સ્કન્દપુરાણ: રેવાખણ્ડ (સંશોધિત પાઠ) · અધ્યાય 91

ઇતિ શ્રીસ્કન્દપુરાણે રેવાખણ્ડે ચિત્રસેનકથાવર્ણનો નામ નવતિતમો ઽધ્યાયઃ ॥
ર્ક્સ્ અધ્યાય 91
રાજોવાચ:
અન્યચ્ ચ શ્રોતુમ્ ઇચ્છામિ કેન ગઙ્ગાવતારિતા ।
રુદ્રશીર્ષસ્થિતા પુણ્યા દેવી કથમ્ ઇહાગતા

પુણ્યા દેવશિલાનામ તસ્યા માહાત્મ્યમુત્તમમ્ ।
એતદાખ્યાહિ મે સર્વં પ્રસાદાત્ પુરુષોત્તમ

રુદ્ર ઉવાચ:
શૃણુષ્વૈકમના ભૂત્વા યથા ગઙ્ગાવતારિતા ।
પુરા દેવી મહાભાગ બ્રહ્માદ્યૈઃ સકલૈઃ સુરૈઃ

અભ્યર્થયજ્ જગન્નાથં દેવદેવં જગદ્ગુરુમ્ ।
ઘટમધ્યે સ્થિતા ગઙ્ગા મોચિતા ચ સુભૂતલે

ભારતી ચ તતો મુક્તા રુદ્રેણ શિરસો ભુવિ ।
નરાસ્તીર્થે તટે તસ્યાઃ સ્નાનં કુર્વન્તિ ભક્તિતઃ

પિબન્તિ ચ જલં નિત્યં ન તે યાન્તિ યમાલયમ્ ।
યત્ર સા પતિતા કુણ્ડે શૂલભેદે નરાધિપ

દેવનદ્યાઃ પ્રતીચ્યાં ચ યત્ર પ્રાચી સરસ્વતી ।
યામ્યાં ચ શૂલભેદાખ્યમ્ અસ્તિ તીર્થમ્ અનુત્તમમ્

તત્રદેવશિલા રમ્યા સ્વયં દેવેન નિર્મિતા ।
તત્ર સ્નાત્વા તુ યો ભક્ત્યા બ્રાહ્મણં ભોજયેન્ નૃપ

અલ્પસ્યૈવ તુ દાનસ્ય તસ્ય ચાન્તો ન વિદ્યતે ।
ઉત્તાનપાદ ઉવાચ:
કાનિ દાનાનિ શસ્તાનિ દેવેશ ધરણીતલે

યાનિ દત્ત્વા નરો ભક્ત્યા મુચ્યતે સર્વકિલ્બિષૈઃ ।
દેવશિલાયા માહાત્મ્યં સ્નાનદાનાદ્ધિ યત્ફલમ્

વ્રતોપવાસનિ યમૈર્ યત્ પ્રાપ્યં તદ્ વદસ્વ મે ।
શ્રીભગવાન્ ઉવાચ:
આસીત્ પુરા મહાવીર્યશ્ચેદિનાથો મહાબલઃ

વીરસેન ઇતિ ખ્યાતો મણ્ડલાધિપતીશ્વરઃ ।
તસ્ય રાજ્યે રિપુર્નાસ્તિ ન વ્યાધિર્ન ચ તસ્કરઃ

ન ચાધર્મો ઽભવત્ તત્ર ધર્મ એવ હિ સર્વદા ।
સદા મુદાન્વિતો રાજા સભાર્યો બહુપુત્રકઃ

એકા ચ દુહિતા તસ્ય સુરૂપા ગિરિજા ઇવ ।
દૃષ્ટા સા પિતૃમાતૃભ્યાં બન્ધુવર્ગજનૈઃ સહ

કૃત્વા વૈવાહિકં કાર્યં કાલે પ્રાપ્તે યથા વિધિ ।
અનન્તરં ચેદિપતિર્ દ્વાદશાબ્દે મહેશ્વરઃ

તતસ્ તસ્યાસ્તુ યો ભર્તા સ મૃત્યુવશમ્ આગતઃ ।
વિધવાં તાં સુતાં દૃષ્ટ્વા રાજા શોકસમન્વિતઃ

ઉવાચ વચનં રાજા સ્વભાર્યાં દુઃખપીડિતઃ ।
ભદ્રે દુઃખમ્ ઇદં જાતં યાવજ્ જીવં સુદુઃસહમ્

નૈષા રક્ષયિતું શક્યા રૂપયૌવનદર્પિતા ।
નોપાયો વિદ્યતે ભાર્ય્યે ભાનુમત્યાશ્ ચ રક્ષણે

પરસ્પરં વિવદતોસ્ તચ્છ્રુત્વા કન્યકા ઽબ્રવીત્ ।
ભાનુમત્ય્ ઉવાચ:
ન વ્રીડામિ તવાગ્રે ઽહં જ્વલન્તી દાહકેનચ

સત્યં નોત્પદ્યતે દોષો મદર્થે ચ નરાધિપ ।
અદ્ય પ્રભૃત્ય્ અહં તાત ન વેષં ધારયે ક્વચિત્

સ્થૂલવસ્ત્રૈર્ નિજાઙ્ગાનિ પરિધાસ્યામિ સંયતા ।
ચરિષ્યામિ વ્રતાન્ સર્વાન્ પુરાણવિહિતાન્ અપિ

આત્માનં શોષયિષ્યામિ તોષયન્તી જનાર્દનમ્ ।
મમૈષા વર્તતે બુદ્ધિર્ યદિ ત્વં તાત મન્યસે

ભાનુમત્યા વચઃ શ્રુત્વા રાજા સ્નેહાર્દિતો ઽભવત્ ।
તીર્થયાત્રાં સમુદ્દિશ્ય કોશં દત્ત્વા ચ પુષ્કલમ્

વિસૃજ્ય રાજા સ્વસુતાં વૃદ્ધાન્ કૃત્વા તુ રક્ષણે ।
પુરુષં સાયુધં ચાન્યં બ્રાહ્મણં ચ પુરોહિતમ્

અવગાહ્ય તટે ધ્યાતું ગઙ્ગાયાં સા નરાધિપ ।
નિત્યમ્ આપૂજયદ્ વિપ્રાન્ ગન્ધમાલ્યાદિભૂષણૈઃ

દાસીદાસપ્રભૃતયસ્ તસ્યા યે રક્ષણે ક્ષમાઃ ।
તતઃ પિતુર્મતેનૈવ ગઙ્ગાતીરે સમાસ્થિતાઃ

દ્વાદશાબ્દાનિ સા તીરે ગઙ્ગાયાઃ સમવસ્થિતા ।
ત્યક્ત્વા ગઙ્ગાં ક્વચિદ્ રાજપુત્રી કાષ્ઠાં તુ દક્ષિણામ્

પ્રાપ્તા સા સચિવૈઃ સાર્દ્ધં યત્ર રેવા મહાનદી ।
ષણ્માસં ચ સ્થિતા તત્ર ઓંકારે ઽમરકણ્ટકે

નાનાવિધેષુ તીર્થેષુ તીર્થાત્ તીર્થં જગામ હ ।
સ્નાત્વા સ્નાત્વા દ્વિજાન્ પૂજ્યભક્તિયુક્તા હ્ય્ અધિષ્ઠિતા

વારુણીં ચ દિશં ગત્વા દેવનદ્યાશ્ ચ સઙ્ગમે ।
દદર્શ ચાશ્રમં પુણ્યમ્ ઋષિસઙ્ઘૈર્ નિષેવિતમ્

દૃષ્ટ્વા ઋષિસમૂહં સા પ્રણિપત્યેદમ્ અબ્રવીત્ ।
માહાત્મ્યં ચાસ્ય તીર્થસ્ય નામ ચૈવાસ્ય કીર્તય

ઋષિર્ ઉવાચ:
ચક્રતીર્થં તુ વિખ્યાતં ચક્રં દત્તં પુરા હરેઃ ।
મહેશ્વરેણ તુષ્ટેન દેવદેવેન શૂલિના

અત્ર તીર્થે તુ યઃ સ્નાત્વા તર્પયેત્ પિતૃદેવતાઃ ।
અનિવર્તિકા ગતિસ્ તસ્ય ભવિતા નાત્ર સંશયઃ

દ્વિતીયે ઽહ્નિ તતો ગચ્છેચ્ છૂલભેદં તપસ્વિનિ ।
રાત્રૌ જાગરણં કૃત્વા પઠેત્ પૌરાણિકીં કથામ્

વિષ્ણુપૂજાં પ્રકુર્વીત પુષ્પદીપનિવેદનૈઃ ।
પ્રભાતે ભોજયેદ્ વિપ્રાન્ દાનં દદ્યાત્ સ્વભક્તિતઃ

ચતુર્થે ઽહ્ણિ તથા ગચ્છેદ્ યત્ર પ્રાચી સરસ્વતી ।
બ્રહ્મદેવાદ્ વિનિષ્ક્રાન્તા પાવનાર્થં નરાધિપ

તત્ર સ્નાત્વા નરો ગત્વા તર્પયેત્ પિતૃદેવતાઃ ।
શ્રાદ્ધદસ્ તુ વસેત્ તત્ર યત્ર દેવઃ પિતામહઃ

પઞ્ચમે ઽહ્ણિ તતો ગચ્છેલ્ લિઙ્ગં માર્કણ્ડસંજ્ઞિતમ્ ।
તત્ર સ્નાત્વા તુ યો ભક્ત્યા અર્ચયેત્ પિતૃદેવતાઃ

શ્રાદ્ધં કૃત્વા યથા ન્યાયમ્ અનિન્દ્યાન્ પૂજયેદ્ દ્વિજાન્ ।
પિતરસ્તસ્ય તૃપ્યન્તિ દ્વાદશાબ્દં ન સંશયઃ

સર્વદેવમયં સ્થાનં સર્વતીર્થમનુત્તમમ્ ।
કોટિતીર્થસમં સ્થાનં કોટિલિઙ્ગોત્તમોત્તમમ્

ત્રિરાત્રં કુરુતે યસ્ તુ શુચિઃ સ્નાનં જિતેન્દ્રિયઃ ।
પક્ષં માસં ચ ષણ્માસમ્ અબ્દમ્ એકં કદાચન

ન તસ્ય વસતિર્ મર્ત્યે નાકે વાસઃ સદાક્ષયઃ ।
નિયમસ્થસ્ તુ મુચ્યેત ત્રિજન્મજનિતાદઘાત્

વિના પુમાંસં યા નારી દ્વાદશાબ્દ તુ સુવ્રતા ।
તિષ્ઠતે સાક્ષયં કાલં રુદ્રલોકે મહીયતે

મુનેશ્ ચ વચનં શ્રુત્વા મુદાં પરમિકાં યયૌ ।
તતો ઽવગાહતે તીર્થમહર્નિશમતન્દ્રિતમ્

દૃષ્ટ્વા તીર્થપ્રભાવં તુ રાજ્ઞી વચનમ્ અબ્રવીત્ ।
શ્રૂયતાં વચનં મે ઽદ્ય બ્રાહ્મણાઃ સપુરોહિતાઃ

ન ત્યજામ્ ઈદૃશં સ્થાનં યાવજ્ જીવામ્ય્ અહર્નિશમ્ ।
માત્રે પિત્રે તથા ભ્રાત્રે સદ્ભિર્ વાચ્યમ્ ઇદં વચઃ

વર્તતે શૂલભેદે સા નિયતા વ્રતચારિણી ।
એકાન્તરોપવાસેન શનૈર્ માસમુપોષિતા

દેવશિલાસ્થિતા નિત્યં ધ્યાયમાના તુ કેશવમ્ ।
અહર્નિશં સ્થિતા ભૂમૌ દૃષ્ટા રાજ્ઞી શુભાનના

વ્રતસ્થા નિયતાહારા નામ્ના ભાનુમતી શુભા ।
ગતેષુ દ્વિજમુખ્યેષ્વ્ આયયૌ શબરયુગ્મકમ્

ઉવાચ વચનં તત્ર તાં દૃષ્ટ્વા શબરાઙ્ગના ।
નૈવા ઽસ્યાઃ સદૃશી કાચિત્ ત્રિષુ લોકેષુ વિશ્રુતા

સાક્ષાદ્ અસૌ દેવકન્યા હ્યવતીર્ણા મહીતલે ।
ભાર્યાયા વચનં શ્રુત્વા શબરસ્ તામ્ ઉવાચ હ

કમલાનિ યથા લાભં દત્ત્વા ત્વં ભુઙ્ક્ષ્વ સત્વરમ્ ।
મમ ચૈવાર્ચને બુદ્ધિર્ ન ભોક્તવ્યં મયા ઽદ્ય વૈ

ન મયા વર્જિતં ભદ્રે પાપવૃદ્ધ્યા ઽશુભં કૃતમ્ ।
શબર્ય્ ઉવાચ:
ન પૂર્વં તુ મયા સ્વામિન્ ભુક્તં તસ્મિંસ્ તુ વાસરે

ભુક્તશેષં મયા ભુક્તં યાવત્ કાલં સ્મરામ્ય્ અહમ્ ।
ભાર્યાયા નિશ્ચયં જ્ઞાત્વા સ્નાનં કર્તું જગામ હ

અર્ધોત્તરીયવસ્ત્રેણ સ્નાનં કૃત્વા તુ ભક્તિતઃ ।
સર્વદેવં નમસ્કૃત્ય ગતો દેવશિલાં પ્રતિ

તસ્થૌ સ શઙ્કમાનો ઽપિ ધ્યાયમાનો જનાર્દનમ્ ।
કુમુદદ્વયં શબર્યા તુ દાસીહસ્તે નિવેદિતમ્

દૃષ્ટ્વા રાજ્ઞી તથા પુષ્પે દાસીં ચૈવ તદાબ્રવીત્ ।
ત્વેદં પુષ્પદ્વયં લબ્ધં કથ્યતાં તચ્ ચ સામ્પ્રતમ્

શીઘ્રં ગચ્છાવગચ્છ ત્વં પુષ્પં ચૈવાનયાપરમ્ ।
અનેન વસુના ચૈવ કમલાનિ સમાનય

ભાનુમત્યા વચઃ શ્રુત્વા ગતા સા શબરીં પ્રતિ ।
શ્રીફલાનિ ચ પુષ્પાણિ બહૂન્ય્ અન્યાનિ દેહિ મે

શબર્ય્ ઉવાચ:
શ્રીફલાનિ ચ દાસ્યામિ પુષ્પાણિ ચ વિશેષતઃ ।
મૂલ્યેન મે સ્પૃહા નાસ્તિ ગત્વા રાજ્ઞીં નિવેદય

ગતા દાસી નિવેદ્યાથ રાજ્ઞી ચ સ્વયમ્ આગતા ।
ઉવાચ શબરં રાજ્ઞી પુષ્પં મૂલ્યેન દેહિ મે

શબર ઉવાચ:
ન મૂલ્યં કામયે દેવિ ફલપુષ્પસમુદ્ભવમ્ ।
શ્રીફલાનિ ચ પુષ્પાણિ યથેષ્ટં મમ ગૃહ્યતામ્

અર્ચાં કુરુ યથાન્યાયં વાસુદેવં જગત્પતિમ્ ।
રાજ્ઞી ઉવાચ:
વિના મૂલ્યં ન ગૃહ્ણામિ કમલાનિ તવાધુના

ધાન્યસ્ય ખણ્ડિકામ્ એકામ્ એતાં પ્રતિ નિગૃહ્યતામ્

શબર ઉવાચ:
નાહારં ચિન્તયામ્યદ્ય મુક્ત્વા દેવં વરાનને

દેવકાર્યં વિના ભદ્રે નાન્યાબુદ્ધિઃ પ્રવર્તતે ।
રાજ્ઞી ઉવાચ:
ન ત્વયાન્નં પરિત્યાજ્યં સર્વમન્ને પ્રતિષ્ઠિતમ્

તસ્માત્ સર્વપ્રયત્નેન મમાન્નં પ્રતિગૃહ્યતામ્ ।
તપસ્વિનો મહાભાગા યે ચારણ્યનિવાસિનઃ

તે મદ્દ્વારે સ્થિતાઃ સર્વે યાચન્તે તે ઽન્નકાઙ્ક્ષિણઃ ।
શબર ઉવાચ:
નિષેધો ઽધિકૃતઃ પૂર્વં મયા સત્યં ન સંશયઃ

સત્યમૂલં જગત્ સર્વં સત્યે ચૈવ પ્રતિષ્ઠિતમ્ ।
સત્યેન તપતે સૂર્યઃ સત્યેન દ્યોતતે શશી

સત્યેન વાયવોવાન્તિ ધરા સત્યે પ્રતિષ્ઠિતા ।
તસ્માત્ સર્વપ્રયત્નેન સત્યં સત્યં ન લોપયેત્

રાજ્ઞી ઉવાચ:
આરામોપહૃતં પુષ્પમ્ આરણ્યં પુષ્પમ્ એવ ચ ।
ક્રીતં પ્રહિગ્રહાલ્ લબ્ધં પુષ્પમ્ એવં ચતુર્વિધમ્

ઉત્તમં ફલમારણ્યં ગૃહીત્વા સ્વયમ્ એવ હિ ।
મધ્યમં ફલમારામ્યમધમં ક્રીતમ્ એવ ચ

પ્રતિગ્રહેણ યલ્ લબ્ધં નિષ્ફલં તદ્ વિદુર્બુધાઃ ।
પુરોહિત ઉવાચ:
ગૃહાણ રાજ્ઞિ પુષ્પાણિ પૂજાં કુરુ જનાર્દને

ઉપકારં પ્રકુર્વન્તી પૂજાં ચક્રે યથાવિધિ ।
રાત્રૌ જાગરણં કૃત્વા કથા પૌરાણિકી શ્રુતા

શબરસ્ તુ તતો ભાર્યામ્ ઇદં વચનમ્ અબ્રવીત્ ।
દીપાર્થં ગૃહ્યતાં સ્નેહો યથાલાભેન સુન્દરિ

દત્ત્વા દીપં તતઃ કૃત્વા ધૂપં પૂજાં જનાર્દને ।
કૃત્વા જાગરણં રાત્રૌ ધ્યાયમાનસ્ તુ કેશવમ્

તતઃ પ્રભાતસમયે દૃષ્ટ્વા સ્નાનોત્સુકંજનમ્ ।
કેચિચ્ ચ શૂલભેદે તુ દેવનદ્યાં તથૈવ ચ

સરસ્વત્યાં તથા કેચિન્માર્કણ્ડેયે તથા હ્રદે ।
ચક્રતીર્થે તથા કેચિત્ સ્નાનં કુર્વન્તિ ભક્તિતઃ

શુચિભૂતાસ્ તુ તે સર્વે જના દેવશિલોપરિ ।
શ્રાદ્ધં કુર્વન્તિ વૈ તત્ર પ્રયત્નેન દ્વિજર્ષભાઃ

તાન્ દૃષ્ટ્વા શબરો બિલ્વૈઃ પિણ્ડં નિર્વર્તયેત્ તતઃ ।
ભાનુમત્યા તથા સક્તુપિણ્ડનિર્વપણં કૃતમ્

અનિન્દ્ય ભોજયેદ્ વિપ્રં દમ્ભદોષવિવર્જિતમ્ ।
હવિષ્યેણ તથા દધ્ના શર્કરામધુસર્પિષા

પાયસેન ચ ગવ્યેન કૃશરેણ વિશેષતઃ ।
ભોજયિત્વા તથા રાજ્ઞી દાનં દત્ત્વા યથાવિધિ

પાદુકોપાનહૌ છત્રં શય્યા ગોવૃષમ્ એવ ચ ।
વિવિધાનિ ચ દાનાનિ હેમરત્નમયાનિ ચ

તત્ર તીર્થે મહારાજ કપિલાં યઃ પ્રયચ્છતિ ।
તેન દત્તા મહી રાજન્ સશૈલવનકાનના

ઉત્તાનપાદ ઉવાચ:
તિલપ્રદઃ પ્રજા ઇષ્ટા દીપદશ્ચક્ષુરુત્તમમ્ ।
ભૂમિદઃ સ્વર્ગમ્ આપ્નોતિ દીર્ઘાયુશ્ ચ હિરણ્યદઃ

ગૃહદો રોગરહિતો રૌપ્યદો રૂપમુત્તમમ્ ।
વાસોદશ્ ચન્દ્રલોકં તુ અશ્વદઃ સૂર્યલોકભાક્

વૃષદસ્ તુ શ્રિયં પુણ્યાં ગોદાનાત્ તુ ત્રિવિષ્ટપમ્ ।
શય્યાદાનં ચ યો દદ્યાત્ સ સ્વર્ગમભયપ્રદઃ

ધાન્યદઃ શાશ્વતં સૌખ્યં બ્રહ્મદો બ્રહ્મ શાશ્વતમ્ ।
સર્વેષામ્ એવ દાનાનાં બ્રહ્મદાનં વિશિષ્યતે

ભાર્યામ્ અશ્વં મહીં વાસસ્ તિલકાં ચ ન સર્પિષમ્ ।
યે નયેન હિ ભાવેન દાનં વિપ્રાય યચ્છતિ

તેન તેન હિ ભાવેન પ્રાપ્નોતિ પદપૂજિતમ્ ।
દૃષ્ટ્વા દાનાનિ સર્વાણિ રાજ્ઞ્યા દત્તાનિ યાનિ ચ

ઉવાચ શબરો ભાર્યાં યચ્ છૃણુષ્વ નરાધિપ ।
શબર ઉવાચ:
પુરાણં પઠિતં ભદ્રે બ્રાહ્મણૈર્ વેદપારગૈઃ

શ્રુતં ચ તન્ મયા સર્વં દાનધર્મપરં શુભમ્ ।
પૂર્વજન્માર્જિતં પાપં સ્નાનદાનવ્રતેન ચ

તત્સર્વં ચ ક્ષયં જાતં મદીયેન પ્રિયે શૃણુ ।
અત્ર દત્તં હુતં તપ્તં સર્વં ભવતિ ચાક્ષયમ્

તે દ્વિજા ભાનુમત્યા ચ શૂલભેદં ગતાસ્ તતઃ ।
દદૃશુઃ શબરં કુણ્ડે શબર્યા સહ સંસ્થિતમ્

ઈશાન્યાં ચ તતો ગત્વા ભૃગુપર્વતમૂર્ધનિ ।
મર્તુકામસ્ તથારૂઢો ભાર્યયા સહ પાર્થિવ

રાજપુત્ર્ય્ ઉવાચ:
તિષ્ઠ તિષ્ઠ મહાસત્ત્વ શૃણુષ્વ વચનં મમ ।
કિમર્થં ત્યજસિ પ્રાણાનદ્યાપિ ચ યુવા ભવાન્

કિં સન્તાપઃ સમુદ્વેગઃ કિં દુઃખં વ્યાધિર્ એવ ચ ।
શિશુશ્ ચ દૃશ્યતે ઽદ્યાપિ કારણં કથયસ્વ મે

શબર ઉવાચ:
કારણં નાસ્તિ મે કિંચિન્ ન દુઃખં કિંચિદ્ એવ હિ ।
સંસારસારભૂતત્વે નાન્યા બુદ્ધિઃ પ્રવર્તતે

દુઃખેન લભતે યસ્માન્ મનુષ્યત્વં વરાનને ।
માનુષ્યં જન્મ ચાસાદ્ય યો ન ધર્મં સમાચરેત્

સ ગચ્છેન્ નરકં ઘોરમ્ અલ્પદોષેણ સુન્દરિ ।
તસ્માત્ પતિતુમ્ ઇચ્છામિ અસ્મિંસ્ તીર્થે તપસ્વિનિ

રાજપુત્ર્ય્ ઉવાચ:
અદ્યાપિ વર્તતે કાલઃ સ્વધર્મા વિવિધાઃ ક્રિયાઃ ।
કૃત્વા પ્રકૃતધર્માણિ તત્ર દાનેન શુદ્ધ્યતિ

અહં દાસ્યામિ તે ધાન્યં વાસાંસિ દ્રવિણાનિ ચ ।
નિત્યં ત્વમાચરેર્ધર્મં ધ્યાયમાનો જનાર્દનમ્

શબર ઉવાચ:
ન ચાહં કામયે દેવિ ધાન્યં વસ્ત્રાણિ ચૈવ હિ ।
યઃ પરસ્યાન્નમ્ અશ્નાતિ સ નરો ઽશ્નાતિ કિલ્બિષમ્

રાજપુત્ર્ય્ ઉવાચ:
કન્દમૂલફલાહારો ભુક્ત્વા વૈ ભક્ષ્યમુત્તમમ્ ।
અવગાહ્ય ચ તીર્થાનિ સર્વપાપૈઃ પ્રમુચ્યસે

તતો વિમુક્તપાપસ્ તુ યઃ કશ્ચિત્ પુરુષઃ શુચિઃ ।
કર્મણા તેન ચૈવ ત્વં ગતિં સમ્પ્રાપ્સ્યસે શુભામ્

શબર ઉવાચ:
અત્ર મધ્યે મયા ત્યક્તાઃ પ્રાણા દૃષ્ટ્વા હિતં ચ યત્ ।
સત્યન્ન લોપયે દેવિ ઇતિ મે નિશ્ચિતા મતિઃ

પ્રસાદઃ ક્રિયતાં દેવિ ક્ષમસ્વ ત્વં જનૈઃ સહ ।
બદ્ધોત્તરીયવસ્ત્રેણ આત્માનં ચ પ્રયત્નતઃ

ભાર્યયા સહિતસ્ તત્ર હરિં ધ્યાત્વા પપાત હ ।
નગાર્ધં પતિતો યાવદ્ ગતજીવો નરાધિપ

તૂષ્ણીં ભૂતં તુ તં દૃષ્ટ્વા કુણ્ડસ્યોપરિ ભૂમિપ ।
ત્રિમૂર્તિગર્તે તત્કાલે શબરો ભાર્યયા સહ

દિવ્યં વિમાનમ્ આરૂઢો ગતશ્ ચ ગતિમુત્તમામ્