સુશ્રુતસંહિતા · અધ્યાય 6.33

અથાતોઽન્ધપૂતનાપ્રસિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

તિક્તકદ્રુમપત્રાણાં કાર્યઃ ક્વાથોઽવસેચને।
સુરા સૌવીરકં કુષ્ઠં હરિતાલં મનઃશિલા॥

તથા સર્જરસશ્ચૈવ તૈલાર્થમુપદિશ્યતે।
પિપ્પલ્યઃ પિપ્પલીમૂલં વર્ગો મધુરકો મધુ॥

શાલપાર્ણી બૃહત્યૌ ચ ઘૃતાર્થમુપદિશ્યતે।
સર્વગન્ધૈઃ પ્રદેહશ્ચ ગાત્રેષ્વક્ષ્ણોશ્ચ શીતલૈઃ॥

પુરીષં કૌક્કુટં કેશાંશ્ચર્મ સર્પત્વચં તથા।
જીર્ણાં ચ ભિક્ષુસંઘાટીં ધૂમનાયોપકલ્પયેત્॥

કુક્કુટીં મર્કટીં શિમ્બીમનન્તાં ચાપિ ધારયેત્।
માંસમામં તથા પક્વં શોણિતં ચ ચતુષ્પથે॥

નિવેદ્યમન્તશ્ચ ગૃહે શિશો રક્ષાનિમિત્તતઃ।
શિશોશ્ચ સ્નપનં કુર્યાત્ સર્વગન્ધોદકૈઃ શુભૈઃ॥

કરાલા પિઙ્ગલા મુણ્ડા કષાયામ્બરવાસિની।
દેવી બાલમિમં પ્રીતા સંરક્ષત્વન્ધપૂતના॥