સુશ્રુતસંહિતા · અધ્યાય 6.29

અથાતઃ સ્કન્દાપસ્મારપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

બિલ્વઃ શિરીષો ગોલોમી સુરસાદિશ્ચ યો ગણઃ।
પરિષેકે પ્રયોક્તવ્યઃ સ્કન્દાપસ્મારશાન્તયે॥

સર્વગન્ધવિપક્વં તુ તૈલમભ્યઞ્જને હિતમ્।
ક્ષીરવૃક્ષકષાયે ચ કાકોલ્યાદૌ ગણે તથા॥

વિપક્તવ્યં ઘૃતં ચાપિ પાનીયં પયસા સહ।
ઉત્સાદનં વચાહિઙ્ગુયુક્તં સ્કન્દગ્રહે હિતમ્॥

ગૃધ્રોલૂકપુરીષાણિ કેશા હસ્તિનખા ઘૃતમ્।
વૃક્ષભસ્ય ચ રોમાણિ યોજ્યાન્યુદ્ધૂપનેઽપિ ચ॥

અનન્તાં કુક્કુટીં બિમ્બીં મર્કટીં ચાપિ ધારયેત્।
પક્વાપક્વાનિ માંસાનિ પ્રસન્ના રુધિરં પયઃ॥

ભૂતૌદનો નિવેદ્યશ્ચ સ્કન્દાપસ્મારિણેઽવટે।
ચતુષ્પથે ચ કર્તવ્યં સ્નાનમસ્ય યતાત્મના॥

સ્કન્દાપસ્મારસંજ્ઞો યઃ સ્કન્દસ્ય દયિતઃ સખા।
વિશાખસંજ્ઞશ્ચ શિશોઃ શિવોઽસ્તુ વિકૃતાનનઃ॥