સાર્ધત્રિશતિકાલોત્તરાગમ · અધ્યાય 4

ભસ્મસ્નાનં પ્રવક્ષ્યામિ તદૂર્ધ્વં ચ ષડાનન
મન્ત્રૈઃ સર્વૈઃ સકૃદ્ભસ્મ અભિમન્ત્ર્ય યથાક્રમમ્ ॥

જલસ્નાનં પુરા કૃત્વા અસ્ત્રબીજેન ષણ્મુખ
વિધિસ્નાનં તતઃ કુર્યાન્ મૂર્ધ્ન આરભ્ય મન્ત્રવિત્ ॥

ઈશાનેન શિરઃ સ્નાયાન્ મુખં તત્પુરુષેણ તુ
હૃદયં બહુરૂપેણ ગુહ્યં વૈ ગુહ્યકેન તુ ॥

સર્વાઙ્ગાણિ ત્વજાતેન અભિષેકં તુ પઞ્ચભિઃ
ઉપરિષ્ટાત્પ્રસાદેન સ્નાનં કુર્વીત ષણ્મુખ ॥