સુશ્રુતસંહિતા · અધ્યાય 6.30

અથાતઃ શકુનીપ્રતીષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

શકુન્યભિપરીતસ્ય કાર્યો વૈદ્યેન જાનતા।
વેતસામ્રકપિત્થાનાં નિષ્ક્વાથઃ પરિષેચને॥

કષાયમધુરૈસ્તૈલં કાર્યમભ્યઞ્જને શિશોઃ।
મધુકોશીરહ્રીબેરસારિવોત્પલપદ્મકૈઃ॥

રોધ્રપ્રિયઙ્ગુમઞ્જિષ્ઠાગૈરિકૈઃ પ્રદિહેચ્છિશુમ્।
વ્રણેષૂક્તાનિ ચૂર્ણાનિ પથ્યાનિ વિવિધાનિ ચ॥

સ્કન્દગ્રહે ધૂપનાનિ તાનીહાપિ પ્રયોજયેત્।
શતાવરીમૃગૈર્વારુનાગદન્તીનિદિગ્ધિકાઃ॥

લક્ષ્મણાં સહદેવાં ચ બૃહતીં ચાપિ ધારયેત્।
તિલતણ્ડુલકં માલ્યં હરિતાલં મનઃશિલા॥

બલિરેપ કરઞ્જેષુ નિવેદ્યો નિયતાત્મના।
નિષ્કુટે ચ પ્રયોક્તવ્યં સ્નાનમસ્ય યથાવિધિ॥

સ્કન્દાપસ્મારશમનં ઘૃતં ચાપીહ પૂજિતમ્।
કુર્યાચ્ચ વિવિધાં પૂજાં શકુન્યાઃ કુસુમૈઃ શુભૈઃ॥

અન્તરીક્ષચરા દેવી સર્વાલઙ્કારભૂષિતા।
અયોમુખી તીક્ષ્ણતુણ્ડા શકુની તે પ્રસીદતુ॥

દુર્દર્શના મહાકાયા પિઙ્ગાક્ષી ભૈરવસ્વરા।
લમ્બોદરી શઙ્કુકર્ણી શકુની તે પ્રસીદતુ॥