષ્ણૌ ચ રાજમાર્ગમ્ ઉપાગતૌ ॥

સ્ત્રીભિર્ નરૈશ્ ચ સાનન્દં લોચનૈર્ અભિવીક્ષિતૌ
જગ્મતુર્ લીલયા વીરૌ મત્તૌ બાલગજાવ્ ઇવ ॥

ભ્રમમાણૌ તુ તૌ દૃષ્ટ્વા રજકં રઙ્ગકારકમ્
અયાચેતાં સુરૂપાણિ વાસાંસિ રુચિરાનનૌ ॥

કંસસ્ય રજકઃ સો ઽથ પ્રસાદારૂઢવિસ્મયઃ
બહૂન્ય્ આક્ષેપવાક્યાનિ પ્રાહોચ્ચૈ રામકેશવૌ ॥

તતસ્ તલપ્રહારેણ કૃષ્ણસ્ તસ્ય દુરાત્મનઃ
પાતયામ્ આસ કોપેન રજકસ્ય શિરો ભુવિ ॥

હત્વાદાય ચ વસ્ત્રાણિ પીતનીલામ્બરૌ તતઃ
કૃષ્ણરામૌ મુદા યુક્તૌ માલાકારગૃહં ગતૌ ॥

વિકાસિનેત્રયુગલો માલાકારો ઽપિ વિસ્મિતઃ
એતૌ કસ્ય કુતો વૈતૌ મૈત્રેયાચિન્તયત્ તતઃ ॥

પીતનીલામ્બરધરૌ તૌ દૃષ્ટ્વાતિમનોહરૌ
સ તર્કયામ્ આસ તદા ભુવં દેવાવ્ ઉપાગતૌ ॥

વિકાસિમુખપદ્માભ્યાં તાભ્યાં પુષ્પાણિ યાચિતઃ
ભુવં વિષ્ટભ્ય હસ્તાભ્યાં પસ્પર્શ શિરસા મહીમ્ ॥

પ્રસાદપરમૌ નાથૌ મમ ગેહમ્ ઉપાગતૌ
ધન્યો ઽહમ્ અર્ચયિષ્યામીત્ય્ આહ તૌ માલ્યજીવકઃ ॥

તતઃ પ્રહૃષ્ટવદનસ્ તયોઃ પુષ્પાણિ કામતઃ
ચારૂણ્ય્ એતાન્ય્ અથૈતાનિ પ્રદદૌ સ વિલોભયન્ ॥

પુનઃ પુનઃ પ્રણમ્યાસૌ માલાકારો નરોત્તમૌ
દદૌ પુષ્પાણિ ચારૂણિ ગન્ધવન્ત્ય્ અમલાનિ ચ ॥

માલાકારાય કૃષ્ણો ઽપિ પ્રસન્નઃ પ્રદદૌ વરમ્
શ્રીસ્ ત્વાં મત્સંશ્રયા ભદ્ર ન કદાચિત્ ત્યજિષ્યતિ ॥

બલહાનિર્ ન તે સૌમ્ય ધનહાનિસ્ તથૈવ ચ
યાવદ્ દિનાનિ તાવચ્ ચ ન નશિષ્યતિ સંતતિઃ ॥

ભુક્ત્વા ચ ભોગાન્ વિપુલાંસ્ ત્વમ્ અન્તે મત્પ્રસાદજમ્
મમાનુસ્મરણં પ્રાપ્ય દિવ્યં લોકમ્ અવાપ્સ્યસિ ॥

ધર્મે મનશ્ ચ તે ભદ્ર સર્વકાલં ભવિષ્યતિ
યુષ્મત્સંતતિજાતાનાં દીર્ઘમ્ આયુર્ ભવિષ્યતિ ॥

નોપસર્ગાદિકં દોષં યુષ્મત્સંતતિસંભવઃ
સંપ્રાપ્સ્યતિ મહાભાગ યાવત્ સૂર્યો ભવિષ્યતિ ॥

ઇત્ય્ ઉક્ત્વા તદ્ગૃહાત્ કૃષ્ણો બલદેવસહાયવાન્
નિર્જગામ મુનિશ્રેષ્ઠ માલાકારેણ પૂજિતઃ ॥