Śivastotrāvali · Chapter 15

bhaktistotranāma pañcadaśaṃ
trimalakṣālino granthāḥ santi tatpāragāstathā &
yoginaḥ paṇḍitāḥ svasthās tvadbhaktā eva tattvataḥ

māyīyakālaniyatirāgādyāhāratarpitāḥ &
caranti sukhino nātha bhaktimanto jagattaṭe

rudanto vā hasanto vā tvām uccaiḥ pralapanty amī &
bhaktāḥ stutipadoccāropacārāḥ pṛthag eva te

na virakto na cāpīśo mokṣākāṅkṣī tvadarcakaḥ &
bhaveyam api tūdriktabhaktyāsavarasonmadaḥ

bāhyaṃ hṛdaya evāntar abhihṛtyaiva yo 'rcati &
tvām īśa bhaktipīyūṣarasapūrair namāmi tam

dharmādharmātmanor antaḥ kriyayor jñānayos tathā &
sukhaduḥkhātmanor bhaktāḥ kim apy āsvādayanty aho

carācarapitaḥ svāmin apy andhā api kuṣṭhinaḥ &
śobhante param uddāmabhavadbhaktivibhūṣaṇāḥ

śiloñchapicchakaśipuvicchāyāṅgā api prabho &
bhavadbhaktimahoṣmaṇo rājarājam apīśate

sudhārdrāyāṃ bhavadbhaktau luṭhatāpy ārurukṣuṇā &
cetasaiva vibho 'rcanti kecit tvām abhitaḥ sthitāḥ

rakṣaṇīyaṃ vardhanīyaṃ bahumānyam idaṃ prabho &
saṃsāradurgatiharaṃ bhavadbhaktimahādhanam

nātha te bhaktajanatā yady api tvayi rāgiṇī &
tathāpīrṣyāṃ vihāyāsyās tuṣṭāstu svāminī sadā

bhavadbhāvaḥ puro bhāvī prāpte tvadbhaktisambhave &
labdhe dugdhamahākumbhe hatā dadhani gṛdhnutā

kim iyaṃ na siddhir atulā kiṃ vā mukhyaṃ na saukhyam āsravati &
bhaktir upacīyamānā yeyaṃ śambhoḥ sadātanī bhavati

manasi maline madīyemagnā tvadbhaktimaṇilatā kaṣṭam &
na nijān api tanute tānapauruṣeyān svasampadullāsān

bhaktir bhagavati bhavati trilokanāthe nanūttamā siddhiḥ &
kiṃ tv aṇimādikavirahāt saiva na pūrṇeti cintā me

bāhyato 'ntar api cotkaṭonmiṣattryambakastavakasaurabhāḥ śubhāḥ &
vāsayanty api viruddhavāsanān yogino nikaṭavāsino 'khilān

jyotir asti kathayāpi na kiṃ cid viśvam apy atisuṣuptam aśeṣam &
yatra nātha śivarātripade 'smin nityam arcayati bhaktajanas tvām

sattvaṃ satyaguṇe śive bhagavati sphārībhavatv arcane cūḍāyāṃ vilasantu śaṅkarapadaprodyadrajaḥsaṅcayāḥ &
rāgādismṛtivāsanām api samucchettuṃ tamo jṛmbhatāṃ śambho me bhavatāt tvadātmavilaye traiguṇyavargo 'thavā

saṃsārādhvā sudūraḥ kharataravividhavyādhidagdhāṅgayaṣṭiḥ bhogā naivopabhuktā yad api sukham abhūj jātu nanno cirāya &
itthaṃ vyartho 'smi jātaḥ śaśidharacaraṇākrāntikāntottamāṅgas tvadbhaktaś ceti tan me kuru sapadi mahāsampado dīrghadīrghāḥ