સ્મરદીપિકા · શ્લોક 202-221

અથ શુદ્ધં તથાશુદ્ધં સમાસાદિતતત્ક્રિયઃ ।
મન્ત્રો ગુરુમુખાલ્ લબ્ધઃ સિધ્યત્ય્ અત્ર ન સંશયઃ

ત્રિચામુણ્ડે ઇતિ પદં તતઃ ક્વનુ ક્વનુ સ્મૃતમ્ ।
તતઃ પદં છનુ છનુ સ્વકીયં વશમ્ આનયેત્

સાધ્યાનામ દ્વિતીયાન્તં દત્ત્વા સ્વાહેતિ યોજયેત્ ।
સામાન્યેનામુકીનામજપં કૃત્વા વશં નયેત્

હ્રીં સ્વાહેતિ મન્ત્રેણ સાધ્યાનામાન્વિતેન ચ ।
સપ્તાભિમન્ત્રિતં પુષ્પં યૈવ ગૃહ્ણાતિ સા વશા

કાકજિહ્વાલિપક્ષૌ ચ સુવર્ણમલમ્ અશ્રુ ચ ।
રક્તં રતેશ્ ચ લેપેન વશીકુર્યુર્ મનીષિણઃ

સમ્ભોગજં વચાબીજં જિહ્વા ચાર્કદલં સિતમ્ ।
સંચૂર્ણ્યાઞ્જિતનેત્રાણાં ભાર્યાપિ વશતાં નયેત્

હરિતાલં મનઃશિલા રક્તચન્દનમ્ એતત્ સર્વં ચૂર્ણીકૃત્ય ।
પુષ્પેણ સહ યસ્યાઃ શિરસિ દીયતે સા પશુવદ્ વશ્યા ભવતિ ।
પેચકસ્ય હૃદયં કુઙ્કુમેન સહ સમ્પિષ્ય તિલકં કુર્યાત્ તેન લોકો વશ્યો ભવતિ

અશ્વગન્ધા વચા કુષ્ઠં બલા નાગબલા તથા ।
માહિષં નવનીતં ચ ગજપિપ્પલીસંયુતમ્

પિષ્ટ્વા તેષાં વિલેપેન ગાઢીકરણમ્ ઉત્તમમ્ ।
સમ્પિષ્ટં છાગમૂત્રેણ શૂકશિમ્બીસમુદ્ભવમ્

નૂનં તસ્ય પ્રલેપેન લિઙ્ગં લૌહોપમં ભવેત્ ।
નીલોત્પલસિતામ્ભોજકેસરં મધુ શર્કરા

અમીષાં નાભિલેપેન રમતે કામુકશ્ ચિરમ્ ।
ક્ષીરેણ કમલં પિષ્ટ્વા સલિલં ગુટિકાકૃતમ્

ઉપસ્થે નિહિતં કુર્યાત્ પ્રકીર્ણમ્ અપિ ચ ક્વચિત્ ।
અસ્થિ કૃષ્ણબિડાલસ્ય દક્ષિણપાર્શ્વસમ્ભવમ્

બદ્ધં કટિતટે બીજં વિબન્ધં કુરુતે ધ્રુવમ્ ।
સપ્તપર્ણસ્ય બીજં હિ સ્તમ્ભયેચ્ છુક્રમ્ આત્મગમ્

સિતશરપુંષામૂલં પારદસહિતં કરે ધૃત્વા ।
કરઞ્જબીજં મધ્યસ્થં સમૂલં બન્ધયેદ્ બીજમ્

કેતકીભૂમિલતાસનમૂલીબન્ધવિપક્વં કુસુમ્ભતૈલમ્ ।
પાદતલે લેપેનાવશ્યં બીજસ્તમ્ભં નયતિ પુંસામ્

માહિષદધિસહદેવીતિલમધુસિતપદ્મકેસરં મિલિતમ્ ।
ચૂર્ણં નાભિવિલેપાદ્ વીર્યસ્તમ્ભં કરોત્ય્ અવશ્યમ્

બૃહત્કરઞ્જબીજસ્થં પારદં પદ્મવેષ્ટિતમ્ ।
મુખે ક્ષિપ્તમ્ ઇદં બીજં સ્તમ્ભયત્ય્ એવ નિશ્ચિતમ્

કુર્યાદ્ આદૌ પરિચ્છેદં મર્દનં ચ વિશેષતઃ ।
સપ્તાહં ભાવયેન્ માષં નિસ્તુષં વિદલં તતઃ

નાલિકેરોદકેનાથ પુનસ્ તેષાં ચ ભાવના ।
તત્પશ્ચાદ્ ઘનભ્રષ્ટં ચ ભક્ષયેત્ ક્ષીરસાધિતમ્

વધૂશતસહસ્રાણિ કામી કામયતે તતઃ