સુશ્રુતસંહિતા · અધ્યાય 6.31

અથાતો રેવતીપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

અશ્વગન્ધા ચ શૃઙ્ગી ચ સારિવા સપુનર્નવા।
સહે તથા વિદારી ચ કષાયાઃ સેચને હિતાઃ॥

તૈલમભ્યઞ્જને કાર્યં કુષ્ઠે સર્જરસેઽપિ ચ।
પલઙ્કષાયાં નલદે તથા ગિરિકદમ્બકે॥

ધવાશ્વકર્ણકકુભધાતકીતિન્દુકીષુ ચ।
કાકોલ્યાદિગણે ચૈવ પાનીયં સર્પિરિષ્યતે॥

કુલત્થાઃ શઙ્ખચૂર્ણં ચ પ્રદેહઃ સાર્વગન્ધિકઃ।
ગૃધ્રોલૂકપુરીષાણિ યવા યવફલો ઘૃતમ્॥

સન્ધ્યયોરુભયોઃ કાર્યમેતદુદ્ધૂપનં શિશોઃ।
વરુણારિષ્ટકમયં રુચકં સૈન્દુકં તથા॥

સતતં ધારયેચ્ચાપિ કૃતં વા પૌત્રજીવિકમ્।
શુક્લાઃ સુમનસો લાજાઃ પયઃ શાલ્યોદનં તથા॥

બલિર્નિવેદ્યો ગોતીર્થે રેવત્યૈ પ્રયતાત્મના।
સઙ્ગમે ચ ભિષક્ સ્નાનં કુર્યાદ્ધાત્રીકુમારયોઃ॥

નાનાવસ્ત્રધરા દેવી ચિત્રમાલ્યાનુલેપના।
ચલત્કુણ્ડલિની શ્યામા રેવતી તે પ્રસીદતુ॥

ઉપાસતે યાં સતતં દેવ્યો વિવિધભૂષણાઃ।
લમ્બા કરાલા વિનતા તથૈવ બહુપુત્રિકા।
રેવતી શુષ્કનામા યા સા તે દેવી પ્રસીદતુ॥