વિષ્ણુધર્મોત્તરપુરાણમ્ · અધ્યાય 1.84

માર્કણ્ડેય ઉવાચ ॥
લગ્નાનિ દ્વાદશોક્તાનિ દિનરાત્રેણ નિત્યશઃ ॥
યત્રાદિત્યઃ સ્થિતો રાશૌ તદાદ્યાનિ નરાધિપ

મેષો વૃષોથ મિથુનઃ કુલીરસ્સિંહ એવ ચ ॥
કન્યા તુલા તથા કીટો ધન્વી મકર એવ ચ

કુમ્ભો મીનશ્ચ રાજેન્દ્ર લગ્ના દ્વાદશ કીર્ત્તિતાઃ ॥
કુજશ્શુક્રો બુધશ્ચન્દ્રઃ સૂર્યશ્ચાન્દ્રિસ્સિતસ્તથા

ભૌમો જીવશ્ચ સૌરશ્ચ શનિર્જીવિસ્તથૈવ ચ ॥
મેષાદીનાં ક્રમેણોક્તાઃ પ્રભાવઃ પૃથિવીપતે

લગ્રસ્યાર્ધં સ્મૃતા હોરા તયોર્વિષમરાશિષુ ॥
આદિત્યચન્દ્રૌ ચન્દ્રાર્કાવીશ્વરૌ સમરાશિષુ

લગ્નત્રિભાગો દ્રેષ્કાણઃ ક્રમાત્તેષાં તથેશ્વરાઃ ॥
લગ્નેશઃ પંચમેશશ્ચ નવમેશસ્તથૈવ ચ

મેષાદ્યાઃ કથિતા નિત્યં મેષસિંહધનુર્ધરાઃ ॥
મકરાદ્યાસ્તથા પ્રોક્તા વૃષકન્યામૃગાસ્તથા

તુલાદ્યા મિથુનસ્તૌલી કુમ્ભશ્ચ વસુધાધિપ ॥
કુલીરાદ્યાઃ કુલીરશ્ચ કીટો મીનસ્તથૈવ ચ

આદ્યુક્તરાશિપ્રભૃતિ ગણનીયા નવાંશકાઃ॥
રાશીનાં તુ યથોક્તાનાં ક્રમાન્નવ નવેશ્વરાઃ

સ્વરાશિતસ્તથારભ્ય ક્રમેણૈવ નવેશ્વરાઃ ॥
રાશીશ્વરેશ્વરાઃ પ્રોક્તા રાશીનાં દ્વાદશાંશકાઃ

પંચ ભૌમસ્ય સૌરસ્ય પંચ ત્રિંશાંશકા મતાઃ ॥
જીવસ્યાષ્ટૌ વિનિર્દિષ્ટાઃ સપ્ત પ્રોક્તા બુધસ્ય તુ

શુક્રસ્યોક્તાસ્તથા પઞ્ચ રાશૌ વિષમ સંજ્ઞકે ॥
આદ્યાસ્તુ પઞ્ચ શુક્રસ્ય તતસ્સપ્ત બુધસ્ય ચ

જીવસ્યાષ્ટૌ તથા પ્રોક્તાઃ પઞ્ચ સૌરસ્ય ચાપ્યથ ॥
કુજસ્ય તુ તથા પઞ્ચ રાશૌ તુ સમસંખ્યકે

લગ્નં ચ હોરા ચ તથા દ્રિકાણં નવાંશકં દ્વાદશભાગસંજ્ઞમ્ ॥
ત્રિંશાંશકં ચાપ્યથ ષષ્ઠમત્ર ષડ્ભેદમાહુર્મુનયશ્ચ લગ્નમ્

ઇતિ શ્રીવિષ્ણુધર્મોત્તરે પ્રથમખણ્ડે મા૦ સ૦ ષડ્ લગ્નવર્ણનો નામ ચતુરશીતિતમોઽધ્યાયઃ