વરાહ પુરાણ · અધ્યાય 105

અથ ક્ષીરધેનુદાનવિધિઃ ॥
હોતોવાચ ॥
ક્ષીરધેનું પ્રવક્ષ્યામિ તાં નિબોધ નરાધિપ ॥
અનુલિપ્તે મહીપૃષ્ઠે ગોમયેન નૃપોત્તમ

ગોચર્મમાત્રમાનેન કુશાનાસ્તીર્ય સર્વતઃ ॥
તસ્યોપરિ મહારાજ ન્યસેત્કૃષ્ણાજિનં બુધઃ

તત્ર કૃત્વા કુણ્ડલિકાં ગોમયેન સુવિસ્તૃતામ્ ॥
ક્ષીરકુમ્ભં તતઃ સ્થાપ્ય ચતુર્થાંશેન વત્સકમ્

સુવર્ણમુખશૃઙ્ગાણિ ચન્દનાગુરુકાણિ ચ ॥
પ્રશસ્તપત્રશ્રવણાં તિલપાત્રોપરિ ન્યસેત્

મુખં ગુડમયં તસ્યા જિહ્વાં શર્કરયા તથા ॥
ફલપ્રશસ્તદશનાં મુક્તાફલમયેક્ષણામ્

ઇક્ષુપાદાં દર્ભરોમાં સિતકમ્બલસંવૃતામ્ ॥
તામ્રપૃષ્ઠાં કાંસ્યદોહાં પટ્ટસૂત્રમયીં શુભામ્

પુચ્છં ચ નૃપશાર્દૂલ નવનીતમયસ્તનીમ્॥
સ્વર્ણશૃઙ્ગીં રૌપ્યખુરાં પઞ્ચરત્નસમન્વિતામ્

ચત્વારિ તિલપાત્રાણિ ચતુર્દિક્ષ્વપિ વિન્યસેત્ ॥
સપ્તધાન્યયુતં પાત્રે દિક્ષુ દિક્ષુ ચ વિન્યસેત્

એવં લક્ષણસંયુક્તાં ક્ષીરધેનું પ્રકલ્પયેત્ ॥
આચ્છાદ્ય વસ્ત્રયુગ્મેન ગન્ધપુષ્પૈઃ સમર્ચયેત્

ધૂપદીપાદિકં કૃત્વા બ્રાહ્મણાય નિવેદયેત્ ॥
વસ્ત્રાદિભિરલંકૃત્ય મુદ્રિકાકર્ણકુણ્ડલૈઃ

પાદુકોપાનહૌ છત્રં દત્ત્વા દાનં સમર્પયેત્ ॥
દદ્યાદનેન મન્ત્રેણ ક્ષીરધેનું પ્રયત્નતઃ

આપ્યાયસ્વેતિ મન્ત્રેણ વેદોક્તેન વિધાનતઃ ॥
આશ્રયઃ સર્વભૂતાનામિત્યાદિ નરપુઙ્ગવ

આપ્યાયસ્વેતિ મન્ત્રેણ ક્ષીરધેનું પ્રસાદયેત્ ॥
પ્રતિગ્રાહી પઠેન્મન્ત્રમેષ દાનવિધિઃ સ્મૃતઃ

દીયમાનાં પ્રપશ્યન્તિ તે યાન્તિ પરમાં ગતિમ્ ॥
એતાં હેમસહસ્રેણ શતેનાથ સ્વશક્તિતઃ

દત્વા ધેનું મહારાજ શૃણુ તસ્યાપિ યત્ફલમ્ ॥
ષષ્ટિવર્ષસહસ્રં તુ ઇન્દ્રલોકે મહીયતે

પિત્રાદિભિશ્ચ સહિતો બ્રહ્મણો ભવનં વ્રજેત્ ॥
દિવ્યં વિમાનમારૂઢો દિવ્યસ્રગનુલેપનઃ

ક્રીડિત્વા સુચિરં કાલં વિષ્ણુલોકં સ ગચ્છતિ ॥
દ્વાદશાદિત્યસંકાશે વિમાનવરમણ્ડિતે

ગીતવાદિત્રનિર્ઘોષૈરપ્સરોભિશ્ચ સેવિતે ॥
તત્રોષ્ય વિષ્ણોર્ભવને વિષ્ણુસાયુજ્યમાપ્નુયાત્ ॥૧૮।
યં ઇમં શૃણુયાદ્રાજન્પઠેદ્વા ભક્તિભાવતઃ॥
સર્વપાપવિનિર્મુક્તો વિષ્ણુલોકં સ ગચ્છતિ

ઇતિ શ્રીવરાહપુરાણે શ્વેતવિનીતાશ્વાપોખ્યાને ક્ષીરધેનુદાનવિધિર્નામ પઞ્ચાધિકશતતમોઽધ્યાયઃ