Sushruta Samhita · Chapter 6.30

athātaḥ śakunīpratīṣedhaṃ vyākhyāsyāmaḥ//

yathovāca bhagavān dhanvantariḥ//

śakunyabhiparītasya kāryo vaidyena jānatā/
vetasāmrakapitthānāṃ niṣkvāthaḥ pariṣecane//

kaṣāyamadhuraistailaṃ kāryamabhyañjane śiśoḥ/
madhukośīrahrīberasārivotpalapadmakaiḥ//

rodhrapriyaṅgumañjiṣṭhāgairikaiḥ pradihecchiśum/
vraṇeṣūktāni cūrṇāni pathyāni vividhāni ca//

skandagrahe dhūpanāni tānīhāpi prayojayet/
śatāvarīmṛgairvārunāgadantīnidigdhikāḥ//

lakṣmaṇāṃ sahadevāṃ ca bṛhatīṃ cāpi dhārayet/
tilataṇḍulakaṃ mālyaṃ haritālaṃ manaḥśilā//

balirepa karañjeṣu nivedyo niyatātmanā/
niṣkuṭe ca prayoktavyaṃ snānamasya yathāvidhi//

skandāpasmāraśamanaṃ ghṛtaṃ cāpīha pūjitam/
kuryācca vividhāṃ pūjāṃ śakunyāḥ kusumaiḥ śubhaiḥ//

antarīkṣacarā devī sarvālaṅkārabhūṣitā/
ayomukhī tīkṣṇatuṇḍā śakunī te prasīdatu//

durdarśanā mahākāyā piṅgākṣī bhairavasvarā/
lambodarī śaṅkukarṇī śakunī te prasīdatu//