સ્કન્દપુરાણ: રેવાખણ્ડ (સંશોધિત પાઠ) · અધ્યાય 95

ઇતિ શ્રીસ્કન્દપુરાણે રેવાખણ્ડે આદિત્યેશ્વરતીર્થકીર્તનો નામ ચતુર્નવતિતમો ઽધ્યાયઃ ॥
ર્ક્સ્ અધ્યાય 95
માર્કણ્ડેય ઉવાચ:
તતો ગચ્છેત્ તુ રાજેન્દ્ર કરઞ્જેશ્વરમ્ ઉત્તમમ્ ।
યત્ર તે નિહતાસ્ તાત દાનવાસ્ તત્પદાનુગૈઃ

ઇન્દ્રાદ્યૈશ્ ચૈવ સંહૃષ્ટૈઃ સ્તુતો યજ્ઞઃ સુબુદ્ધિભિઃ ।
તેષાં યે પુત્રપૌત્રાશ્ ચ પૂર્વવૈરમનુસ્મરન્

તત્ર સ્થાસ્ તુ સુરાઃ સર્વે સ્થાપયિત્વા હ્ય્ ઉમાપતિમ્ ।
ઇન્દ્રચન્દ્રયમાઃ સૂર્યઃ સ્થાપયિત્વેષ્ટસિદ્ધયે

હૃષ્ટપુષ્ટાઃ સુરાઃ સર્વે જગ્મુર્ આકાશસસ્થિતાઃ ।
દાનવાનાં મહાભાગ કરોટ્યઃ પતિતા યતઃ

તદા પ્રભૃતિ તત્ તીર્થં કરોટીતિ મહીપતે ।
વિખ્યાતં ભારતે લોકે ભૂપૃષ્ઠે પાણ્ડુનન્દન

અષ્ટમ્યાં ચ ચતુર્દશ્યાં શુભે પક્ષે તુ ભક્તિતઃ ।
ઉપોષ્ય શૂલિનશ્ ચાગ્રે રાત્રૌ કુર્વીત જાગરમ્

તત્કથાલાપસંયુક્તં વેદોદ્ગીતં તથૈવ ચ ।
પ્રભાતે વિમલે પ્રાપ્તે સ્થાણું સમ્પૂજ્ય યત્નતઃ

પઞ્ચામૃતેન સંસ્નાપ્ય શ્રીખણ્ડેનૈવ ચાર્ચયેત્ ।
શતપલ્લવપુષ્પૈશ્ ચ પૂજયેચ્ ચ પ્રયત્નતઃ

બહુરૂપં જપેન્મન્ત્રં દક્ષિણાં તુ પ્રદાય ચ ।
તત્ફલં સમવાપ્નોતિ આદિત્યેશ્વર નાર્મદે

શ્રુતતીર્થપ્રભાવં વૈ યઃ પઠેચ્ ચ નરાધિપ ।
તત્સર્વં કથયિષ્યામિ ભક્ત્યા તવ મહીપતે

યથોક્તેન વિધાનેન નાભિમાત્રે જલે સ્થિતઃ ।
શ્રાદ્ધં તત્રૈવ પ્રેતાય કારયેત જિતેન્દ્રિયઃ

વિવિધૈરગ્રપાઠૈશ્ ચ વેદાધ્યયનતત્પરૈઃ ।
ગોહિરણ્યેન સમ્પૂજ્ય વસ્ત્રતામ્બૂલભોજનૈઃ

ભૂષણૈઃ પટ્ટદાનૈશ્ ચ બ્રાહ્મણં પાણ્ડુનન્દન ।
તસ્મિંસ્ તીર્થે તુ સમ્પૂજ્ય કામિકં ભોજનં દદેત્

ભવેત્ કોટિગણં તસ્ય નાત્ર કાર્યા વિચારણા ।
તત્ર તીર્થે યથા ભક્ત્યા ત્યજેદ્ દેહં ચ માનદ

તસ્ય તીર્થે ભવેત્ પુણ્યં તચ્ છૃણુષ્વ નરાધિપ ।
યાવદ્ અસ્થિમનુષ્યસ્ય તિષ્ઠતે નર્મદામ્ભસિ

તાવદ્ વસતિ ધર્માત્મા શિવલોકે સુદુર્લભે ।
તતઃ કાલાત્ પ્રચ્યુતશ્ ચ દેવો માનુષ્યતાં ગતઃ

કોટિધ્વજપતિઃ શ્રીમાન્ જાયતે નાત્ર સંશયઃ ।
સર્વધર્મસમાયુક્તો મેધાવી જીવપુત્રકઃ

વિખ્યાતશ્ ચ ધરાપૃષ્ઠે દીર્ઘાયુર્ માનવો ભવેત્ ।
ઇન્દ્રચન્દ્રયમૈઃ રુદ્રૈર્ આદિત્યૈર્ વસુભિસ્ તથા

વિશ્વેદેવૈસ્ તથા સર્વૈઃ સ્થાપિતાસ્ ત્રિદશેશ્વરઃ ।
નર્મદોત્તરકૂલે તુ લોકાનાં હિતકામ્યયા

માનવઃ પ્રેતમ્ ઉદ્દિશ્ય પ્રાસાદં કારયેત્ તુ યઃ ।
તસ્મિન્ નરવરશ્રેષ્ઠઃ સ સદ્ગતિમ્ અવાપ્નુયાત્

ન્યાયોપાર્જિતદ્રવ્યેણ યઃ શ્રાદ્ધં કુરુતે ઽત્ર વૈ ।
બ્રાહ્મણાઃ ક્ષત્રિયા વૈશ્યાઃ સ્ત્રિયઃ શૂદ્રાશ્ ચ સત્કૃતાઃ

તે ઽપિ યાન્તિ પરે લોકે શાઙ્કરે સુરપૂજિતે ।
યઃ શૃણોતિ નરો ભક્ત્યા માહાત્મ્યં તીર્થજં નૃપ

તસ્ય પાપં પ્રણશ્યેત ષણ્માસેન તુ યત્કૃતમ્ ।
માર્કણ્ડેય ઉવાચ:
તતો ગચ્છેત્ તુ રાજેન્દ્ર કુમારેશ્વરમ્ ઉત્તમમ્

પ્રસિદ્ધં સર્વતીર્થાનામ્ અગસ્ત્યેશ્વરમ્ ઉત્તમમ્ ।
ષણ્મુખેન તપસ્તપ્તં સર્વપાતકનાશનમ્

સ્નાનં ચ પરયા ભુક્ત્યા સિદ્ધિઃ પ્રાપ્તા નરાધિપ ।
દેવસૈન્યાધિપો રાજન્ સર્વશત્રુવિમર્દનઃ

ઉગ્રતેજા મહાત્મા ચ સંજાતસ્ તીર્થસેવનાત્ ।
તદા પ્રભૃતિ તત્તીર્થં વિખ્યાતં નર્મદાતટે

તસ્મિંસ્ તીર્થે તુ યો ભક્ત્યા એકચિત્તો જિતેન્દ્રિયઃ ।
અષ્ટમ્યાં ચ ચતુર્દશ્યાં કાર્ત્તિકસ્ય વિશેષતઃ

સ્નાપયેદ્ ગિરિજાનાથં દધિદુગ્ધેન સર્પિષા ।
ગીતં તત્ર પ્રકર્તવ્યં પિણ્ડદાનં યથાવિધિ

બ્રાહ્મણૈઃ શ્રોત્રિયૈઃ પાર્થ ષટ્કર્મનિરતૈઃ સદા ।
યત્કિંચિદ્ દીયતે તત્ર અક્ષયં પાણ્ડુનન્દન

સર્વતીર્થાત્ પરં તીર્થં નિર્મિતં શશિના નૃપ ।
એતત્ તે સર્વમ્ આખ્યાતં કુમારેશ્વરજં ફલમ્

કુમારદર્શનાત્ પુણ્યં પ્રાપ્યતે પાણ્ડુનન્દન ।
મૃતઃ સ્વર્ગમ્ અવાપ્નોતિ સત્યમ્ ઈશ્વરભાષિતમ્

તતો ગચ્છેત્ તુ રાજેન્દ્ર અગસ્ત્યેશ્વરમ્ ઉત્તમમ્ ।
તત્ર સિદ્ધો મહાભાગ અગસ્ત્યો મુનિપુઙ્ગવઃ

યુધિષ્ઠિર ઉવાચ:
કથં સિદ્ધો મહાભાગ અગસ્ત્યો મુનિપુઙ્ગવઃ ।
કુમ્ભોદ્ભવો મહાભાગ મિત્રાવરુણસમ્ભવઃ

નર્મદાતટમ્ આશ્રિત્ય તત્સર્વં કથયસ્વ મે ।
માર્કણ્ડેય ઉવાચ:
મહાપ્રશ્નો મહારાજ પરિપૃષ્ટશ્ ચ યસ્ ત્વયા

તત્ તે ઽહં સમ્પ્રવક્ષ્યામિ શૃણુષ્વૈકમનાઃ સદા ।
પુરાકૃતયુગે તાત ભારાર્તા જગતી સ્થિતા

વિજ્ઞપ્તુકામા દેવેશં નાકપૃષ્ઠં ગતા નૃપ ।
ઇન્દ્રાય કથયામાસ દૈત્યભારાર્દિતં જગત્

ઇન્દ્ર ઉવાચ:
બ્રહ્મા ચ જગતઃ કર્તા તવૈવ મમ સુન્દરિ ।
બ્રહ્મલોકં ગમિષ્યામિ મન્ત્રિભિર્દૈવતૈઃ સહ

તતઃ સર્વે ગતાસ્ તત્ર યત્રાસૌ કમલાસનઃ ।
બૃહસ્પતિર્ ઉવાચ:
બ્રહ્મન્ નિર્લમ્બના જાતા દૈત્યભારાદ્ વસુન્ધરા

અસહન્તી તુ તં ભારં યાતિ દેવી રસાતલમ્ ।
પ્રતીકારં પૃથિવ્યાશ્ ચ કુરુષ્વ જગતીપતે

સર્વસત્ત્વોપકારાય સૃષ્ટિસ્ ત્વયિ જગત્પતે ।
પિતામહ ઉવાચ:
કર્તા ઽસ્મિ સર્વજગતામ્ અયોનિકલશોદ્ભવઃ

અગસ્ત્યસ્ તપસાં રાશિઃ શક્તો દૈત્યનિવારણે ।
એકતઃ સર્વદેવાનાં બલં તેજશ્ ચ જાયતે

એકતો ઋષિમુખ્યસ્ય જાયતે નાત્ર સંશયઃ ।
બ્રહ્મણો વચનં શ્રુત્વા સર્વે દેવાઃ સવાસવાઃ

તથૈવ કારણં ચાન્યત્ કથયન્તિ સ્મ ભારત ।
વિજ્ઞાતં દેવદેવેશ વિશ્વામિત્રચિકીર્ષિતમ્

ત્રિશઙ્ક્વર્થે ચ યજ્ઞો ઽયં વિશ્વામિત્રેણ સાધિતઃ ।
સ્પર્ધયા ચ વશિષ્ઠસ્ય યજ્ઞાઙ્ગાનિ સમાસૃજત્

સ્પર્ધયા સૃજતાકાશં ભૂમિં ચાન્યાં સમાસૃજત્ ।
યથા તુ હિમવચ્ છૈલઃ પૂર્વાપરમહોદધિમ્

વ્યાપ્યૈવ સંસ્થિતો ભૂમ્યાં દેવકાર્યાર્થસાધકઃ ।
તથાસૌ સ્પર્ધતે વિન્ધ્યઃ સ્પર્ધયા કૌશિકસ્ય ચ

તિષ્ઠન્તિ દેવકાર્યાણિ કૌશિકેન સુરેશ્વર ।
કાર્યદ્વયપ્રતીકારં ચિન્તય સ્વજગદ્ગુરો

બ્રહ્મોવાચ:
એકસ્ ત્વ્ અસ્ય ગુરુર્ વિપ્રો હ્ય્ અગસ્ત્યો મુનિપુઙ્ગવઃ ।
ઉત્પથે વર્તમાનસ્ય કૌશિકસ્ય દુરાસદઃ

અગસ્ત્યો માર્ગભેત્તા વૈ ભવિષ્યતિ ન સંશયઃ ।
ગુરુર્ આત્મવતાં શાસ્તા સર્વેષાં વૈ ન સંશયઃ

વર્ધનં પર્વતસ્યાસ્ય દેવમાર્ગપ્રવર્તનમ્ ।
શાસઃ કૌશિકવિપ્રસ્ય વસુધાયાં સમન્તતઃ

ક્ષમઃ સમસ્તકાર્યાણાં મિત્રાવરુણનન્દનઃ ।
એવં તુ નિશ્ચયં કૃત્વા દેવાઃ સેન્દ્રપિતામહાઃ

યયુર્વસુન્ધરાસાર્ધં હિમવન્તં નગેશ્વરમ્ ।
દદૃશુસ્ તે સ્થિતં વિપ્રં ધ્યાયમાનં ચ યોગિનમ્

સુદૃઢં નિશ્ચલધ્યાનં મોક્ષમાર્ગનિયામકમ્ ।
તંદૃષ્ટ્વા સ્તોતુમ્ આરબ્ધાઃ સેન્દ્રચન્દ્રાઃ સવારુણાઃ

દેવા ઊચુઃ:
જયમ્ ઇચ્છસ્વ દેવાનાં ભગવન્ કલશોદ્ભવ ।
પ્રસાદસુમુખો ભૂત્વા દેવાનાં ભયમાગતમ્

અગસ્ત્ય ઉવાચ:
કિં કાર્યં તુ સમુત્પન્નં યેન દૂરં સમાગતાઃ ।
એકાન્તવાસિનં નિત્યં તં માં યૂયં સુરાશ્ ચ ભોઃ

ઉચ્યતાં યન્ મયા કાર્યં તત્સર્વં કરવાણ્ય્ અહમ્ ।
તતો મન્દાનિલોદ્ધૂતકમલાકરશોભિના

ગુરું નેત્રસહસ્રેણ પ્રેરયામાસ વૃત્રહા ।
વાક્પતિર્ ઉવાચ:
ત્વયા પૂર્વં મહાભાગ દેવકાર્યાર્થસિદ્ધયે

સમુદ્રાઃ કર્ષિતાઃ સર્વે ઈશ્વરેણ યથા જગત્ ।
વિધ્વસ્તાસ્ત્રિદશાઃ સર્વે દાનવૈર્ બલદર્પિતૈઃ

જિતા દેવાસ્ તુ તે સર્વે દાનવેભ્યઃ પરાઙ્મુખાઃ ।
તેષાં વરાપહારાય સમુદ્રાઃ શોષિતાઃ પુરા

સામ્પ્રતં દુઃખિતા ધાત્રી પશ્યેમાં ભૂતધારિણીમ્ ।
દૈત્યભારેણ દુઃખાર્તા ભૂમિર્જાતા રસાતલમ્

ગન્તવ્યં દક્ષિણામાશાં તપોરાશે દ્વિજોત્તમ ।
નર્મદોદધિમર્યાદાં કુરુ પુણ્યાં મહાદ્વિજ

વૃદ્ધિં વિન્ધ્યનગસ્યાપિ દેવકાર્યં સમુદ્ધર ।
કૌશિકો ઽથ કનીયાંસ્ તે ય ઉન્માર્ગપ્રવર્તકઃ

અગસ્ત્ય ઉવાચ:
દેવકાર્યં કરિષ્યામિ સુખં તિષ્ઠ વસુન્ધરે ।
ગચ્છામિ દક્ષિણામ્ આશાં શક્તઃ શિષ્યસ્ય વારણે

વર્ધનં પર્વતસ્યાસ્ય વારયામિ ન સંશયઃ ।
દેવા ઊચુઃ:
યામ્યાં ગત્વા સુરૈઃ સાર્ધં દ્રષ્ટવ્યો યં ન સંશયઃ

સિંહસ્થે ભાસ્કરે વિપ્ર યેન યાસ્યન્તિ ભક્તિતઃ ।
નશ્યતે ચ ધનં ધાન્યં તેષાં સૌખ્યં ન સંશયઃ

અધિકારાય દેવાનાં સ ચ દૃષ્ટો ભવિષ્યતિ ।
તત્પ્રતિજ્ઞાય ગીર્વાણાઃ સમં વસુધયા ગતાઃ

અગસ્ત્યં તપસાં રાશિં નિર્ગચ્છન્તઃ સમન્તતઃ ।
અગસ્ત્યપદવિક્ષેપાચ્ ચલિતા ચ વસુન્ધરા

મનોવેગેન સમ્પ્રાપ્તઃ કૌશિકો યત્ર તાપસઃ ।
કૌશિકો ઽપિ ગુરું દૃષ્ટ્વા સાષ્ટાઙ્ગં પ્રણિપત્ય ચ

ધન્યે ઽહં મુનિશાર્દૂલપ્રીતો ઽહં તવ દર્શનાત્ ।
અર્ઘપાત્રં સમાદાય દધ્યક્ષતસમન્વિતમ્

દૂર્વા ચ ચન્દનં પૂજ્યભક્ત્યા પાત્રે સમાહિતમ્ ।
ગુરુપાદપરિક્ષિપ્ત ઉવાચ મધુરં તદા

આદેશો દીયતાં તાત તવ પ્રેષ્યો દ્વિજોત્તમ ।
અગસ્ત્ય ઉવાચ:
દેવકાર્યવિઘાતં ચ કૌશિક ત્વં વિસર્જય

દેવકાર્યવિસૃષ્ટેન કર્મણા ન પ્રવર્તસે ।
યદિ તે નિશ્ચલા ભક્તિર્ વિશ્વામિત્ર મમોપરિ

તદા ત્વં વર્જયેઃ સર્વમ્ ઉન્માર્ગસ્ય પ્રવર્તનમ્ ।
વિશ્વામિત્ર ઉવાચ:
ગુરુર્ આત્મવતાં શાસ્તા રાજા શાસ્તા દુરાત્મનામ્

ઇહ પ્રચ્છન્નપાપાનાં શાસ્તા વૈવસ્વતો યમઃ ।
સ્પર્ધયા ચ વશિષ્ઠસ્ય ત્રિશઙ્કુર્મે સુયાચિતઃ

અદ્ય પ્રભૃતિ તત્ સર્વં ત્યક્તમ્ એવ દ્વિજોત્તમ ।
ઇત્યુક્તઃ પ્રયયૌ શીઘ્રં રેવાતીરં સુદુર્લભમ્

ઉત્તરં તટમ્ આસાદ્ય તપસ્ તત્ર સમારભત્ ।
નર્મદા ત્રિષુ લોકેષુ પવિત્રા પાપનાશિની

નિશ્ચયં પરમં કૃત્વા મિત્રાવરુણનન્દનઃ ।
શિલાતલે નિવિષ્ટસ્ તુ ચચાર વિપુલં તપઃ

વાયુભક્ષઃ સદા કાલં કુમ્ભયોનિર્ મહાતપાઃ ।
જ્ઞાતો ભક્તિયુતઃ શ્રેષ્ઠ ઈશ્વરેણ યુધિષ્ઠિર

પ્રત્યક્ષો દ્વાદશે વર્ષે સઙ્ગતઃ પાર્વતીપતિઃ ।
ઈશ્વર ઉવાચ:
સાધુ સાધુ મુનિશ્રેષ્ઠ તપસા દ્યોતિતં નભઃ

નિશ્ચયં તવ તુષ્ટો ઽસ્મિ મિત્રાવરુણનન્દન ।
વર્ષાયુતસહસ્રેણ નાન્યેષાં વરદો હ્ય્ અહમ્

અગસ્ત્ય ઉવાચ:
સંસારપલ્વલાતીતસૃષ્ટિજન્મવિવર્જિત ।
દુર્લક્ષ્યાસુરસઙ્ઘાનાં પ્રમથેશ નમો ઽસ્તુ તે

નન્દિસ્કન્દગણા દેવા વૃથા ક્લિશ્યન્તિ મોહિતાઃ ।
સનત્કુમારમુખ્યાશ્ ચ ઋષયઃ શંસિતવ્રતાઃ

ત્વદ્ રૂપં તે ન જાનન્તિ શમ્ભો નાથ નમો ઽસ્તુ તે ।
બ્રહ્માદ્યા દેવતાઃ સર્વે ધ્યાયન્તિ ત્વામ્ અહર્નિશમ્

નૈતે પશ્યન્તિ ત્વદ્ રૂપં ધાતર્દેવ નમો ઽસ્તુ તે ।
ઈશ્વર ઉવાચ:
પ્રસન્નસ્ તવ વિપ્રેન્દ્ર ઊર્ધ્વરેતસ્ ત્વ્ અયોનિજ

તવ ભક્તિગૃહીતો ઽહં પ્રસન્ન ઉમયા સહ ।
અગસ્ત્ય ઉવાચ:
યદિ તુષ્ટો ઽસિ દેવેશ યદિ દેયો વરો મમ

પ્રત્યક્ષો ભવ તીર્થે ઽસ્મિન્ યદિ સત્યં વરપ્રદઃ ।
અન્તર્જલે સદાકાલં ધર્માધ્યક્ષો મહેશ્વર

શિલાયાં ભવ નિત્યં ચ નર્મદાયોત્તરે તટે ।
દેવકાર્યસ્ય કર્તાહં ત્વત્પ્રસાદાજ્ જગત્પતે

તથેતિ ચોક્ત્વા વૃષવાહનો ઽપિ જગામ કૈલાસનગં નગેશઃ ।
અયોનિજો યોગબલેન યુક્તઃ પ્રવિદ્યયા લિઙ્ગબલાચ્ છિવસ્ય

જગામ દક્ષિણામ્ આશાં સુરસઙ્ઘૈર્ અભિષ્ટુતઃ ।
તપોવનં યથાપુણ્યં દેવદાનવસેવિતમ્

પ્રવિષ્ટો મુનિશાર્દૂલઃ પવિત્રં દેવકમ્બલમ્ ।
નિશ્ચલા સુષમાદેવી સંસ્થિતા ધરણી તથા

પુષ્પાણિ વવૃષુર્દેવા જયશબ્દં પુનઃ પુનઃ ।
યુધિષ્ઠિર ઉવાચ:
તસ્ય તીર્થસ્ય યત્પુણ્યં કથ્યતાં મુનિસુવ્રત

આદિમધ્યાવસાને ચ બ્રાહ્મણૈઃ સહ બાન્ધવૈઃ ।
પિતૄણાં સર્વતીર્થાનાં સર્વસત્ત્વોપકારકમ્

માર્કણ્ડેય ઉવાચ:
પિતૄન્ મોક્ષદં પ્રોક્તં સર્વકાલે જનાધિપ ।
શિવાખ્યાં કાર્ત્તિકે માસિ કૃષ્ણપક્ષે ચતુર્દશીમ્

ઉપોષ્ય યો નરો ભક્ત્યા કામક્રોધવિવર્જિતઃ ।
શમીતરું સમાસ્થાય રાત્રૌ કુર્વીત જાગરમ્

તત્કથાલાપસંયુક્તો ધર્માખ્યાનૈર્ દ્વિજૈઃ સહ ।
ગવાં ઘૃતેન દેવેશં રાત્રૌ ચ સ્નાપયેત્ પુનઃ

ઘટેનૈવ ઘટાર્ધેન તદર્ધેન સ્વશક્તિતઃ ।
ઘૃતેન બોધયેદ્ દીપં ઘૃતં વિપ્રાય દાપયેત્

પઞ્ચામૃતેન ગવ્યેન સ્નાપયેત્ પરમેશ્વરમ્ ।
પ્રભાતે પૂજયેદ્ વિપ્રાન્ સ્વદારનિરતાન્ સદા

વેદાભ્યસનશીલાંશ્ ચ પરદારવિવર્જિતાન્ ।
શૂદ્રસેવારતા નિત્યં ધૂર્તકર્મરતા જનાઃ

પતિતાઃ કૂટસાક્ષ્યેણ પ્રતિગ્રહરતાઃ સદા ।
વેદદ્વેષણશીલાશ્ ચ કુબ્જાશ્ ચ વિકલાઃ સદા

હીનાતિરિક્તગાત્રા યે દ્વિજાઃ શ્રાદ્ધે વિવર્જિતાઃ ।
વેદોક્તેન વિશુદ્ધાઙ્ગાઃ પૂજ્યા નિત્યં યુધિષ્ઠિર

ભૂમિદાનેન વસ્ત્રેણ કન્યાદાનૈર્ વિશેષતઃ ।
શ્રાદ્ધકાલેષુ યોગેષુ ભર્તવ્યા ભક્તિતત્પરૈઃ

ગોદાનં તત્ર કર્તવ્યં શ્રેયો ઽર્થમ્ આત્મનસ્ તથા ।
સવત્સાં ક્ષીરિણીં શુભ્રાં પુષ્ટાં વૈ શીલસંયુતામ્

કમ્બલં પરયા ભક્ત્યા પાદુકોપાનહૌ તથા ।
હિરણ્યરુક્મિણીં કન્થાં તામ્બૂલં ભોજનં તથા

ઘણ્ટાભરણશોભાઢ્યાં વસ્ત્રયુગ્માવગુણ્ઠિતામ્ ।
સ્વર્ણશૃઙ્ગીં રૌપ્યખુરીં કાંસ્યદોહેન સંયુતામ્

ઉચ્ચાર્ય પરયા ભક્ત્યા યાવદ્ આહૂતસંપ્લવમ્ ।
સર્વ કોટિગુણં પાર્થ શુભં વા યદિ વાશુભમ્

તીર્થાખ્યાનં ચ યો ભક્ત્યા પઠતે શૃણુતે ઽથવા ।
મુચ્યતે સર્વપાપેભ્યઃ શિવલોકે વસત્ય્ અપિ