શિવસ્તોત્રાવલિ · અધ્યાય 15

ભક્તિસ્તોત્રનામ પઞ્ચદશં
ત્રિમલક્ષાલિનો ગ્રન્થાઃ સન્તિ તત્પારગાસ્તથા &
યોગિનઃ પણ્ડિતાઃ સ્વસ્થાસ્ ત્વદ્ભક્તા એવ તત્ત્વતઃ

માયીયકાલનિયતિરાગાદ્યાહારતર્પિતાઃ &
ચરન્તિ સુખિનો નાથ ભક્તિમન્તો જગત્તટે

રુદન્તો વા હસન્તો વા ત્વામ્ ઉચ્ચૈઃ પ્રલપન્ત્ય્ અમી &
ભક્તાઃ સ્તુતિપદોચ્ચારોપચારાઃ પૃથગ્ એવ તે

ન વિરક્તો ન ચાપીશો મોક્ષાકાઙ્ક્ષી ત્વદર્ચકઃ &
ભવેયમ્ અપિ તૂદ્રિક્તભક્ત્યાસવરસોન્મદઃ

બાહ્યં હૃદય એવાન્તર્ અભિહૃત્યૈવ યો ઽર્ચતિ &
ત્વામ્ ઈશ ભક્તિપીયૂષરસપૂરૈર્ નમામિ તમ્

ધર્માધર્માત્મનોર્ અન્તઃ ક્રિયયોર્ જ્ઞાનયોસ્ તથા &
સુખદુઃખાત્મનોર્ ભક્તાઃ કિમ્ અપ્ય્ આસ્વાદયન્ત્ય્ અહો

ચરાચરપિતઃ સ્વામિન્ અપ્ય્ અન્ધા અપિ કુષ્ઠિનઃ &
શોભન્તે પરમ્ ઉદ્દામભવદ્ભક્તિવિભૂષણાઃ

શિલોઞ્છપિચ્છકશિપુવિચ્છાયાઙ્ગા અપિ પ્રભો &
ભવદ્ભક્તિમહોષ્મણો રાજરાજમ્ અપીશતે

સુધાર્દ્રાયાં ભવદ્ભક્તૌ લુઠતાપ્ય્ આરુરુક્ષુણા &
ચેતસૈવ વિભો ઽર્ચન્તિ કેચિત્ ત્વામ્ અભિતઃ સ્થિતાઃ

રક્ષણીયં વર્ધનીયં બહુમાન્યમ્ ઇદં પ્રભો &
સંસારદુર્ગતિહરં ભવદ્ભક્તિમહાધનમ્

નાથ તે ભક્તજનતા યદ્ય્ અપિ ત્વયિ રાગિણી &
તથાપીર્ષ્યાં વિહાયાસ્યાસ્ તુષ્ટાસ્તુ સ્વામિની સદા

ભવદ્ભાવઃ પુરો ભાવી પ્રાપ્તે ત્વદ્ભક્તિસમ્ભવે &
લબ્ધે દુગ્ધમહાકુમ્ભે હતા દધનિ ગૃધ્નુતા

કિમ્ ઇયં ન સિદ્ધિર્ અતુલા કિં વા મુખ્યં ન સૌખ્યમ્ આસ્રવતિ &
ભક્તિર્ ઉપચીયમાના યેયં શમ્ભોઃ સદાતની ભવતિ

મનસિ મલિને મદીયેમગ્ના ત્વદ્ભક્તિમણિલતા કષ્ટમ્ &
ન નિજાન્ અપિ તનુતે તાનપૌરુષેયાન્ સ્વસમ્પદુલ્લાસાન્

ભક્તિર્ ભગવતિ ભવતિ ત્રિલોકનાથે નનૂત્તમા સિદ્ધિઃ &
કિં ત્વ્ અણિમાદિકવિરહાત્ સૈવ ન પૂર્ણેતિ ચિન્તા મે

બાહ્યતો ઽન્તર્ અપિ ચોત્કટોન્મિષત્ત્ર્યમ્બકસ્તવકસૌરભાઃ શુભાઃ &
વાસયન્ત્ય્ અપિ વિરુદ્ધવાસનાન્ યોગિનો નિકટવાસિનો ઽખિલાન્

જ્યોતિર્ અસ્તિ કથયાપિ ન કિં ચિદ્ વિશ્વમ્ અપ્ય્ અતિસુષુપ્તમ્ અશેષમ્ &
યત્ર નાથ શિવરાત્રિપદે ઽસ્મિન્ નિત્યમ્ અર્ચયતિ ભક્તજનસ્ ત્વામ્

સત્ત્વં સત્યગુણે શિવે ભગવતિ સ્ફારીભવત્વ્ અર્ચને ચૂડાયાં વિલસન્તુ શઙ્કરપદપ્રોદ્યદ્રજઃસઙ્ચયાઃ &
રાગાદિસ્મૃતિવાસનામ્ અપિ સમુચ્છેત્તું તમો જૃમ્ભતાં શમ્ભો મે ભવતાત્ ત્વદાત્મવિલયે ત્રૈગુણ્યવર્ગો ઽથવા

સંસારાધ્વા સુદૂરઃ ખરતરવિવિધવ્યાધિદગ્ધાઙ્ગયષ્ટિઃ ભોગા નૈવોપભુક્તા યદ્ અપિ સુખમ્ અભૂજ્ જાતુ નન્નો ચિરાય &
ઇત્થં વ્યર્થો ઽસ્મિ જાતઃ શશિધરચરણાક્રાન્તિકાન્તોત્તમાઙ્ગસ્ ત્વદ્ભક્તશ્ ચેતિ તન્ મે કુરુ સપદિ મહાસમ્પદો દીર્ઘદીર્ઘાઃ