ઋગ્વેદ · અધ્યાય 8.068

આ ત્વા રથં યથોતયે સુમ્નાય વર્તયામસિ ।
તુવિકૂર્મિમ્ ઋતીષહમ્ ઇન્દ્ર શવિષ્ઠ સત્પતે ॥

તુવિશુષ્મ તુવિક્રતો શચીવો વિશ્વયા મતે ।
આ પપ્રાથ મહિત્વના ॥

યસ્ય તે મહિના મહઃ પરિ જ્માયન્તમ્ ઈયતુઃ ।
હસ્તા વજ્રં હિરણ્યયમ્ ॥

વિશ્વાનરસ્ય વસ્ પતિમ્ અનાનતસ્ય શવસઃ ।
એવૈશ્ ચ ચર્ષણીનામ્ ઊતી હુવે રથાનામ્ ॥

અભિષ્ટયે સદાવૃધં સ્વર્મીળ્હેષુ યં નરઃ ।
નાના હવન્ત ઊતયે ॥

પરોમાત્રમ્ ઋચીષમમ્ ઇન્દ્રમ્ ઉગ્રં સુરાધસમ્ ।
ઈશાનં ચિદ્ વસૂનામ્ ॥

તં-તમ્ ઇદ્ રાધસે મહ ઇન્દ્રં ચોદામિ પીતયે ।
યઃ પૂર્વ્યામ્ અનુષ્ટુતિમ્ ઈશે કૃષ્ટીનાં નૃતુઃ ॥

ન યસ્ય તે શવસાન સખ્યમ્ આનંશ મર્ત્યઃ ।
નકિઃ શવાંસિ તે નશત્ ॥

ત્વોતાસસ્ ત્વા યુજાપ્સુ સૂર્યે મહદ્ ધનમ્ ।
જયેમ પૃત્સુ વજ્રિવઃ ॥

તં ત્વા યજ્ઞેભિર્ ઈમહે તં ગીર્ભિર્ ગિર્વણસ્તમ ।
ઇન્દ્ર યથા ચિદ્ આવિથ વાજેષુ પુરુમાય્યમ્ ॥

યસ્ય તે સ્વાદુ સખ્યં સ્વાદ્વી પ્રણીતિર્ અદ્રિવઃ ।
યજ્ઞો વિતન્તસાય્યઃ ॥

ઉરુ ણસ્ તન્વે3 તન ઉરુ ક્ષયાય નસ્ કૃધિ ।
ઉરુ ણો યન્ધિ જીવસે ॥

ઉરું નૃભ્ય ઉરું ગવ ઉરું રથાય પન્થામ્ ।
દેવવીતિમ્ મનામહે ॥

ઉપ મા ષડ્ દ્વા-દ્વા નરઃ સોમસ્ય હર્ષ્યા ।
તિષ્ઠન્તિ સ્વાદુરાતયઃ ॥

ઋજ્રાવ્ ઇન્દ્રોત આ દદે હરી ઋક્ષસ્ય સૂનવિ ।
આશ્વમેધસ્ય રોહિતા ॥

સુરથાઁ આતિથિગ્વે સ્વભીશૂઁર્ આર્ક્ષે ।
આશ્વમેધે સુપેશસઃ ॥

ષળ્ અશ્વાઁ આતિથિગ્વ ઇન્દ્રોતે વધૂમતઃ ।
સચા પૂતક્રતૌ સનમ્ ॥

ઐષુ ચેતદ્ વૃષણ્વત્ય્ અન્તર્ ઋજ્રેષ્વ્ અરુષી ।
સ્વભીશુઃ કશાવતી ॥

ન યુષ્મે વાજબન્ધવો નિનિત્સુશ્ ચન મર્ત્યઃ ।
અવદ્યમ્ અધિ દીધરત્ ॥