સાધનદીપિકા · અધ્યાય 10

પુષ્પવતિ વસન્તે ચ-ઇતિ બીજં પ્રતિક્રામ્ય ર-યુતં તથા મૂલ-મન્ત્ર-લક્ષ-જપેન
સિદ્ધિઃ સ્યાત્ ।
ઇતિ સમ્મોહન-તન્ત્રે પઞ્ચ-બાણેશ્વરી-શ્રી-રાધિકા-મન્ત્ર-કથનમ્ ।
[ઊર્ધ્વામ્નાય-તન્ત્રે પઞ્ચાક્ષરી-સાધનમ્]
અથાહં સમ્પ્રવક્ષ્યામિ રાધાં પઞ્ચાક્ષરાત્મિકામ્ ।
યસ્યા વિજ્ઞાન-માત્રેણ શ્રી-કૃષ્ણં વશયેન્ નરઃ

રમા-બીજં સમુચ્ચાર્ય રાધિકે પરમ્ ઉચ્ચરેત્
રસાન્તા રાધિકા વિદ્યા ભક્તાનાં ચિન્તિતાર્થદા

સનકોઽસ્ય ઋષિઃ પ્રોક્તો જગતી ચ્છન્દ ઈરિતમ્ ।
શ્રી-રાધા દેવતા પ્રોક્તા વિનિયોગોઽખિલાપ્તયે

દ્વિર્ આવૃત્ત્યા તુ મન્ત્રસ્ય ષડ્-અઙ્ગ-ન્યાસમ્ આચરેત્ ।
ધ્યાયેત્ પદ્મકરાં ગૌરીં ક્ષીર-સાગર-તીરગામ્

કૃષ્ણ-કણ્ઠાર્પિત-કરાં સ્મયમાન-મુખામ્બુજામ્ ।
મૂર્ધ્નિ લોચનયોર્ આસ્યે હૃદયે ચ પ્રવિન્યસેત્

એકૈક-ક્રમતો વર્ણાન્ પઞ્ચાક્ષરમ્ અનૂદ્ભવાન્ ।
મૂલાધારે રમાં ન્યસેત્ સ્વાધિષ્ઠાને ચ રામ્ ઇતિ

મણિપૂરે તૃતીયં ચ ન્યસેત્ તૂર્યમ્ અનાહતે ।
વિશુદ્ધે ચ રમાં ન્યસ્યેદ્ આજ્ઞાયાં સર્વ-મન્ત્રકમ્

ત્રિ-કોણં બિન્દુ-સંયુક્તમ્મ્ અષ્ટ-કોણં તતો લિખેત્ ।
તતો ભૂપુરમ્ આલિખ્ય પીઠ-પૂજાં સમાચરેત્

બિન્દૌ પ્રપૂજયેત્ સાક્ષાદ્ વૃષભાનુ-સુતાં પરામ્ ।
ત્રિકોણે પૂજયેચ્ છ્યામાં વિશાખાં લલિતામ્ અપિ

કર્પૂર-મઞ્જરીં રૂપ-મઞ્જરીં રસ-મઞ્જરીમ્ ।
લવઙ્ગ-મઞ્જરીં પ્રેમ-મઞ્જરીં રઙ્ગ-મઞ્જરીમ્

આનન્દ-મઞ્જરીં ચૈવ તથૈવ રતિ-મઞ્જરીમ્ ।
અષ્ટ-કોણે સમાપૂજ્ય ભૂપુરે ચ દિગ્-ઈશ્વરાન્

સિદ્ધાષ્ટક-સમાયુક્તાંસ્ તતઃ પુષ્પાઞ્જલિં ક્ષિપેત્ ।
એવં કૃત્વાર્ચનં મન્ત્રી જપેદ્ અયુત-માત્રકમ્

યથોક્ત-વિહિતે મન્ત્રે પઞ્ચ-વર્ણ-પ્રપૂરિતે ।
દીપ-રજં તુ સંસ્થાપ્ય સૌરભેય-ઘૃતાન્વિતમ્

દશભિઃ સૂત્રકૈર્ વર્તિ સંયોજ્યાખણ્ડ-રૂપિણીમ્ ।
સૌવર્ણં રાજતં વાપિ તામ્રં કાંસ્ય-મયં તથા

અભાવે માર્તિકં વાપિ દિવ્યં દીપં પ્રકલ્પયેત્ ।
સાધારં સ્થાપયેદ્ યન્ત્રં કૂર્ચિકાં ચાપિ તન્-મયીમ્

કન્યા-કર્તિત-સૂત્રેણ વ્રતિકાં પરિકલ્પયેત્ ।
યાવત્ પઞ્ચ-દિનં કુર્યાદ્ એવં વિધિમ્ અનુત્તમમ્

સર્વાન્ મનો-ગતાન્ કામાન્ અવાપ્નોતિ ન સંશયઃ ।
સંગ્રામે વિષયે ચૈવ વિવાદેઽર્થ-સાધને

અમૂં પ્રયોગમ્ આચર્ય સદ્યઃ સિદ્ધિમ્ અવાપ્નુયાત્ ।
અન્યેષ્વ્ અપિ ચ કાર્યેષુ કુર્યાદ્ એવં વિધિં નરઃ