સુશ્રુતસંહિતા · અધ્યાય 6.36

અથાતો નૈગમેષપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

બિલ્વાગ્નિમન્થપૂતીકાઃ કાર્યાઃ સ્યુઃ પરિષેચને।
સુરા સબીજં ધાન્યામ્લં પરિષેકે ચ શસ્યતે॥

પ્રિયઙ્ગુસરલાનન્તાશતપુષ્પાકુટન્નટૈઃ।
પચેત્તૈલં સગોમૂત્રૈર્દધિમસ્ત્વમ્લકાઞ્જિકૈઃ॥

પઞ્ચમૂલદ્વયક્વાથે ક્ષીરે મધુરકેષુ ચ।
પચેદ્ઘૃતં ચ મેધાવી ખર્જૂરીમસ્તકેઽપિ વા॥

વચાં વયઃસ્થાં ગોલોમીં જટિલાં ચાપિ ધારયેત્।
ઉત્સાદનં હિતં ચાત્ર સ્કન્દાપસ્મારનાશનમ્॥

સિદ્ધાર્થકવચાહિઙ્ગુકુષ્ઠં ચૈવાક્ષતૈઃ સહ।
ભલ્લાતકાજમોદાશ્ચ હિતમુદ્ધૂપનં શિશોઃ॥

મર્કટોલૂકગૃધ્રાણાં પુરીષાણિ નવગ્રહે।
ધૂપઃ સુપ્તે જને કાર્યો બાલસ્ય હિતમિચ્છતા॥

તિલતણ્ડુલકં માલ્યં ભક્ષ્યાંશ્ચ વિવિધાનપિ।
કુમારપિતૃમેષાય વૃક્ષમૂલે નિવેદયેત્॥

અધસ્તાદ્વટવૃક્ષસ્ય સ્નપનં ચોપદિશ્યતે।
બલિં ન્યગ્રોધવૃક્ષેષુ તિથૌ ષષ્ઠ્યાં નિવેદયેત્॥

અજાનનશ્ચલાક્ષિભ્રૂઃ કામરૂપી મહાયશાઃ।
બાલં બાલપિતા દેવો નૈગમેષોઽભિરક્ષતુ॥