સુભાષિતરત્નકોશ · અધ્યાય 3

અઙ્ગામોદ-સમોચ્છલદ્-ઘૃણિ-પતદ્-ભૃઙ્ગાવલી-માલિત સ્ફૂર્જલ્-લઞ્છન-સૂત્ર-ગુમ્ફિત-મિલન્-નીલોત્પલ-શ્રીર્ ઇવ
નિર્યત્-પાદ-નખોન્મુખાંશુ-વિસર-સ્રગ્-દન્તુરઃ સ્મર્યતાં મઞ્જુશ્રીઃ સુર-મુક્ત-મઞ્જરિ-શિખા-વર્ષૈર્ ઇવાભ્યર્ચિતઃ ॥

શસ્ત્રોદ્યદ્-બાહુ-દેહ-સ્ફુરદ્-અનલ-મિલદ્-ધૂમ-કલ્પાન્ત-પુઞ્જઃ શૃઙ્ગાન્તાનન્ત-વિશ્વાર્પિત-મહિષ-શિરો-મક્ષિકા-લીવિ-કલ્પઃ
ત્રાસ-ત્યક્ત-સ્વ-પર્ણાસ્તૃત-સુર-ઘૃણયેવાલસત્-પાદ-વૃન્દસ્ તારૌઘ-પ્લુષ્ટ-ભાનુર્ જગદ્ અવતુ નટદ્-ભૈરવાત્મા કુમારઃ ॥

ખડ્ગી સ-શબ્દમ્ અથ પુસ્તકવાન્ સ-ચિન્તં બાલઃ સ-ખેલમ્ અભિરામ-તમઃ સ-કામમ્
નાના-વિધં સુર-વધૂભિર્ ઇતીક્ષિતો વઃ પાયાચ્ ચિરં સુગત-વંશ-ધરઃ કુમારઃ ॥

મુગ્ધાઙ્ગુલી-કિશલયાઙ્ઘ્રિ-સુવર્ણ-કુમ્ભ વાન્તેન કાન્તિ-પયસા ધુસૃણારુણેન
યો વન્દમાનમ્ અભિષિઞ્ચતિ ધર્મ-રાજ્યે જાગર્તુ વો હિત-સુખાય સ મઞ્જુ-વજ્રઃ ॥

અમીષાં મઞ્જુશ્રી-રુચિર-વદન-શ્રી-કૃત-રુચાં શ્રુતં નો નામાપિ ક્વ નુ ખલુ હિમાંશુ-પ્રકૃતયઃ
મમાભ્યર્ણે ધાર્ષ્ટ્યાચ્ ચરતિ પુનર્ ઇન્દીવરમ્ ઇતિ ક્રુધેવેદં પ્રાન્તારુણમ્ અવતુ વો લોચન-યુગમ્ ॥