શિશુપાલવધ · અધ્યાય 18

સઞ્જગ્માતે તાવપાયનપેક્ષૌ સેનામ્ભોધી ધીરનાદૌ રયેણ ।
પક્ષચ્છેદાત્પૂર્વમેકત્ર દેશે વાઞ્છન્તૌ વા વિન્ધ્યસહ્યૌ નિલેતુમ્

પત્તિઃ પત્તિં વાહમેયાય વાજી નાગં નાગઃ સ્યન્દનસ્થો રથસ્થમ્ ।
ઇત્થં સેના વલ્લભસ્યેવ રાગાદઙ્ગેનાઙ્ગં પ્રત્યનીકસ્ય ભેજે

રથ્યાઘોષૈર્બૃંહણૈર્વારણાનામૈક્યં ગચ્છન્વાજિનાં હ્રેષયા ચ ।
વ્યોમવ્યાપી સન્તતં દુન્દુભીનામવ્યક્તો ઽભૂદીશિતેવ પ્રણાદઃ

રોષાવેશાદ્ગચ્છતાં પ્રત્યમિત્રં દૂરોત્ક્ષિપ્તસ્થૂલબાહુધ્વજાનામ્ ।
દીર્ઘાસ્તિર્યગ્વૈજયન્તીસદૃશ્યઃ પાદાતાનાં ભ્રેજિરે ખડ્ગલેખાઃ

વર્ધ્રાબદ્ધા ધૌરિતેન પ્રયાતામશ્વીયાનામુચ્ચકૈરુચ્ચલન્તઃ ।
રૌક્મા રેજુઃ સ્થાસકા મૂર્તિભાજો દર્પસ્યેવ વ્યાપ્તદેહસ્યશેષાઃ

સાન્દ્રત્વક્કાસ્તલ્પલાશ્લિષ્ટકક્ષા આઙ્ગીં શોભામાપ્નુવન્તશ્ચતુર્થીમ્ ।
કલ્પસ્યાન્તે મારુતેનોપનુન્નાશ્ચેલુશ્ચણ્ડં ગણ્ડશૈલા ઇવેભાઃ

સંક્રીડન્તી તેજિતાશ્વસ્ય રાગાદુદ્યમ્યારામગ્રકાયોત્થિતસ્ય ।
રંહોભાજામક્ષધૂઃ સ્યન્દનાનાં હાહાકારં પ્રાજિતુઃ પ્રત્યનન્દત્

કુર્વાણાનાં સામ્પરાયાન્તરાયં ભૂરેણૂનાં મૃત્યુના માર્જનાય ।
સમ્માર્જન્યો નૂનમુદ્ધૂયમાના ભાન્તિ સ્મોચ્ચૈઃ કેતનાનાં પતાકા

ઉદ્યન્નાદં ધન્વિભિર્નિષ્ઠુરાણિ સ્થૂલાન્યુચ્ચૈર્મણ્ડલત્વં દધન્તિ ।
આસ્ફાલ્યન્તે કાર્મુકાણિ સ્મ કામં હસ્ત્યારોહૈઃ કુઞ્જરાણાં શિરાંસિ

ઘણ્ડાનાદો નિસ્વનો ડિણ્ડિમાનાં ગ્રૈવેયાણામારવો બૃંહિતાનિ ।
આમેતીવ પ્રત્યવોચન્ ગજાનામુત્સાહાર્થં વાચમાધોરણસ્ય

યાતૈશ્ચાતુર્વિધ્યમસ્ત્રાદિભેદાદવ્યાસઙ્ગૈઃ સૌષ્ઠવાલ્લાઘવાચ્ચ ।
શિક્ષાશક્તિં પ્રાહરન્દર્શયન્તો મુક્તામુક્તૈરાયુધૈરાયુધીયાઃ

રોષાવેશાદાભિમુખ્યેન કૌચિત્પાણિગ્રાહં રંહસૈવોપયાતૌ ।
હિત્વા હેતીર્મલ્લવન્મુષ્ટિઘાતં ઘ્નન્તૌ બાહૂબાહવિ વ્યાસૃજેતામ્

શુદ્ધાઃ સઙ્ગં ન કૌચિત્પ્રાપ્તવન્તો દૂરાન્મુક્તા શીઘ્રતાં દર્શયન્તઃ ।
અન્તઃસેનં વિદ્વિષામાવિશન્તો યુક્તં ચક્રુઃ સાયકા વાજિતાયાઃ

આક્રમ્યાજેરગ્રિમસ્કન્ધમુચ્ચૈરાસ્થાયાથો વીતશઙ્કં શિરશ્ચ ।
હેલાલોલા વર્ત્મ ગત્વાતિમર્ત્યં દ્યામારોહન્માનભાજઃ સુખેન

રોદોરન્ધ્રં વ્યશ્નુવાનાનિ લોલૈરઙ્ગસ્યાન્તર્માદિતૈઃ સ્થાવરાણિ ।
કેચિત્ગુર્વીમેત્ય સંયન્નિષદ્યાં ક્રીણન્તિ સ્મ પ્રાણમૂલ્યૈર્યશાંસિ

વીર્યોત્સાહશ્લાઘિ કૃત્વાવદાનં સઙ્ગ્રામાગ્રે માનિનાં લજ્જિતાનામ્ ।
અજ્ઞાતાનાં શત્રુભિર્યુક્તમુચ્ચૈઃ શ્રીમન્નામ શ્રાવયન્તિ સ્મ નગ્નાઃ

આધાવન્તઃ સમ્મુખં ધારિતાનામન્યૈરન્યે તીક્ષ્ણકૌક્ષેયકાણામ્ ।
વક્ષઃપીઠૈરાત્સરોરાત્મનૈવ ક્રોધેનાન્ધાઃ પ્રવિશન્પુષ્કરાણિ

મિશ્રીભૂતે તત્ર સૈન્યદ્વયે ઽપિ પ્રાયેણાયં વ્યક્તમાસીદ્વિશેષઃ ।
આત્મીયાસ્તે યે પરાઞ્ચઃ પુરસ્તાદભ્યાવર્તી સંમુખો યઃ પરો ઽસૌ

સદ્વંશત્વાદઙ્ગસંસઙ્ગિનીત્વં નીત્વા કામં ગૌરવેણાબબબ્દ્ધા ।
નીતા હસ્તં વઞ્ચયિત્વા પરેણ દ્રોહં ચક્રે કસ્યચિત્સ્વા કૃપાણી

નીતે ભેદં ધૌતધારાભિઘાતાદમ્ભોદાભે શાત્રવેણાપરસ્ય ।
સાસૃગ્રાજિસ્તીક્ષ્ણમાર્ગસ્ય માર્ગો વિદ્યુદ્દીપ્તઃ કઙ્કટે લક્ષ્યતે સ્મ

આમૂલાન્તાત્સાયકેનાયતેન સ્યૂતે બાહૌ મણ્ડુકશ્લિષ્ટમુષ્ટેઃ ।
પ્રપ્યાસહ્યાં વેદનામસ્તધૈર્યાદપ્યભ્રશ્યચ્ચર્મ નાન્યસ્ય પાણેઃ

ભિત્વા ઘોણામાયસેનાધિવક્ષઃ સ્થૂરીપૃષ્ઠો ગાર્ધ્રપક્ષેણ વિદ્ધઃ ।
શિક્ષાહેતોર્ગાઢરજ્જ્વેવ બદ્ધો હર્તું વક્ત્રં નાશકદ્દુર્મુખો ઽપિ

કુન્તેનોચ્ચૈઃ સાદિના હન્તુમિષ્ટાન્નાજાનેયો દન્તિનસ્ત્રસ્યતિ સ્મ ।
કર્મોદારં કીર્તયે કર્તુકામાન્કિંવા જાત્યાઃ સ્વામિનોહ્રેપયન્તિ

જેતું જૈત્રાઃ શેકિરે નારિસૈન્યૈઃ પશ્યન્તો ઽધો લોકમસ્તેષુજાલાઃ ।
નાગારૂઢાઃ પાર્વતાનિ શ્રયન્તો દુર્ગાણીવ ત્રાસહીનાસ્ત્રસાનિ

વિષ્વદ્રીચીર્વિક્ષપન્સૈન્યવીચીરાજાવન્તઃ ક્વાપિ દૂરં પ્રયાતમ્ ।
બભ્રામૈકોબન્ધુમિષ્ટં દિદૃક્ષુઃ સિન્ધૌ વાદ્યો મણ્ડલં ગોર્વરાહઃ

યાવચ્ચક્રે નાઞ્જનં બોધનાય વ્યુત્થાનજ્ઞો હસ્તિચારી મદસ્ય ।
સેનાસ્વાનાદ્દન્તિનામાત્મનૈવ સ્થૂલાસ્તાવત્પ્રાવહન્દાનકુલ્યાઃ

ક્રુધ્યન્ ગન્ધાદન્યનાગાય દૂરાદારોઢારં ધૂતમૂર્ધાવમત્ય ।
ઘોરારાવધ્વનિતાશેષદિક્કે વિષ્કે નાગઃ પર્યાણંસીત્સ્વ એવ

પ્રત્યાસન્ને દન્તિનિ પ્રાતિપક્ષે યન્ત્રા નાગઃ પ્રાસ્તવક્ત્રચ્છદો ઽપિ ।
ક્રોધાક્રાન્તઃ ક્રૂરનિર્દારિતાક્ષઃ પ્રેક્ષાંચક્રે નૈવ કિઞ્ચિન્મદાન્ધઃ

તૂર્ણં યાવન્નાપનિન્યે નિષાદી વાસશ્ચક્ષુર્વારણં વારણસ્ય ।
તાવત્પૂગૈરન્યનાગાધિરૂઢઃ કાદમ્બાનામેકપાતૈરસીવ્યત્

આસ્થદ્દૃષ્ટેરાચ્છદં ચ પ્રમત્તો યન્તા યાતુઃ પ્રત્યરીભં દ્વિપસ્ય ।
ભગ્નસ્યોચ્ચૈર્બર્હભારેણ શઙ્કોરવવ્રાતે વીક્ષણે ચ ક્ષણેન

યત્નાદ્રક્ષન્સુસ્થિતત્વાદનાશં નિશ્ચત્યન્યશ્ચેતસા ભાવિતેન ।
અન્ત્યાવસ્થાકાલયોગ્યોપયોગં દધ્રે ઽભીષ્ટં રાગમાપદ્ધનં વા

અન્યોન્યેષાં પુષ્કરૈરામૃશન્તો દાનોદ્ભેદાનુચ્ચકૈભુગ્નવાલાઃ ।
ઉન્મૂર્ધાનઃ સન્નિપત્યપરાન્તૈઃ પ્રાયુધ્યન્ત સ્પષ્ટદન્તધ્વનીભાઃ

દ્રાધીયાંસ સંહતાઃ સ્થેમભાજશ્ચારૂદગ્રાસ્તીક્ષ્ણતામત્યજન્તઃ ।
દન્તા દન્તૈરાહતાઃ સામજાનાં ભઙ્ગં જગ્મુર્ન સ્વયં સામજાતાઃ

માતઙ્ગાનાં દન્તસંઘટ્ટજન્મા હેમચ્છેદછ્છાયાચઞ્ચચ્છિખાગ્રઃ ।
લગ્નો ઽપ્યગ્નિશ્ચામરેષુ પ્રકામં માઞ્જિષ્ઠેષુ વ્યજ્યતે ન સ્મ સૈન્યૈઃ

ઓષામાસે મત્સરોત્પાતવાતાશ્લિષ્યદ્દન્તક્ષ્મારુહાં ઘર્ષણોત્થૈઃ ।
યોગાન્તૈર્વા વહ્નિભિર્વારણાનામુચ્ચૈર્મૂર્ધવ્યોમ્નિ નક્ષત્રમાલા

સાન્દ્રાણ્ભોદશ્યામલે સામજાનાં વૃન્દે નીતાઃ શોણિતૈઃ શોણિમાનમ્ ।
દન્તાઃ શોભામાપુરમ્ભોનિધીનાં કન્દોદ્ભેદા વૈદ્રુમા વારિણીવ

આકમ્પાગ્રૈઃ કેતુભિઃ સન્નિપાતં તારોદીર્ણગ્રૈવનાદં વ્રજન્તઃ ।
મગ્નાનઙ્ગે ગાઢમન્યદ્વિપાનાં દન્તાન્દુઃખાદુત્ત્ખનન્તિ સ્મ નાગાઃ

ઉત્ક્ષપ્યોચ્ચૈઃ પ્રસ્ફુરન્તં રદાભ્યામીષાદન્તઃ કુઞ્જરં શાત્રવીયમ્ ।
શૃઙ્ગપ્રોતપ્રાવૃષેણ્યામ્બુદસ્ય સ્પષ્ટં પ્રાપત્સામ્યમુર્વીધરસ્ય

ભગ્ને ઽપીભે સ્વે પરાવર્ત્ય દેહં યોદ્ધ્રા સાર્ધં વ્રીડયા મુઞ્ચતેષૂન્ ।
સાકં યન્તુઃ સંમદેનાનુબન્ધી દૂનો ઽભીક્ષ્ણં વારણઃ પ્રત્યરોધિ

વ્યાપ્તં લોકૈર્દુઃખલભ્યાપસારં સંરંભિત્વાદેત્ય ધીરો મહીયઃ ।
સેનામધ્યં ગાહતે વારણઃ સ્મ બ્રહ્મૈવ પ્રાગાદિદેવોદરાન્તઃ

ભૃઙ્ગશ્રેણીશ્યામભાસાં સમૂહૈર્નારાચાનાં વિદ્ધનીરન્ધ્રદેહઃ ।
નિર્ભીકત્વાદાહવેનાહતેચ્છો હૃષ્યન્હસ્તી હૃષ્ટરોમેવ રેજે

આતામ્રાભા રોષભાજઃ કટાન્તાદાશૂત્ખાતે માર્ગણે ધૂર્ગતેન ।
નિશ્ચ્યોતન્તી નાગરાજસ્ય જજ્ઞે દાનસ્યાહો લોહિતસ્યેવ ધારા

ક્રામન્દન્તૌ દન્તિનઃ સાહસિક્યાદીષાદણ્ડૌ મૃત્યુશય્યાતલસ્ય ।
સૈન્યૈરન્યસ્તત્ક્ષણાદાશશઙ્કે સ્વર્ગસ્યોચ્ચૈરર્ધમાર્ગાધિરૂઢઃ

કુર્વઞ્જ્યોત્સ્નાવિપ્રુષાં તુલ્યરૂપસ્તારસ્તારાજાલસારામિવ દ્યામ્ ।
ખડ્ગાઘાતૈર્દારિતાદ્દન્તિકુમ્ભાદાભાતિ સ્મ પ્રોચ્છલન્મૌક્તિકૌઘઃ

દૂરોત્ક્ષિપ્તક્ષિપ્રચક્રેણ કૃત્તં મત્તો હસ્તં હસ્તિરાજઃ સ્વમેવ ।
ભીમં ભૂમૌ લોલમાનં સરોષઃ પાદેનાસૃક્પઙ્કપેષં પિપેષ

આપસ્કારાલ્લૂનગાત્રસ્ય ભૂમિં નિઃસાધારં ગચ્છતોપાઙ્મુખસ્ય ।
લબ્ધાયામં દન્તયોર્યુગ્મમેવ સ્વં નાગસ્ય પ્રાપદુત્તમ્ભનત્વમ્

લબ્ધસ્પર્શં ભૂવ્યધાદવ્યથેન સ્થિત્વા કિંચિદ્દન્તયોરન્તરાલે ।
ઊર્ધ્વાર્ધાસિચ્છિન્નદન્તપ્રવેષ્ટં જિત્વોત્તસ્થે નાગમન્યેન સદ્યઃ

હસ્તેનાગ્રે વીતભીતિં ગૃહીત્વા કઞ્ચિદ્વ્યાલઃ ક્ષિપ્તવાનૂર્ધ્વમુચ્ચૈઃ ।
આસીનાનાં વ્યોમ્નિ તસ્યૈવ હેતોઃ સ્વર્ગસ્ત્રીણામર્પયામાસ નૂનમ્

કંચિદ્દૂરાદાયતેન દ્રઢીયઃપ્રાસપ્રોતસ્રોતસાન્તઃક્ષતેન ।
હસ્તાગ્રેણ પ્રાપ્તમપ્યગ્રતો ઽભૂદાનૈશ્વર્યં વારણસ્ય ગ્રહીતુમ્

તન્વાઃ પુંસો નન્દ ગોપાત્મજાયાઃ કંસેનેવ સ્ફોટિતાયાઃ ગજેન ।
દિવ્યા મૂર્તિર્વ્યોમગૈરુત્પતન્તી વીક્ષામાસે વિસ્મિતૈશ્ચણ્ડિકેવ

આક્રમ્યૈકામગ્રપાદેન જઙ્ઘામન્યામુચ્ચૈરાદદાનઃ કરેણ ।
સંસ્થિતસ્વાનં દારુવદ્દારુણાત્મા કઞ્ચિન્મધ્યાત્પાટયામાસ દન્તી

શોચિત્વાગ્રે ભૃત્યયોર્મૃત્યુભાજોરર્યઃ પ્રેમ્ણા નો તથા વલ્લભસ્ય ।
પૂર્વં કૃત્વા નેતરસ્ય પ્રસાદં પશ્ચાત્તાપાદાપ દાહં યથાન્તઃ

ઉત્પ્લુત્યારાદર્ધચન્દ્રેણ લૂને વક્ત્રે ઽન્યસ્ય ક્રોધદષ્ટોષ્ઠદન્તે ।
સૈન્યૈઃ કણ્ઠચ્છેદલીને કબન્ધાદ્ભૂયો બિભ્યે વલ્ગતઃ સાસિપાણેઃ

તૂર્યારાવૈરાહિતોત્તાલતાલૈર્ગાયન્તીભિઃ કાહલં કાહલાભિઃ ।
નૃત્તે ચક્ષુઃશૂન્યહસ્તપ્રયોગં કાયે કૂજન્કમ્બુરુચ્ચૈર્જહાસ

પ્રત્યાવૃત્તં ભઙ્ગભાજિ સ્વસૈન્યે તુલ્યં મુક્તૈરાકિરન્તિ સ્મ કશ્ચિત્ ।
એકૌઘેન સ્વર્ણપુઙ્ખૈર્દ્વિષન્તઃ સિદ્ધાઃ માલ્યૈઃ સાધુવાદૈર્દ્વયે ઽપિ

બાણાક્ષિપ્તારોહશૂન્યાસનાનાં પ્રક્રાન્તાનામન્યસૈન્યૈગ્રહીતુમ્ ।
સંરબ્ધાનાં ભ્રામ્યતામાજિભૂમૌ વારી વારૈઃ સસ્મરે વારણાનામ્

પૌનઃ પુન્યાદસ્રગન્ધેન મત્તો મૃદ્ગન્કોપાલ્લોકમાયોધનોર્વ્યાં ।
પાદે લગ્નમત્ર માલામિભેન્દ્રઃ પાશીકલ્પામાયતામાચકર્ષ

કશ્ચિન્મૂર્ચ્છામેત્ય ગાઢપ્રહારઃ સિક્તઃ શીતૈઃ શીકરૈર્વારણસ્ય ।
ઉચ્છ્વાસ પ્રસ્થિતા તં જિઘૃક્ષુર્વ્યર્થાકૂતા નાકનારી મુમૂર્ચ્છ

લૂનગ્રીવાત્સાયકેનાપરસ્ય દ્યામત્યુચ્ચૈરાનનાદુત્પતિષ્ણોઃ ।
ત્રેસે મુગ્ધૈઃ સૈંહિકેયાનુકારાદ્રૌદ્રાકારાદપ્સરોવક્ત્રચન્દ્રૈઃ

વૃત્તં યુદ્ધે શૂરમાશ્લિષ્ય કાચિદ્રન્તું તૂર્ણં મેરુકુઞ્જં જગામ ।
ત્યક્ત્વા નાગ્નૌ દેહમેતિ સ્મ યાવત્પત્ની સદ્યસ્તદ્વિયોગાસમર્થા

ત્યક્તપ્રાણં સંયુગે હસ્તિનીસ્થા વીક્ષ્ય પ્રેમ્ણા તત્ક્ષણાદુદ્ગતાસુ ।
પ્રાપ્યાખણ્ડં દેવભૂયં સતીત્વાદાશિશ્લેષ સ્વૈવ કઞ્ચિત્પુરન્ધ્રી

સ્વર્ગેવાસં કારયન્ત્યા ચિરાય પ્રત્યગ્રત્વં પ્રત્યહં ધારયન્ત્યા ।
કશ્ચિદ્ભેજે દિવ્યનાર્યા પરસ્મિંલ્લોકે લોકં પ્રીણયન્ત્યેહ કીર્ત્યા

ગત્વા નૂનં વૈબુધં સદ્મ રમ્યં મૂચ્છાભાજામાજગામાન્તરાત્મા ।
ભૂયો દૃષ્ટપ્રત્યયાઃ પ્રાપ્તસંજ્ઞાઃ સાધીયસ્તે યદ્રણાયાદ્રિયન્તે

કશ્ચિચ્છ્સ્ત્રાપાતમૂઢો ઽપવોઢુર્લબ્ધ્વા ભૂયશ્ચેતનામાહવાય ।
વ્યાવર્તિષ્ટ ક્રોશતઃ સખ્યુરુચ્ચૈસ્ત્યક્તશ્ચાત્મા કા ચ લોકાનુવૃત્તિઃ

ભિન્નોરસ્કૌશત્રુણાકૃષ્ય દૂરાદાસન્નત્વાત્કૌચિદેકેષેણૈવ ।
અન્યો ઽન્યાવષ્ટમ્ભસામર્થ્યયોગાર્ધ્વાવેવ સ્વર્ગતાવપ્યભૂતામ્

ભિન્નાનસ્ત્રૈર્મોહભાજો ઽભિજાતાન્હન્તું લોલં વારયન્તઃ સ્વવર્ગમ્ ।
જીવગ્રાહં ગ્રાહયામાસુરન્યે યોગ્યેનાર્થાઃ કસ્ય ન સ્યાજ્જનેન

ભગ્નૈર્દણ્ડૈરાતપત્રાણિ ભૂમૌ પર્યસ્તાનિ પ્રૌઢચન્દ્રદ્યુતીનિ ।
આહારાય પ્રેતરાજસ્ય રૌપ્યસ્થાલાનીવ સ્થાપિતાનિ સ્મ ભાન્તિ

રેજુર્ભ્રષ્ટા વક્ષસઃ કુઙ્કુમાઙ્કા મુક્તાહારાઃ પાર્થિવાનાં વ્યસૂનામ્ ।
હાસાલ્લક્ષ્યાઃ પૂર્ણકામસ્ય મન્યે મૃત્યોર્દન્તાઃ પીતરક્તાસવસ્ય

નિમ્નેષ્વોધીભૂતમસ્ત્રક્ષતાનામસ્રં ભૂમૌ યચ્ચકાસાઞ્ચકાર ।
રાગાર્થં તત્કિં નુ કૌસુમ્ભમમ્ભઃ સંવ્યાનાનામન્તકાન્તઃ પુરસ્ય

રામેણ ત્રિઃસપ્તકૃત્વો હ્રદાનાં ચિત્રં ચક્રે પઞ્ચકં ક્ષત્રિયાસ્ત્રૈઃ ।
રક્તામ્ભોભિઃસ્તત્ક્ષણાદેવ તસ્મિન્સંખ્યે ઽસંખ્યાઃ પ્રવહન્દ્વીપવત્યઃ

સંદાનાન્તાદસ્ત્રિભિઃ શિક્ષિતાસ્ત્રૈરવિશ્યાધઃ શાતશસ્ત્રાવલૂનાઃ ।
કૂર્મૌપમ્યં વ્ક્તમન્તર્નદીનામૈભાઃ પ્રાપન્નઙ્ઘ્રયો ઽસૃઙ્મયીનામ્

પદ્માકારૈર્યોધવક્ત્રૈરિભાનાં કર્ણભ્રષ્ટૈશ્ચામરૈરેવ હંસૈઃ ।
સોપસ્કારાઃ પ્રાવહન્નસ્રતોયાઃ સ્રોતસ્વિન્યો વીચિષુચ્ચૈસ્તરદ્ભિઃ

ઉત્ક્રાન્તાનામામિષાયોપરિષ્ટાદધ્યાકાશં બભ્રુમુઃ પત્રવાહાઃ ।
મૂર્તાઃ પ્રાણાઃ નૂનમદ્યાપ્યવેક્ષામાસુઃ કાયં ત્યજિતાઃ દારુણાસ્ત્રૈઃ

આતન્વદ્ભિર્દિક્ષુ પત્રાગ્રનાદં પ્રાપ્તૈદૂરાદાશુ તીક્ષ્ણૈર્મુખાગ્રૈઃ ।
આદૌ રક્તં સૈનિકાનામજીવૈર્જીવૈઃ પશ્ચાત્પત્રિપૂગૈરપાયિ

ઓજોભાજાં યદ્રણે સંસ્થિતાનામાદત્તીવ્રં સાર્ધમઙ્ગેન નૂનમ્ ।
જ્વાલાવ્યાજાદુદ્વમન્તી તદન્તસ્તેજસ્તારં દીપ્તજિહ્વા વવાશે

નૈરન્તર્યચ્છિન્નદેહાન્તરાલં દુર્ભક્ષસ્ય જ્વાલિના વાશિતેન ।
યોદ્ધુર્બાણપ્રોતમાદીપ્ય માંસં પાકાપૂર્વસ્વાદમાદે શિવાભિઃ

ગ્લાનિચ્છેદિ ક્ષુત્પ્રબોધાય પીત્વા રક્તારિષ્ટં શોષિતાજીર્ણશેષમ્ ।
સ્વાદુંકારં કાલખણ્ડોપદંશં ક્રોષ્ટા ડિમ્બં વ્યષ્વણદ્વ્યસ્વનઞ્ચ

ક્રવ્યાત્પૂગૈઃ પુષ્કરાણ્યનકાનાં પ્રત્યાશાભિર્મેદસો દારિતાનિ ।
આભીલાનિ પ્રાણિનઃ પ્રત્યવસ્યન્કાલો નૂનં વ્યદદાવાનનાનિ

કીર્ણા રેજે સાજિભૂમિઃ સમન્તાદપ્રાણદ્ભિઃ પ્રાણભાજાં પ્રતીકૈઃ ।
બહ્વારમ્ભૈરર્ધસંયોજિતૈર્વા રૂપૈઃ સ્રષ્ટુઃ સૃષ્ટિકર્માન્તશાલા

આયન્તીનામવિરતરયંરાજકાનીકિનીનામ્ ઇત્થં સૈન્યૈઃ સમમલુઘુભિઃ શ્રીપતેરૂર્મિમદ્ભિઃ ।
આસીદોઘૈર્મુહુરિવ મહદ્વારિધેરાપગાનાં દોલાયુદ્ધં કૃતગુરુતરધ્વાનમૌદ્ધત્યભાજામ્