Sādhanadīpikā · Chapter 10

puṣpavati vasante ca-iti bījaṃ pratikrāmya ra-yutaṃ tathā mūla-mantra-lakṣa-japena
siddhiḥ syāt |
iti sammohana-tantre pañca-bāṇeśvarī-śrī-rādhikā-mantra-kathanam |
[ūrdhvāmnāya-tantre pañcākṣarī-sādhanam]
athāhaṃ sampravakṣyāmi rādhāṃ pañcākṣarātmikām |
yasyā vijñāna-mātreṇa śrī-kṛṣṇaṃ vaśayen naraḥ

ramā-bījaṃ samuccārya rādhike param uccaret
rasāntā rādhikā vidyā bhaktānāṃ cintitārthadā

sanako'sya ṛṣiḥ prokto jagatī cchanda īritam |
śrī-rādhā devatā proktā viniyogo'khilāptaye

dvir āvṛttyā tu mantrasya ṣaḍ-aṅga-nyāsam ācaret |
dhyāyet padmakarāṃ gaurīṃ kṣīra-sāgara-tīragām

kṛṣṇa-kaṇṭhārpita-karāṃ smayamāna-mukhāmbujām |
mūrdhni locanayor āsye hṛdaye ca pravinyaset

ekaika-kramato varṇān pañcākṣaram anūdbhavān |
mūlādhāre ramāṃ nyaset svādhiṣṭhāne ca rām iti

maṇipūre tṛtīyaṃ ca nyaset tūryam anāhate |
viśuddhe ca ramāṃ nyasyed ājñāyāṃ sarva-mantrakam

tri-koṇaṃ bindu-saṃyuktamm aṣṭa-koṇaṃ tato likhet |
tato bhūpuram ālikhya pīṭha-pūjāṃ samācaret

bindau prapūjayet sākṣād vṛṣabhānu-sutāṃ parām |
trikoṇe pūjayec chyāmāṃ viśākhāṃ lalitām api

karpūra-mañjarīṃ rūpa-mañjarīṃ rasa-mañjarīm |
lavaṅga-mañjarīṃ prema-mañjarīṃ raṅga-mañjarīm

ānanda-mañjarīṃ caiva tathaiva rati-mañjarīm |
aṣṭa-koṇe samāpūjya bhūpure ca dig-īśvarān

siddhāṣṭaka-samāyuktāṃs tataḥ puṣpāñjaliṃ kṣipet |
evaṃ kṛtvārcanaṃ mantrī japed ayuta-mātrakam

yathokta-vihite mantre pañca-varṇa-prapūrite |
dīpa-rajaṃ tu saṃsthāpya saurabheya-ghṛtānvitam

daśabhiḥ sūtrakair varti saṃyojyākhaṇḍa-rūpiṇīm |
sauvarṇaṃ rājataṃ vāpi tāmraṃ kāṃsya-mayaṃ tathā

abhāve mārtikaṃ vāpi divyaṃ dīpaṃ prakalpayet |
sādhāraṃ sthāpayed yantraṃ kūrcikāṃ cāpi tan-mayīm

kanyā-kartita-sūtreṇa vratikāṃ parikalpayet |
yāvat pañca-dinaṃ kuryād evaṃ vidhim anuttamam

sarvān mano-gatān kāmān avāpnoti na saṃśayaḥ |
saṃgrāme viṣaye caiva vivāde'rtha-sādhane

amūṃ prayogam ācarya sadyaḥ siddhim avāpnuyāt |
anyeṣv api ca kāryeṣu kuryād evaṃ vidhiṃ naraḥ