Rig Veda · Chapter 8.070

yo rājā carṣaṇīnāṁ yātā rathebhir adhriguḥ |
viśvāsāṁ tarutā pṛtanānāṁ jyeṣṭho yo vṛtrahā gṛṇe ||

indraṁ taṁ śumbha puruhanmann avase yasya dvitā vidhartari |
hastāya vajraḥ prati dhāyi darśato maho dive na sūryaḥ ||

nakiṣ ṭaṁ karmaṇā naśad yaś cakāra sadāvṛdham |
indraṁ na yajñair viśvagūrtam ṛbhvasam adhṛṣṭaṁ dhṛṣṇvojasam ||

aṣāḻham ugram pṛtanāsu sāsahiṁ yasmin mahīr urujrayaḥ |
saṁ dhenavo jāyamāne anonavur dyāvaḥ kṣāmo anonavuḥ ||

yad dyāva indra te śataṁ śatam bhūmīr uta syuḥ |
na tvā vajrin sahasraṁ sūryā anu na jātam aṣṭa rodasī ||

ā paprātha mahinā vṛṣṇyā vṛṣan viśvā śaviṣṭha śavasā |
asmām̐ ava maghavan gomati vraje vajriñ citrābhir ūtibhiḥ ||

na sīm adeva āpad iṣaṁ dīrghāyo martyaḥ |
etagvā cid ya etaśā yuyojate harī indro yuyojate ||

taṁ vo maho mahāyyam indraṁ dānāya sakṣaṇim |
yo gādheṣu ya āraṇeṣu havyo vājeṣv asti havyaḥ ||

ud ū ṣu ṇo vaso mahe mṛśasva śūra rādhase |
ud ū ṣu mahyai maghavan maghattaya ud indra śravase mahe ||

tvaṁ na indra ṛtayus tvānido ni tṛmpasi |
madhye vasiṣva tuvinṛmṇorvor ni dāsaṁ śiśnatho hathaiḥ ||

anyavratam amānuṣam ayajvānam adevayum |
ava svaḥ sakhā dudhuvīta parvataḥ sughnāya dasyum parvataḥ ||

tvaṁ na indrāsāṁ haste śaviṣṭha dāvane |
dhānānāṁ na saṁ gṛbhāyāsmayur dviḥ saṁ gṛbhāyāsmayuḥ ||

sakhāyaḥ kratum icchata kathā rādhāma śarasya |
upastutim bhojaḥ sūrir yo ahrayaḥ ||

bhūribhiḥ samaha ṛṣibhir barhiṣmadbhiḥ staviṣyase |
yad ittham ekam-ekam ic chara vatsān parādadaḥ ||

karṇagṛhyā maghavā śauradevyo vatsaṁ nas tribhya ānayat |
ajāṁ sūrir na dhātave ||