વિષ્ણુ પુરાણ · અધ્યાય 5.2

તે સર્વે સર્વદા ભદ્રે મત્પ્રસાદાદસંશયમ્ ।
અસંદિગ્ધા ભવિષ્યન્તિ ગચ્છ દેવિ યથોદિતમ્ ।
ઇતિ વિષ્ણુમહાપુરાણે પઞ્ચમાંશે પ્રથમો ઽધ્યાયઃ (1)
શ્રીપરાશર ઉવાચ
યથોક્તં સા જગદ્ધાત્રા દેવદેવેન વૈ તથા ।
ષડ્ગર્ભગર્બવિન્યાસં ચક્રે ચાન્યસ્ય કર્ષણમ્

સપ્તમે રોહિણીં ગર્ભે પ્રાપ્તે ગર્ભં તતો હરિઃ ।
લોકત્ર યોપકારાય દેવક્યાઃ પ્રવિવેશ હ

યોગનિદ્રા યશોદાયાસ્તસ્મિન્નેવ તથા દિને ।
સંભૂતા જઠરે તદ્વદ્યથોક્તં પરમેષ્ઠિના

તતો ગ્રહગણઃસમ્યક્પ્રચચાર દિવિ દ્વિજ ।
વિષ્ણોરંશે ભુવં યાતે ઋતવશ્ચાબભુઃ શુભાઃ

ન સેહે દેવકીં દ્રષ્ટં કશ્તિદપ્યતિતેજસા ।
જાજ્વલ્યમાનાં તાં દૃષ્ટ્વા મનાંસિ ક્ષોભમાયયુઃ

અદૃષ્ટાઃ પુરુષૈઃ સ્ત્રીભિર્ દેવકીં દેવતાગણાઃ ।
બિભ્રાણાં વપુષા વિષ્ણું તુષ્ટુવુસ્તામહર્નિશમ્

દેવતા ઊચુઃ
પ્રકૃતિસ્ત્વં પરા સૂક્ષ્મા બ્રહ્મગર્ભાભવત્પુરા ।
તતો વાણી જગદ્ધાતુર્વેદગર્ભાસિ શોભને

સૃજ્યસ્વરૂપગર્ભાસિ સૃષ્ટિભૂતા સનાતને ।
બીજભૂતા તુ સર્વસ્ય યજ્ઞભૂતા ભવસ્ત્રયી

ફલગર્ભા ત્વમેવેજ્યા વહ્નિગર્ભા તથારણિઃ ।
અદિતિર્દેવગર્ભા ત્વં દૈત્યગર્ભા તથા દિતિઃ

જ્યોત્સ્ના વાસરગર્ભા ત્વં જ્ઞાનગર્ભાસિ સન્નતિઃ ।
નયગર્ભા પરા નીતિર્લજ્જા ત્વં પ્રશ્રયોદ્વહા

કામગર્ભા તથેચ્છા ત્વં તુષ્ટિઃ સંતોષગર્ભિણી ।
મેધા ચ બોધગર્ભસિ ધૈર્યગર્ભોદ્વહા ધૃતિઃ

ગ્રહર્ક્ષતારકાગર્ભા દ્યૌરસ્યાખિલહૈતુકી ।
એતા વિભૂતયો દેવિ તથાન્યાશ્ ચ સહસ્રશઃ

તથા સંખ્યા જગદ્ધાત્રી સાંપ્રતં જઠરે તવ ।
સમુદ્રાદ્રિનદીદ્વીપવનપત્તનભૂષણા ।
ગ્રામખર્વટખેટાઢ્યા સમસ્તા પૃતિવી શુભે

સમસ્તવહ્નયોંઽભાંસિ સકલાશ્ ચ સમીરણાઃ ।
મહોરગાસ્ તથા યક્ષા રાક્ષસાઃ પ્રેતગુદ્યકાઃ

ગ્રહર્ક્ષતારકાચિત્રવિમાનશતસંકુતમ્ ।
અવકાશમશેષસ્ય યદ્દદાતિ નભસ્થલમ્

ભૂલોકશ્ ચ ભુવર્લોકઃસ્વર્લોકો ઽથ મહર્જનઃ ।
તપશ્ ચ બ્રહ્મલોકશ્ ચ બ્રહ્માણ્ડમખિલં શુભે

તદન્તરે સ્થિતા દેવા દૈત્યગન્ધર્વચારણાઃ ।
મહોરગાસ્ તથા યક્ષા રાક્ષસાઃ પ્રેતગુહ્યકાઃ

મનુષ્યાઃ પશવશ્ચાન્યે યે ચ જીવા યશસ્વિનિ ।
તૈર્ અન્તસ્થૈર્ અનન્તો ઽસૌ સર્વગઃ સર્વભાવનઃ

રૂપકર્મસ્વરૂપાણિ ન પરિચ્છેદગોચરે ।
યસ્યાખિલપ્રમાણાનિ સ વિષ્ણુર્ ગર્ભગસ્ તવ

ત્વં સ્વાહા ત્વં સ્વધા વિદ્યા સ્વધા ત્વં જ્યોતિરંબરે ।
ત્વં સર્વલોકરક્ષાર્થમવતીર્ણા મહીતલે

પ્રસીદ દેવિ સર્વસ્ય જગતઃ શં શુભે કુરુ ।
પ્રીત્યા તં ધારયેશાનં ધૃતં યેનાખિલં જગત્