સ્કંદ પુરાણ · અધ્યાય 4.79

॥ સ્કંદ ઉવાચ ॥
આનંદબાષ્પસલિલરુદ્ધકંઠં વિલોક્ય તમ્॥
મૃડઃ પસ્પર્શ પાણિભ્યાં સૌધાભ્યાં તુ સુધાંબુધિઃ

અથ તત્સ્પર્શસૌખ્યેન ધર્મરાજો મહાતપાઃ ॥
પુનરંકુરયામાસ તપોગ્નિ જ્વલિતાં તનુમ્

તતઃ પ્રોવાચ સ બ્રાધ્નિર્દેવ દેવમુમાપતિમ્ ॥
પ્રસન્નવદનં શાંતં શાંતપારિષદાવૃતમ્

પ્રસન્નોસિ યદીશાન સર્વજ્ઞ કરુણાનિધે ॥
કિમન્યેન વરેણાત્ર યત્ત્વં સાક્ષાત્કૃતો મયા

યં ન વેદા વિદુઃ સમ્યઙ્ન ચ તૌ વેદપૂરુષૌ ॥
તતોપિ વરયોગ્યોસ્મિ તન્નાથ પ્રાર્થયામ્યહમ્

શ્રીકંઠાંડજ ડિંભાનામમીષાં મધુરબ્રુવામ્ ॥
મત્તપશ્ચિરસાક્ષીણાં મત્પુરઃ પ્રાપ્તજન્મનામ્

પિતૃભ્યાં પરિહીનાનામિતિહાસ કથાવિદામ્ ॥
ત્યક્તાહારવિહારાણાં કીરાણાં વરદો ભવ

એતત્પ્રસૂતિસમયે આમયેન પ્રપીડિતા ॥
શુકી પંચત્વમાપન્ના શુકઃ શ્યેનેન ભક્ષિતઃ

રક્ષિતાનામનાથાનાં સદા મન્મુખદર્શિનામ્ ॥
અનાથનાથ ભવતા હ્યાયુઃશેષસ્વરૂપિણા

ઇતિ ધર્મવચઃ શ્રુત્વા પરોપકૃતિનિર્મલમ્ ॥
તાનાહૂય મુને શંભુર્વિનયાવનતાનનાન્ ॥4.2.79.૧ ૦॥
ઉવાચ ધર્મેતિ પ્રીતઃ શુકશાવાનિદં વચઃ ॥
અયિ પત્ત્રરથા બ્રૂત સાધવો ધર્મસંગતાઃ

કો વરો ભવતા દેયો ધર્મેશ પરિચારિણામ્ ॥
સાધુસંસર્ગસંક્ષીણ જન્માંતરમહૈનસામ્

ઇતિ શ્રુત્વા મહેશસ્ય વચનં તે પતત્ત્રિણઃ ॥
પ્રોચુઃ પ્રણમ્ય દેવેશં નમસ્તે ભવનાશન

॥ પક્ષિણ ઊચુઃ ॥ ॥
અનાથનાથ સર્વજ્ઞ કો વરો નઃ સમીહિતઃ ॥
ઇતોપિ ત્ર્યક્ષ યત્સાક્ષાત્તિર્યક્ત્વેપિ સમીક્ષિતાઃ

લાભાઃ સંતૂદ્યમવતાં ગિરીશેહ પરઃ શતાઃ ॥
પરં પરોયં લાભોત્ર યત્ત્વં દૃગ્ગોચરી ભવેઃ

યદેતદ્દૃશ્યતે નાથ તત્સર્વં ક્ષણભંગુરમ્ ॥
અભંગુરો ભવાનેકસ્ત્વત્સપર્યાપ્યભંગુરા

વિચિત્રજન્મકોટીનાં સ્મૃતિર્નોત્ર પરિસ્ફુરેત્ ॥
એતત્તપસ્વિરચિતલિંગપૂજા વિલોકનાત્

દેવયોનિરપિ પ્રાપ્તા ચિરમસ્માભિરીશિતઃ ॥
દિવ્યાંગના સહસ્રાણિ તત્ર ભુક્ત્વા સ્વલીલયા

આસુરી દાનવી નાગી નૈરૃતી ચાપિ કૈન્નરી ॥
વિદ્યાધરી ચ ગાંધર્વી યોનિરસ્માભિરર્જિતા ॥

નરત્વે ભૂપતિત્વં ચ પરિપ્રાપ્તમનેકશઃ ॥
જલે જલચરત્વં ચ સ્થલે ચ સ્થલચારિતા

વને વનૌકસો જાતા ગ્રામેષુ ગ્રામવાસિનઃ ॥
દાતારો યાચિતારશ્ચ રક્ષિતારશ્ચ ઘાતુકાઃ

સુખિનોપિ વયં જાતા દુઃખિનો વયમાસ્મ ચ ॥
જેતારશ્ચ વયં જાતાઃ પરાજેતાર એવ ચ

અધીતિનોપિ મૂર્ખાશ્ચ સ્વામિનઃ સેવકા અપિ ॥
ચતુર્ષુ ભૂતગ્રામેષુ ઉત્તમાધમમધ્યમાઃ

અભૂમ ભૂરિશઃ શંભો ન ક્વાપિ સ્થૈર્યમાગતાઃ ॥
ઇતોયોનેસ્તતો યોનૌ તતો યોનેસ્તતોન્યતઃ

પિનાકિન્ક્વાપિ ન પ્રાપિ સુખલેશો મનાગપિ ॥
ઇદાનીં પુણ્યસંભારૈર્ધર્મેશ્વરવિલોકનાત્

તાપનેઃસુતપો વહ્નિજ્વાલાપ્રજ્વલિતૈનસઃ ॥
સંવીક્ષ્ય ત્ર્યક્ષ સાક્ષાત્ત્વાં કૃતકૃત્યા બભૂવિમ

તથાપિ ચેદ્વરો દેયસ્તિર્યક્ષ્વસ્માસુ ધૂર્જટે ॥
કૃપણેષ્વપિ શોચ્યેષુ જ્ઞાનં સર્વજ્ઞ દેહિ તત્

યેન જ્ઞાનેન મુક્તાઃ સ્મોઽમુષ્માત્સંસારબંધનાત્ ॥
યંત્રિતાઃ પ્રાકૃતૈઃ પાશૈરદુર્ભેદ્યૈશ્ચ માદૃશૈઃ

ઐંદ્રં પદં ન વાંછામો ન ચાંદ્રં નાન્યદેવ હિ ॥
વાઞ્છામઃ કેવલં મૃત્યું કાશ્યાં શંભોઽપુનર્ભવમ્

ત્વત્સાન્નિધ્યાદ્વિજાનીમઃ સર્વજ્ઞ સકલં વયમ્ ॥
યથા ચંદનસંસર્ગાત્સર્વે સુરભયો દ્રુમાઃ

એતદેવ પરં જ્ઞાનં સંસારોચ્છિત્તિકારણમ્ ॥
વપુર્વિસર્જનં કાલે યત્તવાનંદકાનને

નિર્મથ્ય વિષ્વગ્વાગ્જાલં સારભૂતમિદં પરમ્ ॥
બ્રહ્મણોદીરિતં પૂર્વં કાશ્યાં મુક્તિસ્તનુત્યજામ્

યદ્વાચ્યં બહુભિર્ગ્રંથૈસ્તદષ્ટાભિરિહાક્ષરૈઃ ॥
હરિણોક્તં રવિપુરઃ કૈવલ્યં કાશિસંસ્થિતૌ

યાજ્ઞવલ્ક્યો મુનિવરઃ પ્રોક્તવાન્મુનિસંસદિ ॥
રવેરધીત્ય નિગમાન્કાશ્યામંતે પરં પદમ્

સ્વામિનાપિ જગદ્ધાત્રી પુરતો મંદરાચલે ॥
ઇદમેવ પુરા પ્રોક્તં કાશીનિર્વાણજન્મભૂઃ

કૃષ્ણદ્વૈપાયનોપ્યેવં શંભો વક્ષ્યતિ નાન્યથા॥
યત્રવિશ્વેશ્વરઃ સાક્ષાન્મુક્તિસ્તત્ર પદેપદે

વદંત્યન્યેપિ મુનયસ્તીર્થસંન્યાસકારિણઃ॥
ચિરંતના લોમશાદ્યાઃ કાશિકા મુક્તિકાશિકા

વયમપ્યેવં જાનીમો યત્ર સ્વર્ગતરંગિણી॥
આનંદકાનને શંર્ભોમોક્ષસ્તત્રૈવ નિશ્ચિતમ્

ભૂતં ભાવિ ભવિષ્યં યત્સ્વર્ગે મર્ત્યે રસાતલે ॥
તત્સર્વમેવ જાનીમો ધર્મેશાનુગ્રહાત્પરાત્

અતો હિરણ્યગર્ભોક્તં હરિપ્રોક્તં મુનીરિતમ્ ॥
ભવતોક્તં ચ નિખિલં શંભો જાનીમહે વયમ્

કરામલકવત્સર્વમેતદ્બ્રહ્માંડગોલકમ્ ॥
અસ્મદ્વાગ્ગોચરેઽસ્ત્યેવ ધર્મપીઠનિષેવણાત્

ધર્મરાજસ્ય તપસા તિર્યઞ્ચોપિ વયં વિભો ॥
જાતાઃ સ્મ નિર્વિકલ્પં હિ સર્વજ્ઞાનસ્ય ભાજનમ્

મધુરં મૃદુલં સત્યં સ્વપ્રમાણં સુસંસ્કૃતમ્ ॥
હિતં મિતં સદૃષ્ટાંતં શ્રુત્વા પક્ષિસુભાષિતમ્

દેવોતિવિસ્મયાપન્નો ઽવર્ણયત્પીઠગૌરવમ્ ॥
ત્રૈલોક્યનગરે ચાત્ર કાશીરાજગૃહં મમ

તત્રાપિ ભોગભવનમનર્ઘ્યમણિનિર્મિતમ્ ॥
મોક્ષલક્ષ્મીવિલાસાખ્યઃ પ્રાસાદો મેતિ શર્મભૂઃ

પતત્ત્રિણો પિમુચ્યંતે યં કુર્વાણાઃ પ્રદક્ષિણમ્ ॥
સ્વેચ્છયા વિચરંતઃ ખે ખેચરા અપિ દેવતાઃ

મોક્ષલક્ષ્મીવિલાસાખ્ય પ્રાસાદસ્ય વિલોકનાત્ ॥
શરીરાદ્દૂરતો યાતિ બ્રહ્મહત્યાપિ નાન્યથા

મોક્ષલક્ષ્મીવિલાસસ્ય કલશો યૈર્નિરીક્ષતઃ ॥
નિધાનકલશાસ્તાંસ્તુ ન મુંચંતિ પદેપદે

દૂરતોપિ પતાકાપિ મમ પ્રાસાદમૂર્ધગા ॥
નેત્રાતિથી કૃતા યૈસ્તુ નિત્યં તેઽતિથયો મમ

ભૂમિં ભિત્ત્વા સ્વયં જાતસ્તત્પ્રાસાદમિષેણ હિ ॥
આનંદાખ્યસ્ય કંદસ્ય કોપ્યેષ પરમોંકુરઃ

બ્રહ્માદિસ્થાવરાંતાનિ યત્ર રૂપણ્યનેકશઃ ॥
મામેવોપાસતે નિત્યં ચિત્રં ચિત્રગતાન્યપિ

સસૌધો મેખિલે લોકે સ્થાનં પરમનિર્વૃતેઃ ॥
રતિશાલા સ મે રમ્યા સ મે વિશ્વાસભૂમિકા

મમ સર્વગતસ્યાપિ પ્રાસાદોયં પરાસ્પદમ્ ॥
પરં બ્રહ્મ યદામ્નાતં પરમોપનિષદ્ગિરા ॥
અમૂર્તં તદહં મૂર્તો ભૂયાં ભક્તકૃપાવશાત્

નૈઃશ્રેયસ્યાઃ શ્રિયો ધામ તદ્યામ્યાં મંડપોસ્તિ મે ॥
તત્રાહં સતતં તિષ્ઠે તત્સદોમંડપં મમ

નિમેષાર્ધપ્રમાણં ચ કાલં તિષ્ઠતિ નિશ્ચલઃ ॥
તત્ર યસ્તેન વૈ યોગઃ સમભ્યસ્તઃ સમાઃ શતમ્

નિર્વાણમંડપં નામ તત્સ્થાનં જગતીતલે ॥
તત્રર્ચં સંજપન્નેકાં લભેત્સર્વશ્રુતેઃ ફલમ્ ॥

પ્રાણાયામં તુ યઃ કુર્યાદપ્યેકં મુક્તિમંડપે ॥
તેનાષ્ટાંગઃ સમભ્યસ્તો યોગોઽન્યત્રાયુતં સમાઃ

નિર્વાણમંડપે યસ્તુ જપેદેકં ષડક્ષરમ્ ॥
કોટિરુદ્રેણ જપ્તેન યત્ફલં તસ્ય તદ્ભવેત્

શુચિર્ગંગાંભસિ સ્નાતો યો જપેચ્છતરુદ્રિયમ્ ॥
નિર્વાણમંડપે જ્ઞેયઃ સ રુદ્રો દ્વિજવેષભૃત્

બ્રહ્મયજ્ઞસકૃત્કૃત્વા મમ દક્ષિણમંડપે ॥
બ્રહ્મલોકમવાપ્યાથ પરં બ્રહ્માધિગચ્છતિ

ધર્મશાસ્ત્રં પુરાણાનિ સેતિહાસાનિ તત્ર યઃ ॥
પઠેન્નિરભિલાષુઃ સન્સ વસેન્મમ વેશ્મનિ

તિષ્ઠેદિંદ્રિયચાપલ્યં યો નિવાર્ય ક્ષણં કૃતી ॥
નિર્વાણમંડપેન્યત્ર તેન તપ્તં મહત્તપઃ

વાયુભક્ષણતોન્યત્ર યત્પુણ્યં શરદાં શતમ્ ॥
તત્પુણ્યં ઘટિકાર્ધેન મૌનં દક્ષિણમંડપે

મિતં કૃષ્ણલકેનાપિ યોદદ્યાન્મુક્તિમંડપે ॥
સ્વર્ણં સૌવર્ણયાનેન સ તુ સંચરતે દિવિ

તત્રૈકં જાગરં કુર્યાદ્યસ્મિન્કસ્મિન્દિનેપિ યઃ ॥
ઉપોષિતોર્ચયેલ્લિંગં સ સર્વવ્રતપુણ્યભાક્

તત્ર દત્ત્વા મહાદાનં તત્ર કૃત્વા મહાવ્રતમ્ ॥
તત્રાધીત્યાખિલં વેદં ચ્યવતે ન નરો દિવઃ

પ્રયાણં કુર્વતે યસ્ય પ્રાણા મે મુક્તિમંડપે ॥
સમામનુપ્રવિષ્ટોત્ર તિષ્ઠેદ્યાવદહં ખલુ

જલક્રીડાં સદા કુર્યાં જ્ઞાનવાપ્યાં સહોમયા ॥
યદંબુપાનમાત્રેણ જ્ઞાનં જાયેત નિમર્લમ્

તજ્જલક્રીડનસ્થાનં મમ પ્રીતિકરં મહત્ ॥
અમુષ્મિન્રાજસદને જાડ્યહૃજ્જલપૂરિતમ્

તત્પ્રાસાદપુરોભાગે મમ શૃંગારમંડપઃ ॥ શ્રી
પીઠં તદ્ધિ વિજ્ઞેયં નિઃશ્રીકશ્રીસમર્પણમ્

મદર્થં તત્ર યો દદ્યાદ્દુકૂલાનિ શુચીન્યહો ॥
માલ્યાનિ સુવિચિત્રાણિ યક્ષકર્દમવંતિ ચ

નાના નેપથ્યવસ્તૂનિ પૂજોપકરણાઽન્યપિ ॥
સ શ્રિયાલંકૃતસ્તિષ્ઠેદ્યત્ર કુત્રાપિ સત્તમઃ

નિર્વાણલક્ષ્મીર્વૃણુતે તં નિર્વાણપદાપ્તયે ॥
યત્ર કુત્રાપિ નિધનં પ્રાપ્નુયાદપિ સ ધ્રુવમ્

મોક્ષલક્ષ્મીવિલાસાખ્ય પ્રાસાદસ્યોત્તરે મમ ॥
ઐશ્વર્યમડપં રમ્યં તત્રૈશ્વર્યં દદામ્યહમ્

મત્પ્રાસાદૈંદ્રદિગ્ભાગે જ્ઞાનમંડપમસ્તિ યત્ ॥
જ્ઞાનં દિશામિ સતતં તત્ર માં ધ્યાયતાં સતામ્

ભવાનિ રાજસદને મમાસ્તિ હિ મહાનસમ્ ॥
યત્તત્રોપહૃતં પુણ્યં નિર્વિશામિ મુદૈવ તત્

વિશાલાક્ષ્યા મહાસૌધે મમ વિશ્રામભૂમિકા ॥
તત્ર સંસૃતિખિન્નાનાં વિશ્રામં શ્રાણયામ્યહમ્ ॥

નિયમસ્નાનતીર્થં ચ ચક્રપુષ્કરિણી મમ ॥
તત્ર સ્નાનવતાં પુંસાં તન્નૈર્મલ્યં દિશામ્યહમ્

યદાહુઃ પરમં તત્ત્વં યદાહુર્બ્રહ્મસત્તમમ્ ॥
સ્વસંવેદ્યં યદાહુશ્ચ તત્તત્રાંતે દિશામ્યહમ્

યદાહુસ્તારકં જ્ઞાનં યદાહુરતિનિર્મલમ્ ॥
સ્વાત્મારામં યદાહુશ્ચ તત્તત્રાંતે દિશામ્યહમ્

જગન્મંગલભૂર્યાત્ર પરમા મણિકર્ણિકા ॥
વિપાશયામિ તત્રાહં કર્મભિઃ પાશિતાન્પશૂન્

નિર્વાણશ્રાણને યત્ર પાત્રાપાત્રં ન ચિંતયે ॥
આનંદકાનને તન્મે દાનસ્થાનં દિવાનિશમ્

ભવાંબુધૌ મહાગાધે પ્રાણિનઃ પરિમજ્જતઃ ॥
ભૂત્વૈવ કર્ણધારોંતે યત્ર સંતારયામ્યહમ્

સૌભાગ્યભાગ્યભૂર્યા વૈ વિખ્યાતા મણિકર્ણિકા ॥
દદામિ તસ્યાં સર્વસ્વમગ્રજાયાંત્યજાય વા

મહાસમાધિસંપન્નૈર્વેદાંતાર્થ નિષેવિભિઃ ॥
દુષ્પ્રાપોન્યત્ર યો મોક્ષઃ શોચ્યૈરપિ સ લભ્યતે

દીક્ષિતો વા દિવાકીર્તિઃ પંડિતો વાપ્યપંડિતઃ ॥
તુલ્યો મે મોક્ષદીક્ષાયાં સંપ્રાપ્ય મણિકર્ણિકામ્

યત્ત્યાગેન્યત્ર કૃપણસ્તત્પ્રાપ્ય મણિકર્ણિકામ્ ॥
દદામિ જંતુમાત્રાય સર્વસ્વં ચિરસંચિતમ્

યદિ દૈવાદિહ પ્રાપ્તસ્ત્રિસંયોગોઽતિદુર્ઘટઃ ॥
અવિચારં તદા દેયં સર્વસ્વં ચિરસંચિતમ્

શરીરમથ સંપત્તિરથ સા મણિકર્ણિકા ॥
ત્રિસંયોગોયમપ્રાપ્યો દેવૈરિંદ્રાદિકૈરપિ

પુનઃ પુનર્વિચાર્યેતિ જંતુમાત્રેભ્ય એવ ચ ॥
નિર્વાણલક્ષ્મીં યચ્છામિ સદોપમણિકર્ણિકમ્

મુક્તિદા ન મહી સા મે વારાણસ્યાં મહીયસી ॥
તન્મહી રજસા સામ્યં ત્રિલોક્યપિ ન ચોદ્વહેત્

પરં લિંગાર્ચનસ્થાનમવિમુક્તેશ્વરેશ્વરમ્ ॥
તત્ર પૂજાં સકૃત્કૃત્વા કૃતકૃત્યો નરો ભવેત્

સાયં પાશુપતીં સંધ્યાં કુર્યાં પશુપતીશ્વરે ॥
વિભૂતિધારણાત્તત્ર પશુપાશૈર્ન બધ્યતે

પ્રાતઃસધ્યાકરોમ્યેવ સદોંકારનિકેતને ॥
તત્રૈકાપિ કૃતા સંધ્યા સર્વપાતકકૃંતની

વસામિ કૃત્તિવાસેહં સદા પ્રતિ ચતુર્દશિ ॥
અત્ર જાગરણં કૃત્વા ચતુર્દશ્યાં ન ગર્ભભાક્

રત્નેશ્વરોર્ચિતો દદ્યાન્મહારત્નાનિ ભક્તિતઃ ॥
રત્નૈઃ સમર્ચ્ય તલ્લિંગં સ્ત્રીરત્નાદિ લભેન્નરઃ

વિષ્ટપત્રિતયાંતઃસ્થોપ્યહં લિંગે ત્રિવિષ્ટપે ॥
તિષ્ઠામિ સતતં ભક્તમનોરથસમૃદ્ધયે

વિરજસ્કં મહાપીઠં તત્ર સંસેવ્ય માનવઃ ॥
વિરજા જાયતે નૂનં ચતુર્નદ કૃતોદકઃ

મહાદેવે મહાપીઠં મમ સાધકસિદ્ધિદમ્ ॥
તત્પીઠદર્શનાદેવ મહાપાપૈઃ પ્રમુચ્યતે

પિતૃપ્રીતિપ્રદં પીઠં વૃષભધ્વજસંજ્ઞકમ્ ॥
પિતૃતર્પણકૃત્તત્ર પિતૄંસ્તારયતિ ક્ષણાત્

આદિકેશવપીઠેહમાદિકેશવરૂપધૃક્ ॥
શ્વેતદ્વીપં નયે ભક્તાન્વૈષ્ણવાનતિવલ્લભાન્

તત્રૈવ મંગલાપીઠે સર્વમંગલદાયિનિ ॥
ઉપ પંચનદે તીર્થે ભક્તાન્સંતારયામ્યહમ્

બિંદુમાધવરૂપેણ યત્રાહં વૈષ્ણવાઞ્જનાન્ ॥
નયે પંચનદસ્નાતાંસ્તદ્વિષ્ણોઃ પરમં પદમ્

પંચમુદ્રે મહાપીઠે યે વીરેશ્વરસેવકાઃ ॥
તેષાં પરમનિર્વાણં કાલેનાલ્પેન જાયતે ॥

તત્ર સિદ્ધેશ્વરીપીઠે ચંદ્રેશ્વર સમીપતઃ ॥
તત્ર સંનિધિકર્તૄણાં સિદ્ધિઃ ષણ્માસતો ભવેત્

કાશ્યાં ચ યોગિનીપીઠે યોગસિદ્ધિવિધાયિનિ ॥
સિદ્ધીરુચ્ચાટનાદ્યાશ્ચ કૈર્ન લબ્ધાઃ સુસાધકૈઃ

અનેકાનીહ પીઠાનિ સંતિ કાશ્યાં પદેપદે ॥
પરં ધર્મેશપીઠસ્ય કાચિચ્છક્તિરનુત્તમા

યત્રામી બાલકીરાશ્ચ નિર્મલજ્ઞાનભાજનમ્ ॥
આસુઃ સદુપદેશાન્મે ત્રાતત્રાતેતિ ભાષિણઃ

એતદ્ધર્મેશ્વરં પીઠં ત્યજામ્યદ્યદિનાવધિ ॥
ન કદાચિત્તરણિજત્વત્તપોવનમુત્તમમ્

મમાનુગ્રહતઃ કીરાનેતાન્પશ્ય રવેઃ સુત ॥
દિવ્યવિમાનમારુહ્ય ગંતારો મત્પુરં મહત્

તત્ર ભુક્ત્વા ચિરં ભોગાઞ્જ્ઞાનં પ્રાપ્ય મયેરિતમ્ ॥
ઇહ મુક્તિમવાપ્સ્યંતિ ત્વત્સંસર્ગાતિનિર્મલાઃ

ઇત્યુક્તવતિ દેવેશે કૈલાસશિખરોપમમ્ ॥
દિવ્યં વિમાનમાપન્નં રુદ્રકન્યાપરિષ્કૃતમ્

આરુહ્યતે ન યાનેન દિવ્યરૂપવરાઃ ખગાઃ ॥
કૈલાસમભિસંજગ્મુર્ધર્મમાપૃચ્છ્યતેઽમલાઃ

॥
ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ચતુર્થે કાશીખંડ ઉત્તરાર્ધે ધર્મેશાખ્યાનનામૈકોનાશીતિતમોઽધ્યાયઃ