શિશુપાલવધ · અધ્યાય 19

અથોત્તસ્થે રણાટવ્યામસુહૃદ્વેણુદારિણા ।
નૃપાઙ્ઘ્રિપૌઘસંઘર્ષાદગ્નિવદ્વેણુદારિણા

આપતન્તમમુન્દૂરાદૂરીકૃતપરાક્રમઃ ।
બલો ઽવલોકયામાસ માતઙ્ગમિવ કેસરી

જજૌજોજાજિજિજ્જાજી તં તતો ઽતિતતાતિતુત્ ।
ભાભો ઽભીભાભિભૂભારારારિરરિરીરરઃ

ભવન્ભવાય લોકાનામાકમ્પિતમહીતલઃ ।
નિર્ઘાત ઇવ નિર્ઘોષભીમસ્તસ્યાપતદ્રથઃ

રામે રિપુઃ શરાનાજિમહેષ્વાસ વિચક્ષણે ।
કોપાદથૈનં શિતમા મહેષ્વા સ વિચક્ષણે

દિશમર્કમિવાવાચીમ્ મૂર્ચ્છાગતમપાહરત્ ।
મન્દપ્રતાપં તં સૂતઃ શીઘ્રમાજિવિહાયસઃ

કૃત્વા શિનેઃ શાલ્વચમૂં સપ્રભાવા ચમૂર્જિતામ્ ।
સસર્જ વક્ત્રૈઃ ફુલ્લાબ્જસપ્રભા વાચમૂર્જિતામ્

ઉલ્મુકેન દ્રુમં પ્રાપ્ય સંકુચત્પત્રસંપદમ્ ।
તેજઃ પ્રકિરતા દિક્ષુ સપ્રતાપમદીપ્યત

પૃથોરધ્યક્ષિપધૃદ્રુક્મી યયા ચાપમુદાયુધઃ ।
તયૈવ વાચાપગમં યયાચાપમુદાયુધઃ

સમં સમન્તતો રાજ્ઞામાપતન્તીરનીકિનીઃ ।
કાર્ષ્ણિઃ પ્રત્યગ્રહીદેકઃ સારસ્વાનિવ નિમ્નગાઃ

દધાનૈર્ઘનસાદૃશ્યં લસદાયસદંશનૈઃ ।
તત્ર કાઞ્ચનસચ્છાયા સસૃજે તૈઃ શરાશનિઃ

નખાંશુમઞ્જરીકીર્ણમસૌતરુરિવોચ્ચકૈઃ ।
બભૌ વિભ્રમદ્ધનુઃશાખામધિરૂઢશિલીમુખામ્

પ્રપ્ય ભીમમસૌ જન્યં સૌજન્યં દધદાનતે ।
વિધ્યન્મુમોચ ન રિપૂનરિપૂગાન્તકઃ શરૈઃ

કૃતસ્ય સર્વક્ષિતિપૈર્વિજયાશંસયા પુરઃ ।
અનેકસ્ય ચકારાસૌ બાણૈર્બાણસ્ય ખણ્ડનમ્

યાબભાર કૃતાનેકમાયા સેના સસારતામ્ ।
ધનુઃ સ કર્ષન્રહિતમાયાસેનાસસાર તામ્

ઓજો મહૌજાઃ કૃત્વાધસ્તત્ક્ષણાદુત્તમૌજસઃ ।
કુર્વન્નાજાવમુખ્યત્વમનમન્નામ મુખ્યતામ્

દૂરાદેવ ચમૂર્ભલ્લૈઃ કુમારો હન્તિ સ સ્મ યાઃ ।
ન પુનઃ સાંયુગીં તાઃ સ્મ કુમારો હન્તિ સસ્મયાઃ

નિપીડ્ય તરસા તેન મુક્તાઃ કામમનાસ્થયા ।
ઉપાયયુર્વિલક્ષત્વં વિદ્વિષો ન શિલીમુખાઃ

તસ્યાવદાનૈઃ સમરે સહસા રોમહર્ષિભિઃ ।
સુરૈરશંસિ વ્યોમસ્થૈઃ સહ સારો મહર્ષિભિઃ

સુગન્ધયદ્દિશઃ શુભ્રમમ્લાનિ કુસુમં દિવઃ ।
ભૂરિ તત્રાપતત્તસ્માદુત્પપાત દિવં યશઃ

સોઢું તસ્ય દ્વિષો નાલમવયોધરવા રણમ્ ।
ઊર્ણુનાવ યશશ્ચ દ્યામપયોધરવારણમ્

કેશપ્રચુરલોકસ્ય પર્યસ્કારિ વિકાસિના ।
શેખરેણેવ યુદ્ધસ્ય શિરઃ કુસુમલક્ષ્મણા

સાદરં યુદ્ધમાનાપિ તેનાન્યનરસાદરમ્ ।
સા દરં પૃતના નિન્યે હીયમાના રસાદરમ્

ઇત્યાલિઙ્ગતામાલોક્ય જયલક્ષ્મ્યા ઝષધ્વજમ્ ।
ક્રુદ્ધયેવ ક્રુધા સદ્યઃ પ્રપેદે ચેદિભૂપતિઃ

અહિતાનભિ વાહિન્યા સ માની ચતુરઙ્ગયા ।
ચચાલ વલ્લ્ગત્કલભસમાનીચતુરઙ્ગયા

તતસ્તતધનુર્મૌર્વીવિસ્ફારસ્ફારિનિઃસ્વનૈઃ ।
તૂર્યૈર્યુગક્ષયે ક્ષુભ્યદકૂપારાનુકારિણી

સકારનાનારકાસ કાયસાદદસાયકા ।
રસાહવાવાહસાર નાદવાદદવાદના

લોલાસિકાલિયકુલા યમસ્યૈવ સ્વસા સ્વયમ્ ।
ચિકીર્ષુરુલ્લસલ્લોહવર્મશ્યામા સહાયતામ્

સાસેનાગમનારમ્ભે રસેનાસીદનારતા ।
તારનાદજનામત્ત ધીરનાગમનામયા

ધૂતધૌતાસયઃ પ્રષ્ઠાઃ પ્રતિષ્ઠન્તક્ષમાભૃતામ્ ।
શૌર્યનુરાગનિકષઃ સા હિ વેલાનુજીવિનામ્

દિવમિન્યુધા ગન્તું કોમલામલસમ્પદમ્ ।
દધૌ દધાનો ઽસિલતાં કો ઽમલામલસમ્પદમ્

કૃતોરુવેગં યુગપદ્વ્યજિગીષન્ત સૈનિકાઃ ।
વિપક્ષં બાહુપરિઘૈર્જઙ્ઘાભિરિતરેતરમ્

વાહનાજનિ માનાસે સારાજાવનમા તતઃ ।
મત્તસારગરાજેભે ભારીહાવજ્જનધ્વનિ

નિધ્વનજ્જવહારીભા ભેજે રાગરસાત્તમઃ ।
તતમાનવજારાસા સેના માનિજનાહવા

અભગ્નવૃત્તાઃ પ્રસભાદાકૃષ્ટા યૌવનોદ્ધતૈઃ ।
ચક્રન્દુરુચ્ચકૈર્મુષ્ટિગ્રાહ્યમધ્યા ધનુર્લતાઃ

કરેણુઃ પ્રમ્થિતો ઽનેકો રેણુર્ઘણ્ટાઃ સહસ્રશઃ ।
કરેણુઃ શીકરો જજ્ઞે રેણુસ્તેન શમં યયૌ

ધૃતપ્રત્યગ્રશૃઙ્ગારરસરાગરપિ દ્વિપૈઃ ।
સરોષસમ્ભ્રમૈર્બર્ભ્રે રૌદ્ર એવ રણે રસઃ

ન તસ્થૌ ભર્તૃતઃ પ્રાપ્તમાનસમ્પ્રતિપત્તિષુ ।
રણૈકસર્ગેષુ ભયં માનસં પ્રતિ પત્તિષુ

બાણાહિતપૂર્ણતૂણીરકોટરૈર્ધન્વિશાખિભિઃ ।
ગોધાશ્લિષ્ટભુજાશાખૈરભૂદ્ભીમા રણાટવી

નાનાજાવવજાનાના સા જનૌઘઘનૌજસા ।
પરાનિહઽહાનિરાપ તાન્વિયાતતયાન્વિતા

વિષમં સર્વતોભદ્રચક્રગોમૂત્રિકાદિભિઃ ।
શ્લોકૈરિવમહાકાવ્યં વ્યૂહૈસ્તદભવદ્બલમ્

સંહત્યા સાત્વતાં ચૈદ્યં પ્રતિ ભાસ્વરસેનયા ।
વવલે યોદ્ધુમુત્પન્નપ્રતિમા સ્વરસેન યા

વિસ્તીર્ણમાયામવતી લોલલોકનિરન્તરા ।
નરેન્દ્રમાર્ગં રથ્યેવ પપાત દ્વિષતાં બલમ્

વારણાગગભીરા સા સારાભીગગણારવા ।
કારિતારિવધા સેના નાસેધા વારિતારિકા

અધિનાગં પ્રજવિનો વિકસત્પિચ્છચારવઃ ।
પેતુર્બર્હિણદેશીયાઃ શઙ્કવઃ પ્રાણહારિણઃ

પ્રવૃત્તેવિકસદ્ધ્વાનંસાધનેપ્યવિષાદિભિઃ ।
વવૃષેવિકસદ્દાનંયુધમાપ્યવિષાણિભિઃ

પુરઃ પ્રયુક્તૈર્યુદ્ધં તચ્ચલિતૈર્લબ્ધશુદ્ધિભિઃ ।
આલાપૈરિવ ગાન્ધર્વમદીપ્યત પદાતિભિઃ

કેનચિત્સ્વાસિનાન્યેષાં મણ્ડલાગ્રાનવદ્યતા ।
પ્રાપે કીર્તિપ્લુતમહીમણ્ડલાગ્રાનવદ્યત

વિહન્તું વિદ્વિષસ્તીક્ષ્ણઃ સમમેવ સુસંહતેઃ ।
પરિવારાત્પૃથક્ચક્રે ખડ્ગશ્ચાત્મા ચ કેનચિત્

અન્યેન વિદધે ઽરીણામતિમાત્રા વિલાસિના ।
ઉદ્ગૂર્ણેન ચમૂસ્તૂર્ણમતિમાત્રાવિલાસિના

સહસ્રપૂરણઃ કશ્ચિલ્લૂનમૂર્ધાસિના દ્વિષઃ ।
તથોર્ધ્વ એવ કાબન્ધીમભજન્નર્તનક્રિયામ્

શસ્ત્રવ્રણમયશ્રીમદલઙ્કરણભૂષષિતઃ ।
દદૃશે ઽન્યો રાવણવદલઙ્કરણભૂષિતઃ

દ્વિષદ્વિશસનચ્છેદનિરસ્તોરુયુગો ઽપરઃ ।
સિક્તશ્ચાસ્ત્રૈરુભયથા બભૂવારુણવિગ્રહઃ

ભીમતામપરો ઽમ્ભોધિસમે ઽધિત મહાહવે ।
દાક્ષે કોપઃ શિવસ્યેવ સમેધિતમહા હવે

દન્તૌશ્ચિચ્છિદિરે કોપાત્પ્રતિપક્ષં ગજા ઇવ ।
પરનિસ્ત્રિંશનિર્લૂનકરવાલાઃ પદાતયઃ

રણે રભસનિર્ભિન્નદ્વિપપાટવિકાસિનિ ।
ન તત્ર ગતભીઃ કશ્ચિદ્વિપપાટ વિકાસિનિ

યાવન્ન સત્કૃતૈર્ભર્તુઃ સ્નેહસ્યાનૃણ્યમિચ્છુભિઃ ।
અમર્ષાદિતરૈસ્તાવત્તત્યજે યુધિ જીવિતમ્

અયશોભિદુરાલોકે કોપધામરણાદૃતે ।
અયશોભિદુરા લોકે કોપધા મરણાદૃતે

સ્ખલન્તી નક્વચિત્તૈક્ષ્ણાદભ્યગ્રફલશાલિની ।
અમોચિ શક્તિઃ શક્તિકૈર્લોહજા ન શરીરજા

અપાદિ વ્યાપૃતનયાંસ્તથા યુયુધિરે નૃપાઃ ।
આપ દિવ્યા પૃતનયા વિસ્મયં જનતા યથા

સ્વગુણૈરાફલપ્રાપ્તેરાકૃષ્ય ગણિકા ઇવ ।
કામુકાનિવ નાલીકાંસ્ત્રિણન્તાઃ સહસામુચન્

વાજિનઃ શત્રુસૈન્યસ્ય સમારબ્ધનવાજિનઃ ।
વાજિનશ્ચ શરા મધ્યમવિશન્દ્રુતવાજિનઃ

પુરસ્કૃત્ય ફલં પ્રાપ્તૈઃ સત્પક્ષાશ્રયયશાલિભિઃ ।
કૃતપુઙ્ખતયા લેભે લક્ષમપ્યાશુ માર્ગણૈઃ

રક્તશ્રુતિં જપાસૂનસમરાગામિષુવ્યધાત્ ।
કશ્ચિત્પુરઃ સપત્નેષુ સમરાગમિષુવ્યધાત્

રયેણ રણકામ્યન્તૌ દૂરાદુપગતવિભૌ ।
ગતાસુરન્તરા દન્તી વરણ્ડક ઇવાભવત્

ભૂરિભિર્ભારિભિર્ભીરૈર્ભૂભારૈરભિરેભિરે ।
ભેરીરેભિભિરભ્રાભૈરભીરુભિરિભૈરિભાઃ

નિશિતાસિલતાલૂનૈસ્તથા હસ્તૈર્ન હસ્તિનઃ ।
યુધ્યમાના યથા દન્તૈર્ભગ્નૈરાપુર્વિહસ્તતાં

નિપીડનાદિવ મિથો દાનતોયનારતમ્ ।
વપુષામદયાપાતાદિભાનામભિતો ઽગલત્

રણાઙ્ગણં સર ઇવ પ્લાવિતં મદવારિભિઃ ।
ગજઃ પૃથુકરાકૃષ્ટશતપત્રમલોડયત્

શરક્ષતે ગજે ભૃઙ્ગૈઃ સવિષાદિવિષાદિનિ ।
રુતવ્યાજેન રુદિતં તત્રાસીદતિસીદતિ

અન્તકસ્ય પૃથૌ તત્ર શયનીય ઇવાહવે ।
દશનવ્યસનાદીયુર્મત્કુણત્વં મતઙ્ગજાઃ

અભીકમતિકેનેદ્ધે ભીતાનન્દસ્યનાશને ।
કનત્સકામસેનાકે મન્દકામકમસ્યતિ

દધતો ઽપિ રણે ભીમમભીક્ષ્ણં ભાવમાસુરમ્ ।
હતાઃ પરૈરભિમુખાઃ સુરભૂયમુપાયયુઃ

યેનાઙ્ગમૂહે વ્રણવત્સરુચા પરતો ઽમરૈઃ ।
સમત્વં સ યયૌ ખડ્ગત્સરુચાપરતો ઽમરૈઃ

નિપાતિતસુહૃત્સ્વામિપિતૃવ્યભ્રાતૃમાતુલમ્ ।
પાણિનીયમિવાવલોકિ ધીરૈસ્તત્સમરાજિરમ્

અભાવિ સિન્ધ્વા સન્ધ્યાભ્રસદૃગ્રુધિરતોયયા ।
હૃતે યોદ્ધું જનઃ પાંશૌ સ દૃગ્રુધિ રતો યથા

વિદલત્પુષ્કરાકીર્ણાઃ પતચ્છઙ્ખકુલાકુલાઃ ।
તરત્પત્રરથા નદ્યઃ પ્રાસર્પન્રક્તવારિજાઃ

અસૃગ્જનો ઽસ્ત્રક્ષતિમાનવમજ્જવસાદનમ્ ।
રક્ષઃપિશાચં મુમુદે નવમજ્જવસાદનમ્

ચિત્રં ચાપૈરપેતજ્યૈઃ સ્ફુરદ્રક્તશતહૃદમ્ ।
પયોદજાલમિવ તદ્વીરાશંસનમાબભૌ

બન્ધૌ વિપન્ને ઽનેકેન નરેણેહ તદન્તિકે ।
અશોચિ સૈન્યે ઘણ્ટાભિર્ન રેણે હતદન્તિકે

કૃત્તૈઃ કીર્ણા મહી રેજે દન્તૈર્ગાત્રૈશ્ચ દન્તિનામ્ ।
ક્ષુણ્ણલોકાસુભિર્મૃત્યોર્મુસલોલૂખલૈરિવ

યુદ્ધમિત્થં વિધૂતાન્યમાનવાનભિયો ગતઃ ।
ચૈદ્યઃ પરાન્પરાજિગ્યે માનવાનભિયોગતઃ

અથ વક્ષોમણિચ્છાયાચ્છુરિતાપીતવાસસા ।
સ્ફુરદિન્દ્રધનુર્ભિન્નતડિતેવ તડિત્ત્વતા

નીલેનાનાલનલિનનિલીનોલ્લલનાલિના ।
લલનાલાલનેનાલં લીલાલોલેન લાલિના

અપૂર્વયેવ તત્કાલસમાગમસકામયા ।
દૃષ્ટેન રાજન્વપુષા કટાક્ષૈર્વિજયશ્રિયા

વિભાવી વિભવી ભાભો વિભાભાવી વિવો વિભીઃ ।
ભવાભિભાવી ભાવાવો ભવાભાવો ભુવો વિભુઃ

ઉપૈતુકામૈસ્તત્પારં નિશ્ચિતૈર્યોગિભિઃ પરૈઃ ।
દેહત્યાગકૃતોદ્યોગૈરદૃશ્યત પરઃ પુમાન્

તં શ્રિયા ઘનયાનસ્તરુચા સારતયા તયા ।
યાતયા તરસા ચારુસ્તનયાનઘયા શ્રિતમ્

વિદ્વિષો ઽદ્વિષુરુદ્વીક્ષ્ય તથાપ્યાસન્નિરેનસઃ ।
અરુચ્યમપિ રોગઘ્નં નિસર્ગાદેવ ભેષજમ્

વિદિતં દિવિ કે ઽનીકે તં યાતં નિજિતાજિનિ ।
વિગદં ગવિ રોદ્ધારો યોદ્ધા યો નતિમેતિ નઃ

નિયુજ્યમાનેન પુરઃ કર્મણ્યતિગરીયસિ ।
આરોપ્યમાણોરુગુણં ભર્ત્રા કાર્મુકમાનમત્

તત્ર બાણાઃ સુપરુષઃ સમધીયન્ત ચારવઃ ।
દ્વિષામભૂત્સુપરુષસ્તસ્યાકૃષ્ટસ્ય ચારવઃ

પશ્ચાત્કૃતાનામપ્યસ્ય નરાણામિવ પત્રિણામ્ ।
યોયો ગુણેન સંયુક્તઃ સ સ કર્ણાન્તમાયયૌ

પ્રપે રૂપી પુરારેપાઃ પરિપૂરી પરઃ પરૈઃ ।
રોપૈરપારૈરુપરિ પુપૂરે ઽપિ પુરો ઽપરૈઃ

દિઙ્મુખવ્યાપિનસ્તીક્ષ્ણાન્હ્રદિનો મર્મભેદિનઃ ।
ચિક્ષેપૈકક્ષણેનૈવ સાયકાનહિતાંશ્ચ સઃ

શરવર્ષી મહાનાદઃ સ્ફુરત્કાર્મુકકેતનઃ ।
નીલચ્છવિરસૌ રેજે કેશવચ્છલનીરદઃ

ન કેવલં જનૈસ્તસ્ય લઘુસંધાયિનો ધનુઃ ।
મણ્ડલીકૃતમોકાન્તાદ્બલમૈક્ષિ દ્વિષામપિ

લોકાલોકી કલો ઽકલ્કકલિલો ઽલિકુલાલકઃ ।
કાલો ઽકલો ઽકલિઃ કાલે કોલકેલિકિલઃ કિલ

અક્ષિતારાસુ વિવ્યાધ દ્વિષતઃ સ તનુત્રિણઃ ।
દાનેષુ સ્થૂલલક્ષ્યત્વં ન હિ તસ્ય શરાસને

વરરો ઽવિવરો વૈરિવિવારી વારિરારવઃ ।
વિવવાર વરો વૈરં વીરો રવિરિવૌર્વરઃ

મુક્તાનેકશરં પ્રણાનહરદ્ભૂયસાં દ્વિષાં ।
તદીયં ધનુરન્યસ્ય ન હિ સેહે સજીવતામ્

રાજરાજી રુરોજાજેરજિરે ઽજો ઽજરો ઽરજાઃ ।
રેજારિજૂરજોર્જાર્જી રરાજર્જુરજર્જરઃ

ઉદ્ધતાન્દ્વિષતસ્તસ્ય નિધ્નતો દ્વિતયં યયુઃ ।
પાનાર્થે રુધિરં ધાતૌ રક્ષાર્થે ભુવનં શરાઃ

ક્રૂરારિકારિ કીરેકકારકઃ કારિકાકરઃ ।
કોરકાકારકરકઃ કરીરઃ કર્કરોર્ઽકરુક્

વિધાતુમવતીર્ણો ઽપિ લઘિમાનમસૌ ભુવઃ ।
અનેકમરિસંઘાતમકરોદ્ભૂમિવર્ધનમ્

દારી દરદરિદ્રો ઽરિદારૂદારો ઽદ્રિદૂરદઃ ।
દૂરાદરૌદ્રાદદરદ્રોદોરુદ્દારુરાદરી

એકેષુણા સઙ્ઘતિથાન્દ્વિષો ભિન્દન્દ્રુમાનિવ ।
સ જન્માન્તરરામસ્ય ચક્રે સદૃશમાત્મનઃ

શૂરઃ શૌરિરશિશિરૈરાશાશૈરાશુ રાશિશઃ ।
શરારુઃ શ્રીશરીરેશઃ શુશૂરે ઽરિશિરઃ શરૈઃ

વ્ક્તાસીદરિતારિણાં યત્તદીયાસ્તદા મુહુઃ ।
મનોહૃતો ઽપિ હૃદયે લેગુરેષાં ન પત્રિણઃ

નામાક્ષરાણાં મલના મા ભૂદ્ભર્તુરતઃ સ્ફુટમ્ ।
અગૃહ્ણત પરાઙ્ગનામસૂનસ્રં ન માર્ગણાઃ

આચ્છિદ્ય યોધસાર્થસ્ય પ્રાણસર્વસ્વમાશુગાઃ ।
ઐકાગારિકવદ્ભૂમૌ દૂરાજ્જગ્મુરદર્શનમ્

ભીમાસ્ત્રરાજિનસ્તસ્ય બલસ્ય ધ્વજરાજિનઃ ।
કૃતઘોરાજિનશ્ચક્રે ભુવઃ સરુધિરા જિનઃ

માંસવ્યધોચિતમુખૈઃ શૂન્યતાં દધદક્રિયમ્ ।
શકુન્તિભિઃ શત્રુબલં વ્યાપિ તસ્યેષુભિર્નભઃ

દાદદો દદ્દદુદ્દાદી દાદાદો દૂદદીદદોઃ ।
દુદ્દાદં દદદે દુદ્દે દદાદદદદો ઽદદઃ

પ્લુતેભકુમ્ભોરસિજૈર્હૃદયક્ષતિજન્મભિઃ ।
પ્રાવર્તયન્નદીરસ્રૈર્દ્વિષાં તદ્યોષિતાં ચ સઃ

સદામદબલપ્રાયઃ સમુદ્ધૃરસો બભૌ ।
પ્રતીતવિક્રમઃ શ્રીમન્હારિર્હરિરિવાપરઃ

દ્વિધા ત્રિધા ચતુર્ધા ચ તમેકમપિ શત્રવઃ ।
પશ્યન્તઃ સ્પર્ધયા સદ્યઃ સ્વયં પઞ્ચત્વમાયયુઃ

સદૈવ સંપન્નવપૂ રણેષુ સ દૈવસંપન્નવપૂરણેષુ ।
મહો દધે ઽસ્તારિ મહાનિતાન્તં મહોદધેસ્તારિમહા નિતાન્તમ્

ઇષ્ટં કૃત્વાર્થં પત્રિણઃ શાર્ઙ્ગપાણેર્ એત્યાધોમુખ્યં પ્રવિશન્ભૂમિમાશુ ।
શુદ્ધયા યુક્તાનાં વૈરિવર્ગસ્ય મધ્યે ભર્ત્રા ક્ષિપ્તાનામેતદેવાનુરૂપમ્

સત્વં માનવિશિષ્ટમાજિરભસાદાલમ્બ્ય ભવ્યઃ પુરો લબ્ધાઘક્ષયશુદ્ધિરુદ્ધરતરશ્રીવત્સભૂમિર્મુદા ।
મુક્ત્વા કામમપાસ્તભીઃ પરમૃગવ્યાધઃ સ નાદં હરેર્ એકૌઘૈઃ સમકાલમભ્રમુદયી રોપૈસ્તદા તસ્તરે