Rig Veda · Chapter 8.068

ā tvā rathaṁ yathotaye sumnāya vartayāmasi |
tuvikūrmim ṛtīṣaham indra śaviṣṭha satpate ||

tuviśuṣma tuvikrato śacīvo viśvayā mate |
ā paprātha mahitvanā ||

yasya te mahinā mahaḥ pari jmāyantam īyatuḥ |
hastā vajraṁ hiraṇyayam ||

viśvānarasya vas patim anānatasya śavasaḥ |
evaiś ca carṣaṇīnām ūtī huve rathānām ||

abhiṣṭaye sadāvṛdhaṁ svarmīḻheṣu yaṁ naraḥ |
nānā havanta ūtaye ||

paromātram ṛcīṣamam indram ugraṁ surādhasam |
īśānaṁ cid vasūnām ||

taṁ-tam id rādhase maha indraṁ codāmi pītaye |
yaḥ pūrvyām anuṣṭutim īśe kṛṣṭīnāṁ nṛtuḥ ||

na yasya te śavasāna sakhyam ānaṁśa martyaḥ |
nakiḥ śavāṁsi te naśat ||

tvotāsas tvā yujāpsu sūrye mahad dhanam |
jayema pṛtsu vajrivaḥ ||

taṁ tvā yajñebhir īmahe taṁ gīrbhir girvaṇastama |
indra yathā cid āvitha vājeṣu purumāyyam ||

yasya te svādu sakhyaṁ svādvī praṇītir adrivaḥ |
yajño vitantasāyyaḥ ||

uru ṇas tanve3 tana uru kṣayāya nas kṛdhi |
uru ṇo yandhi jīvase ||

uruṁ nṛbhya uruṁ gava uruṁ rathāya panthām |
devavītim manāmahe ||

upa mā ṣaḍ dvā-dvā naraḥ somasya harṣyā |
tiṣṭhanti svādurātayaḥ ||

ṛjrāv indrota ā dade harī ṛkṣasya sūnavi |
āśvamedhasya rohitā ||

surathām̐ ātithigve svabhīśūm̐r ārkṣe |
āśvamedhe supeśasaḥ ||

ṣaḻ aśvām̐ ātithigva indrote vadhūmataḥ |
sacā pūtakratau sanam ||

aiṣu cetad vṛṣaṇvaty antar ṛjreṣv aruṣī |
svabhīśuḥ kaśāvatī ||

na yuṣme vājabandhavo ninitsuś cana martyaḥ |
avadyam adhi dīdharat ||