શિવ પુરાણ · અધ્યાય 2.3.51

॥ બ્રહ્મોવાચ ॥
તસ્મિન્નવસરે જ્ઞાત્વાનુકૂલં સમયં રતિઃ ॥
સુપ્રસન્ના ચ તમ્પ્રાહ શઙ્કરં દીનવત્સલમ્

રતિરુવાચ ॥
ગૃહીત્વા પાર્વતીં પ્રાપ્તં સૌભાગ્યમતિદુર્લભમ્ ॥
કિમર્થં પ્રાણનાથો મે નિસ્સ્વાર્થં ભસ્મસાત્કૃતઃ

જીવયાત્રા પતિં મે હિ કામવ્યા પારમાત્મનિ ॥
કુરુ દૂરં ચ સન્તાપં સમવિશ્લેષહેતુકમ્

વિવાહોત્સવ એતસ્મિન્ સુખિનો નિખિલા જનાઃ ॥
અહમેકા મહેશાન દુઃખિની સ્વપતિમ્વિના

સનાથાં કુરુ માન્દેવ પ્રસન્નો ભવ શઙ્કર ॥
સ્વોક્તં સત્યમ્વિધેહિ ત્વં દીનબન્ધો પર પ્રભો

ત્વામ્વિના કસ્સમર્થોત્ર ત્રૈલોક્યે સચરાચરે ॥
નાશને મમ દુઃખસ્ય જ્ઞાત્વેતિ કરુણાં કુરુ

સોત્સવે સ્વવિવાહેઽસ્મિન્સર્વાનન્દ પ્રદાયિની ॥
સોત્સવામપિ માં નાથ કુરુ દીનકૃપાકર

જીવિતે મમ નાથે હિ પાર્વત્યા પ્રિયયા સહ ॥
સુવિહારઃ પ્રપૂર્ણશ્ચ ભવિષ્યતિ ન સંશયઃ

સર્વં કર્તું સમર્થોસિ યતસ્ત્વં પરમેશ્વરઃ ॥
કિમ્બહૂક્ત્યાત્ર સર્વેશ જીવયાશુ પતિં મમ

॥ બ્રહ્મોવાચ ॥
તદિત્યુક્ત્વા કામભસ્મ દદૌ સગ્રન્ધિબન્ધનમ્ ॥
રુરોદ પુરતશ્શમ્ભોર્નાથ નાથેત્યુદીર્ય્ય ચ

રતિરોદનમાકર્ણ્ય સરસ્વત્યાદયઃ સ્ત્રિયઃ ॥
રુરુદુસ્સકલા દેવ્યઃ પ્રોચુર્દીનતરં વચઃ

॥ દેવ્ય ઊચુઃ ॥
ભક્તવત્સલનામા ત્વં દીનબન્ધુર્દયાનિધિઃ ॥
કામ જીવય સોત્સાહાં રતિ કુરુ નમોઽસ્તુ તે

બ્રહ્મોવાચ ॥
ઇતિ તદ્વચનં શ્રુત્વા પ્રસન્નોઽભૂન્મહેશ્વરઃ॥
કૃપાદૃષ્ટિં ચકારાશુ કરુણાસાગરઃ પ્રભુઃ

સુધાદૃષ્ટ્યા શૂલભૃતો ભસ્મતો નિર્ગતઃ સ્મરઃ ॥
તદ્રૂપવેષચિહ્નાત્મા સુન્દરોદ્ભુતમૂર્તિમાન્

તદ્રૂપશ્ચ તદાકારસંસ્મિતં સધનુશ્શરમ્ ॥
દૃષ્ટ્વા પતિં રતિસ્તં ચ પ્રણનામ મહેશ્વરમ્

કૃતાર્થાભૂચ્છિવં દેવં તુષ્ટાવ ચ કૃતાઞ્જલિઃ ॥
પ્રાણનાથપ્રદં પત્યા જીવિતેન પુનઃપુનઃ

કામસ્ય સ્તુતિમાકર્ણ્ય સનારીકસ્ય શઙ્કરઃ ॥
પ્રસન્નોઽભવદત્યંતમુવાચ કરુણાર્દ્રધીઃ

શઙ્કર ઉવાચ ॥
પ્રસન્નોહં તવ સ્તુત્યા સનારીકસ્ય ચિત્તજ ॥
સ્વયંભવ વરમ્બૂહિ વાઞ્છિતં તદ્દદામિ તે

બ્રહ્મોવાચ ॥
ઇતિ શમ્ભુવચઃ શ્રુત્વા મહાનદન્સ્સ્મરસ્તતઃ ॥
ઉવાચ સાઞ્જલિર્નમ્રો ગદ્ગદાક્ષરયા ગિરા

॥ કામ ઉવાચ ॥
દેવદેવ મહાદેવ કરુણાસાગર પ્રભો ॥
યદિ પ્રસન્નસ્સર્વેશઃ મમાનન્દકરો ભવ

ક્ષમસ્વ મેઽપરાધં હિ યત્કૃતશ્ચ પુરા પ્રભો ॥
સ્વજનેષુ પરામ્પ્રીતિં ભક્તિન્દેહિ સ્વપાદયોઃ

બ્રહ્મોવાચ ॥
ઇત્યાકર્ણ્ય સ્મરવચઃ પ્રસન્નઃ પરમેશ્વરઃ
ૐ મિત્યુક્ત્વાઽબ્રવીત્તં વૈ વિહસન્કરુણાનિધિઃ

॥ ઈશ્વર ઉવાચ ॥
હે કામાહં પ્રસન્નોઽસ્મિ ભયન્ત્યજ મહામતે ॥
ગચ્છ વિષ્ણુસમીપઞ્ચ બહિસ્થાને સ્થિતો ભવ

॥ બ્રહ્મોવાચ ॥ ॥
તચ્છ્રુત્વા શિરસા નત્વા પરિક્રમ્ય સ્તુવન્વિભુમ્ ॥
બહિર્ગત્વા હરિન્દેવાન્પ્રણમ્ય સમુપાસ્ત સઃ

કામં સમ્ભાષ્ય દેવાશ્ચ દદુસ્તસ્મૈ શુભાશિષમ્ ॥
વિષ્ણ્વાદયઃ પ્રસન્નાસ્તે પ્રોચુઃ સ્મૃત્વા શિવં હૃદિ

॥ દેવા ઊચુઃ ॥
ધન્યસ્ત્વં સ્મર સન્દગ્ધઃ શિવેનાનુગ્રહીકૃતઃ ॥
જીવયામાસ સત્ત્વાંશકૃપાદૃષ્ટ્યા ખિલેશ્વરઃ

સુખદુઃખદો ન ચાન્યોઽસ્તિ યતસ્સ્વકૃતભૃક્ પુમાન્ ॥
કાલે રક્ષા વિવાહશ્ચ નિષેકઃ કેન વાર્યતે ॥ ૨૭ ।
॥ બ્રહ્મોવાચ ॥
ઇત્યુક્ત્વા તે ચ સમ્માન્ય તં સુખેનામરાસ્તદા ॥
સન્તસ્થુસ્તત્ર વિષ્ણ્વાદ્યાસ્સર્વે લબ્ધમનોરથાઃ

સોપિ પ્રમુદિતસ્તત્ર સમુવાસ શિવાજ્ઞયા ॥
જયશબ્દો નમશ્શબ્દસ્સાધુશબ્દો બભૂવ હ

તતશ્શમ્ભુર્વાસગેહે વામે સંસ્થાપ્ય પાર્વતીમ્ ॥
મિષ્ટાન્નં ભોજયામાસ તં ચ સા ચ મુદાન્વિતા

અથ શમ્ભુર્ભવાચારી તત્ર કૃત્યમ્વિધાય તત્ ॥
મેનામામંત્ર્ય શૈલં ચ જનવાસં જગામ સઃ

મહોત્સવસ્તદા ચાસીદ્વેદધ્વનિરભૂન્મુને ॥
વાદ્યાનિ વાદયામાસુર્જનાશ્ચતુર્વિધાનિ ચ

શમ્ભુરાગત્ય સ્વસ્થાનં વવન્દે ચ મુનીંસ્તદા ॥
હરિં ચ માં ભવાચારાદ્વન્દિતોઽભૂત્સુરાદિભિઃ

જયશબ્દો બભૂવાથ નમ શ્શબ્દસ્તથૈવ ચ ॥
વેદધ્વનિશ્ચ શુભદઃ સર્વવિઘ્નવિદારણઃ

અથ વિષ્ણુરહં શક્રસ્સર્વે દેવાશ્ચ સર્ષયઃ ॥
સિદ્ધા ઉપસુરા નાગાસ્તુષ્ટુવુસ્તે પૃથક્પૃથક્

દેવા ઊચુઃ ॥
જય શમ્ભોઽખિલાધાર જય નામ મહેશ્વર ॥
જય રુદ્ર મહાદેવ જય વિશ્વ મ્ભર પ્રભો

જય કાલીપતે સ્વામિઞ્જયાનન્દપ્રવર્ધક ॥
જય ત્ર્યમ્બક સર્વેશ જય માયાપતે વિભો

જય નિર્ગુણ નિષ્કામ કારણાતીત સર્વગ ॥
જય લીલાખિલાધાર ધૃતરૂપ નમોઽસ્તુ તે

જય સ્વભક્તસત્કામપ્રદેશ કરુણાકર॥
જય સાનન્દસદ્રૂપ જય માયાગુણાકૃતે

જયોગ્ર મૃડ સર્વાત્મન્ દીનબન્ધો દયાનિધે ॥
જયાવિકાર માયેશ વાઙ્મનોતીતવિગ્રહ

બ્રહ્મોવાચ ॥
ઇતિ સ્તુત્વા મહેશાનં ગિરિજાનાયકમ્પ્રભુમ્ ॥
સિષેવિરે પરપ્રીત્યા વિષ્ણ્વાદ્યાસ્તે યથોચિતમ્

અથ શમ્ભુર્મહેશાનો લીલાત્તતનુરીશ્વરઃ ॥
દદૌ માનવરન્તેષાં સર્વેષાન્તત્ર નારદ

વિષ્ણ્વાદ્યાસ્તેઽખિલાસ્તાત પ્રાપ્યાજ્ઞામ્પરમેશિતુઃ॥
અતિહૃષ્ટાઃ પ્રસન્નાસ્યાઃ સ્વસ્થાનઞ્જગ્મુરાદૃતાઃ

ઇતિ શ્રીશિવમહાપુરાણે બ્રહ્મનારદસમ્વાદે દ્વિતીયાયાં રુદ્રસંહિતાયાં તૃતીયે પાર્વતીખણ્ડે કામસંજીવનવર્ણનં નામૈકપઞ્ચાશત્તમોઽધ્યાયઃ