ઋગ્વેદ · અધ્યાય 8.069

પ્ર-પ્ર વસ્ ત્રિષ્ટુભમ્ ઇષમ્ મન્દદ્વીરાયેન્દવે ।
ધિયા વો મેધસાતયે પુરંધ્યા વિવાસતિ ॥

નદં વ ઓદતીનાં નદં યોયુવતીનામ્ ।
પતિં વો અઘ્ન્યાનાં ધેનૂનામ્ ઇષુધ્યસિ ॥

તા અસ્ય સૂદદોહસઃ સોમં શ્રીણન્તિ પૃશ્નયઃ ।
જન્મન્ દેવાનાં વિશસ્ ત્રિષ્વ્ આ રોચને દિવઃ ॥

અભિ પ્ર ગોપતિં ગિરેન્દ્રમ્ અર્ચ યથા વિદે ।
સૂનું સત્યસ્ય સત્પતિમ્ ॥

આ હરયઃ સસૃજ્રિરે ઽરુષીર્ અધિ બર્હિષિ ।
યત્રાભિ સંનવામહે ॥

ઇન્દ્રાય ગાવ આશિરં દુદુહ્રે વજ્રિણે મધુ ।
યત્ સીમ્ ઉપહ્વરે વિદત્ ॥

ઉદ્ યદ્ બ્રધ્નસ્ય વિષ્ટપં ગૃહમ્ ઇન્દ્રશ્ ચ ગન્વહિ ।
મધ્વઃ પીત્વા સચેવહિ ત્રિઃ સપ્ત સખ્યુઃ પદે ॥

અર્ચત પ્રાર્ચત પ્રિયમેધાસો અર્ચત ।
અર્ચન્તુ પુત્રકા ઉત પુરં ન ધૃષ્ણ્વ્ અર્ચત ॥

અવ સ્વરાતિ ગર્ગરો ગોધા પરિ સનિષ્વણત્ ।
પિઙ્ગા પરિ ચનિષ્કદદ્ ઇન્દ્રાય બ્રહ્મોદ્યતમ્ ॥

આ યત્ પતન્ત્ય્ એન્યઃ સુદુઘા અનપસ્ફુરઃ ।
અપસ્ફુરં ગૃભાયત સોમમ્ ઇન્દ્રાય પાતવે ॥

અપાદ્ ઇન્દ્રો અપાદ્ અગ્નિર્ વિશ્વે દેવા અમત્સત ।
વરુણ ઇદ્ ઇહ ક્ષયત્ તમ્ આપો અભ્ય્ અનૂષત વત્સં સંશિશ્વરીર્ ઇવ ॥

સુદેવો અસિ વરુણ યસ્ય તે સપ્ત સિન્ધવઃ ।
અનુક્ષરન્તિ કાકુદં સૂર્મ્યં સુષિરામ્ ઇવ ॥

યો વ્યતીઁર્ અફાણયત્ સુયુક્તાઁ ઉપ દાશુષે ।
તક્વો નેતા તદ્ ઇદ્ વપુર્ ઉપમા યો અમુચ્યત ॥

અતીદ્ ઉ શક્ર ઓહત ઇન્દ્રો વિશ્વા અતિ દ્વિષઃ ।
ભિનત્ કનીન ઓદનમ્ પચ્યમાનમ્ પરો ગિરા ॥

અર્ભકો ન કુમારકો ઽધિ તિષ્ઠન્ નવં રથમ્ ।
સ પક્ષન્ મહિષમ્ મૃગમ્ પિત્રે માત્રે વિભુક્રતુમ્ ॥

આ તૂ સુશિપ્ર દમ્પતે રથં તિષ્ઠા હિરણ્યયમ્ ।
અધ દ્યુક્ષં સચેવહિ સહસ્રપાદમ્ અરુષં સ્વસ્તિગામ્ અનેહસમ્ ॥

તં ઘેમ્ ઇત્થા નમસ્વિન ઉપ સ્વરાજમ્ આસતે ।
અર્થં ચિદ્ અસ્ય સુધિતં યદ્ એતવ આવર્તયન્તિ દાવને ॥

અનુ પ્રત્નસ્યૌકસઃ પ્રિયમેધાસ એષામ્ ।
પૂર્વામ્ અનુ પ્રયતિં વૃક્તબર્હિષો હિતપ્રયસ આશત ॥