વિષ્ણુ પુરાણ · અધ્યાય 5.12

ઇતિ શ્રીવિષ્ણુમહાપુરાણે પઞ્ચમાંશ એકાદશો ઽધ્યાયઃ (11)
શ્રીપરાશર ઉવાચ
ધૃતે ગોવર્ધને શૈલે પરિત્રાતે ચ ગોકુલે ।
રોજયામાસ કૃષ્ણસ્યદર્શનં પાકશાસનઃ

સો ઽધિરુહ્ય મહાનાગમ્ ઐરાવતમ્ અમિત્રજિત્ ।
ગોવર્ધનગિરૌ કૃષ્ણં દદર્શ ત્રિદશેશ્વરઃ

ચારયન્તં મહાવીર્યં ગાસ્તુ ગોપવપુર્ધરમ્ ।
કૃત્સ્નસ્ય જગતો ગોપં વૃતં ગોપકુમારકૈઃ

ગરુડં ચ દદર્શોચ્ચૈર્ અન્તર્ધાનગતં દ્વિજ ।
કૃતચ્છાયં હરેર્મૂર્ધ્નિ પક્ષાભ્યાં પક્ષિપુઙ્ગવમ્

અવરુહ્ય સ નાગેન્દ્રાદેકાન્તે મધુસૂદનમ્ ।
શક્રઃસસ્મિતમાહેદં પ્રીતિવિસ્તારિતેક્ષણઃ

ઇન્દ્ર ઉવાચ
કૃષ્ણકૃષ્ણ શૃણુષ્વેદં યદર્થ મહામાગતઃ ।
ત્વત્સમીપં મહાબાહો નૈતચ્ ચિન્ત્યં ત્વાયાન્યથા

ભારાવતારણાર્થાય પૃથિવ્યાઃ પૃથિવીતલે ।
અવતીર્ણો ઽખિલાધાર ત્વમેવ પરમેશ્વર

મખભઙ્ગવિરોધેન મયા ગોકુલાનાશકાઃ ।
સમાદિષ્ટા મહામેઘાસ્તૈશ્ ચેદં કદનં કૃતમ્

ત્રાતાસ્તાશ્ ચ ત્વાયા ગાવઃસમુત્પાટ્ય મહીધરમ્ ।
તેનાહં તોષિતો વીરકર્મણાત્યદ્ભુતેન તે

સાધિનં કૃષ્ણ દેવાનામહં મન્યે પ્રયોજનમ્ ।
ત્વયાયમદ્રિપ્રવરઃ કરેણૈકેનયદ્ધૃતઃ

ગોભિશ્ ચ ચોદિતઃ કૃષ્ણ ત્વત્સકાશમિહાગતઃ ।
ત્વયા ત્રાતાભિર્ અત્યર્થં યુષ્મત્સત્કારકારણાત્

સ ત્વાં કૃષ્ણાભિષેક્ષ્યામિ ગાવં વાક્યપ્રચોદિતઃ ।
ઉપેન્દ્રત્વે ગવમિદ્રો ગોવિન્દસ્ત્વં ભવિષ્યસિ

શ્રીપરાશર ઉવાચ
અથોપવાહ્યાદાદાય ઘણ્ટામ્ ઐરાવતાદ્ ગજાત્ ।
અભિષેકં તયા ચક્રે પવિત્રજલપૂર્ણયા

ક્રિયમાણે ઽભિષેકે તુ ગાવઃ કૃષ્ણસ્ય તત્ક્ષણાત્ ।
પ્રસ્નવોદ્ભૂતદુગ્ધાર્દ્રાં સદ્યશ્ચક્રુર્વસુન્ધરામ્

અભિષિચ્ય ગવાં વાક્યાદુપેન્દ્રં વૈ જનાર્દનમ્ ।
પ્રીત્યા સપ્રશ્રયં વાક્યં પુનરાહ શચીપતિઃ

ગવામેતત્કૃતં વાક્યં તથાન્યદપિ મે શૃણુ ।
યદ્બવીમિ મહાભાગ ભારાવતરણેચ્છયા

મમાંશઃ પુરુષવ્યાઘ્ર પૃથિવ્યાં પૃથિવીધર ।
અવતીર્ણોર્ઽજુનોનામ સંરક્ષ્યો ભવતા સદા

ભારાવતરણે સાહ્યં સ તે વીરઃ કરિષ્યતિ ।
સંરક્ષણીયો ભવતા યથાત્મા મધુસૂદન

શ્રીભગવાનુવાચ
જાનામિ ભારતે વંશે જાતં પાર્થં તવાંશતઃ ।
તમહં પાલયિષ્યામિ યાવત્સ્થાસ્યમિ ભૂતલે

યાવન્મહીતલે શક્ર સ્થાસ્યામ્યહમરિન્દમ ।
ન તાવદર્જુનં કશ્ચિદ્દેવેન્દ્ર યુધિ જેષ્યતિ

કંસો નામ મહાબાહુર્દૈત્યો ઽરિષ્ટસ્તથાસુરઃ ।
કેશી કુવલયાપીડો નરકાદ્યાસ્ તથા પરે

હતેષુ તેષુ દેવેન્દ્ર ભવિષ્યતિ મહાહવઃ ।
તત્ર વિદ્ધિ સહસ્રાક્ષ ભારાવતરણં કૃતમ્

સ ત્વં ગચ્છ ન સંતાપં પુત્રાર્થે કર્તુમર્હસિ ।
નાર્જુનસ્ય રિપુઃ કશ્ચિન્મમાગ્રે પ્રભવિષ્યતિ

અર્જુનાર્થે ત્વહં સર્વાન્યુધિષ્ઠિરપુરોગમાન્ ।
નિવૃત્તે ભારતે યુદ્ધે કુન્ત્યૈ દાસ્યામ્યવિક્ષતામ્

શ્રીપરાશર ઉવાચ
ઇત્યુક્તઃ સંપરિષ્વજ્ય દેવારાજો જનાર્દનમ્ ।
આરુહ્યૌરાવતં નાગં પુનરેવ દિવં યયૌ

કૃષ્ણો હિ સહિતો ગોભિર્ ગોપાલૈશ્ ચ પુનર્વ્રજમ્ ।
આજગામાથ ગોપીનાં દૃષ્ટિપૂતેન વર્ત્મના