ઋગ્વેદ · અધ્યાય 8.070

યો રાજા ચર્ષણીનાં યાતા રથેભિર્ અધ્રિગુઃ ।
વિશ્વાસાં તરુતા પૃતનાનાં જ્યેષ્ઠો યો વૃત્રહા ગૃણે ॥

ઇન્દ્રં તં શુમ્ભ પુરુહન્મન્ન્ અવસે યસ્ય દ્વિતા વિધર્તરિ ।
હસ્તાય વજ્રઃ પ્રતિ ધાયિ દર્શતો મહો દિવે ન સૂર્યઃ ॥

નકિષ્ ટં કર્મણા નશદ્ યશ્ ચકાર સદાવૃધમ્ ।
ઇન્દ્રં ન યજ્ઞૈર્ વિશ્વગૂર્તમ્ ઋભ્વસમ્ અધૃષ્ટં ધૃષ્ણ્વોજસમ્ ॥

અષાળ્હમ્ ઉગ્રમ્ પૃતનાસુ સાસહિં યસ્મિન્ મહીર્ ઉરુજ્રયઃ ।
સં ધેનવો જાયમાને અનોનવુર્ દ્યાવઃ ક્ષામો અનોનવુઃ ॥

યદ્ દ્યાવ ઇન્દ્ર તે શતં શતમ્ ભૂમીર્ ઉત સ્યુઃ ।
ન ત્વા વજ્રિન્ સહસ્રં સૂર્યા અનુ ન જાતમ્ અષ્ટ રોદસી ॥

આ પપ્રાથ મહિના વૃષ્ણ્યા વૃષન્ વિશ્વા શવિષ્ઠ શવસા ।
અસ્માઁ અવ મઘવન્ ગોમતિ વ્રજે વજ્રિઞ્ ચિત્રાભિર્ ઊતિભિઃ ॥

ન સીમ્ અદેવ આપદ્ ઇષં દીર્ઘાયો મર્ત્યઃ ।
એતગ્વા ચિદ્ ય એતશા યુયોજતે હરી ઇન્દ્રો યુયોજતે ॥

તં વો મહો મહાય્યમ્ ઇન્દ્રં દાનાય સક્ષણિમ્ ।
યો ગાધેષુ ય આરણેષુ હવ્યો વાજેષ્વ્ અસ્તિ હવ્યઃ ॥

ઉદ્ ઊ ષુ ણો વસો મહે મૃશસ્વ શૂર રાધસે ।
ઉદ્ ઊ ષુ મહ્યૈ મઘવન્ મઘત્તય ઉદ્ ઇન્દ્ર શ્રવસે મહે ॥

ત્વં ન ઇન્દ્ર ઋતયુસ્ ત્વાનિદો નિ તૃમ્પસિ ।
મધ્યે વસિષ્વ તુવિનૃમ્ણોર્વોર્ નિ દાસં શિશ્નથો હથૈઃ ॥

અન્યવ્રતમ્ અમાનુષમ્ અયજ્વાનમ્ અદેવયુમ્ ।
અવ સ્વઃ સખા દુધુવીત પર્વતઃ સુઘ્નાય દસ્યુમ્ પર્વતઃ ॥

ત્વં ન ઇન્દ્રાસાં હસ્તે શવિષ્ઠ દાવને ।
ધાનાનાં ન સં ગૃભાયાસ્મયુર્ દ્વિઃ સં ગૃભાયાસ્મયુઃ ॥

સખાયઃ ક્રતુમ્ ઇચ્છત કથા રાધામ શરસ્ય ।
ઉપસ્તુતિમ્ ભોજઃ સૂરિર્ યો અહ્રયઃ ॥

ભૂરિભિઃ સમહ ઋષિભિર્ બર્હિષ્મદ્ભિઃ સ્તવિષ્યસે ।
યદ્ ઇત્થમ્ એકમ્-એકમ્ ઇચ્ છર વત્સાન્ પરાદદઃ ॥

કર્ણગૃહ્યા મઘવા શૌરદેવ્યો વત્સં નસ્ ત્રિભ્ય આનયત્ ।
અજાં સૂરિર્ ન ધાતવે ॥