વિષ્ણુધર્મોત્તરપુરાણમ્ · અધ્યાય 1.122

વજ્ર ઉવાચ॥
હિરણ્યકશિપોઃ પુત્રો કાલનેમિર્મહાસુરઃ॥
કથં કૃષ્ણેન નિહતસ્તન્મમાચક્ષ્વ પૃચ્છતઃ

માર્કણ્ડેય ઉવાચ॥
યદા દૈત્યવધે વૃત્તે દૈત્યાઃ પાતાલમાશ્રિતાઃ॥
મયતારૌ સમાશ્રિત્ય ભૂયો દેવાન્પ્રદુદ્રુવુઃ

તત્ર દેવગણાઃ સર્વે મયતારપુરઃસરૈઃ ॥
દાનવૈર્નિહતા યુદ્ધે દેવાચાર્યં બૃહસ્પતિમ્

સંપ્રાપ્તાઃ શરણં વિપ્રં તાનુવાચ બૃહસ્પતિઃ ॥
તારકશ્ચ મયશ્ચૈવ મહાબલપરાક્રમૌ

યયુર્જેતું દેવગણાઁસ્તાવિમૌ ચોદયામ્યહમ્ ॥
એવમુક્ત્વા દેવગણાન્દેવાચાર્યો બૃહસ્પતિઃ ॥
તુષ્ટાવ દેવદેવેશં બહુરૂપં હુતાશનમ્

બૃહસ્પતિરુવાચ ॥
ત્વમગ્ને સર્વભૂતાનામન્તશ્ચરસિ પાવક ॥
વેદાસ્ત્વદર્થં જાતાશ્ચ જાતવેદાસ્તથા હ્યસિ

ત્વં યજ્ઞસ્ત્વં વષટ્કારસ્ત્વં હવીંષિ મહાદ્યુતે ॥
ત્વં સ દેવ ચરસ્યાત્મા વિષ્ણોરમિતતેજસઃ

ત્વં મુખં સર્વદેવાનાં સર્વસ્યાત્મા તથા ભવાન્ ॥
ઊષ્મા ત્વં દેહિનાં દેહે ભુક્તપીતવતસ્તથા

યચ્છક્તિઃ સર્વદેવાનાં ત્વદીયા ભૂતભાવન॥
પ્રાપ્તા ત્વયાહુતિઃ સમ્યગાદિત્ય મુપતિષ્ઠતે

આદિત્યાજ્જાયતે વૃષ્ટિર્વૃષ્ટેરન્નં તતઃ પ્રજાઃ ॥
સર્વદેવવરેશાનઃ સર્વલોકનમસ્કૃતઃ

ત્રૈલોક્યસ્ય સમુત્પત્તાવેકઃ કારણતાં ગતઃ ॥
કાલાગ્નિરુદ્રો ભગવાઞ્જગત્સંહારકારકઃ

સ્થિતૌ નિમિત્તં ચ ભવાન્સર્વેષાં દેહિનાં શમઃ॥
અતીવ દુર્ધરં દેવ તવ તેજઃ સુદારુણમ્

।
તેજસા તેન દૈત્યેન્દ્રાઞ્જહિ મા ત્વં ચિરં કૃથા ॥
સખા ચ તે રણે દેવ ભવિષ્યતિ સમીરણઃ

ઇત્યેવમુક્તોઙ્ગિરસા મહાત્મા તથેતિ તં પ્રાહ નૃપેન્દ્ર પૂજ્યમ્ ॥
જીવોઽપિ ગત્વા પવનં જગાદ દેવેશ્વરસ્યાનઘસિદ્ધિમિચ્છન્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદેઽગ્નિસ્તોત્રં નામ દ્વાવિંશત્યધિકશતતમોઽધ્યાયઃ