વિષ્ણુધર્મોત્તરપુરાણમ્ · અધ્યાય 1.47

માર્કણ્ડેય ઉવાચ ॥
વહ્નિજ્વાલાગ્રવર્ણેન જટાજૂટેન રાજિતમ્ ॥
ગગનાર્દ્ધમિવાઽઽરૂઢં નિદાઘે રવિમણ્ડલમ્

આધારં સર્વદેવાનાં તપસા દ્યોતિતપ્રભમ્ ॥
સેવમાનમવસનં પીતગાત્રમરિન્દમમ્

એકમેકાકિનં વીરં સહસ્રશતમણ્ડિતમ્ ॥
પિણ્ડિતં સકલં ધામ બ્રહ્મક્ષત્રિયતેજસામ્

કૃષ્ણાજિનોત્તરાસઙ્ગભ્રાજમાનં બલોદ્ધતમ્ ॥
સ્નિગ્ધયા રઞ્જિતમિવ પ્રાયેણ પાર્વતીદૃશા

વિરાજમાનં દોર્દણ્ડરુક્મદણ્ડેન ભાસ્વતા॥
પરશ્વધેન તીક્ષ્ણેન વિમલાકાશવર્ચસા

તપસ્વિનમનાદૃશ્યં યમકાલાન્તકોપમમ્ ॥
કમ્પમાનં પદન્યાસૈર્વસુધાં સકલાં તથા

મુષ્ણન્તં સર્વતેજાંસિ પ્રભાતે રવિમણ્ડલમ્॥
પ્રાંશું કનકવર્ણાઙ્ગં સિતયજ્ઞોપવીતિનમ્

ગઙ્ગાયાઃ પ્રવહેણૈવ મેરુશૃંગં વિરાજિતમ્॥
તેજસા દહનાકારં પ્રજાસંહારકારકમ્

વિષમં પ્રમથેશસ્ય તૃતીયમિવ લોચનમ્ ॥
અપ્રસહ્યમનાવાર્યં દુર્લઙ્ઘ્યં જીવિતચ્છિદમ્

કાલેનેવ ભુજં સવ્યં દૈત્યહેતોઃ પ્રસારિતમ્ ॥
રામે દૃષ્ટિપથં પ્રાપ્તે દાનવાનાં સમન્તતઃ

હાહાકારો મહાનાસીત્તમેકં નિઘ્નતાં રણે ॥
શસ્ત્રધારણવિભ્રષ્ટબ્રાહ્મણ્યં સ્વપથાચ્ચ્યુતમ્

ઘાતયધ્વં દુરાચારમેનમૂચુઃ પરસ્પરમ્ ॥
એવમાદ્રવતાં તેષાં બહૂનામાતતાયિનામ્

જગ્રાહ વેગં સર્વેષાં મરુતામિવ પર્વતઃ ॥
સ હન્યમાનો નારાચૈસ્તોમરૈર્મુશલૈસ્તથા

ગદાભિરસિભિઃ પાશૈર્ભુશુણ્ડીભિરયોગુડૈઃ ॥
પટ્ટિશૈર્ભિન્દિપાલૈશ્ચ હુતૈઃ શૂલૈઃ પરશ્વધૈઃ

ન વિવ્યથે હ્યમેયાત્મા ધરાધર ઇવાઽનિલૈઃ

સંવેષ્ટિતં સર્વત એવ સૈન્યૈરદૃષ્ટયુદ્ધોઽપિ રણે મહાત્મા॥
દૈત્યાર્ણવં ગોષ્પદતુલ્યમાત્રમમન્યતાઽઽજૌ રણચણ્ડવેગઃ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે યુદ્ધે ભાર્ગવરામદર્શનં નામ સપ્તચત્વારિંશત્તમોઽધ્યાયઃ