ઋગ્વેદ · અધ્યાય 8.048

સ્વાદોર્ અભક્ષિ વયસઃ સુમેધાઃ સ્વાધ્યો વરિવોવિત્તરસ્ય ।
વિશ્વે યં દેવા ઉત મર્ત્યાસો મધુ બ્રુવન્તો અભિ સંચરન્તિ ॥

અન્તશ્ ચ પ્રાગા અદિતિર્ ભવાસ્ય્ અવયાતા હરસો દૈવ્યસ્ય ।
ઇન્દવ્ ઇન્દ્રસ્ય સખ્યં જુષાણઃ શ્રૌષ્ટીવ ધુરમ્ અનુ રાય ઋધ્યાઃ ॥

અપામ સોમમ્ અમૃતા અભૂમાગન્મ જ્યોતિર્ અવિદામ દેવાન્ ।
કિં નૂનમ્ અસ્માન્ કૃણવદ્ અરાતિઃ કિમ્ ઉ ધૂર્તિર્ અમૃત મર્ત્યસ્ય ॥

શં નો ભવ હૃદ આ પીત ઇન્દો પિતેવ સોમ સૂનવે સુશેવઃ ।
સખેવ સખ્ય ઉરુશંસ ધીરઃ પ્ર ણ આયુર્ જીવસે સોમ તારીઃ ॥

ઇમે મા પીતા યશસ ઉરુષ્યવો રથં ન ગાવઃ સમ્ અનાહ પર્વસુ ।
તે મા રક્ષન્તુ વિસ્રસશ્ ચરિત્રાદ્ ઉત મા સ્રામાદ્ યવયન્ત્વ્ ઇન્દવઃ ॥

અગ્નિં ન મા મથિતં સં દિદીપઃ પ્ર ચક્ષય કૃણુહિ વસ્યસો નઃ ।
અથા હિ તે મદ આ સોમ મન્યે રેવાઁ ઇવ પ્ર ચરા પુષ્ટિમ્ અચ્છ ॥

ઇષિરેણ તે મનસા સુતસ્ય ભક્ષીમહિ પિત્ર્યસ્યેવ રાયઃ ।
સોમ રાજન્ પ્ર ણ આયૂંષિ તારીર્ અહાનીવ સૂર્યો વાસરાણિ ॥

સોમ રાજન્ મૃળયા નઃ સ્વસ્તિ તવ સ્મસિ વ્રત્યા3સ્ તસ્ય વિદ્ધિ ।
અલર્તિ દક્ષ ઉત મન્યુર્ ઇન્દો મા નો અર્યો અનુકામમ્ પરા દાઃ ॥

ત્વં હિ નસ્ તન્વઃ સોમ ગોપા ગાત્રે-ગાત્રે નિષસત્થા નૃચક્ષાઃ ।
યત્ તે વયમ્ પ્રમિનામ વ્રતાનિ સ નો મૃળ સુષખા દેવ વસ્યઃ ॥

ઋદૂદરેણ સખ્યા સચેય યો મા ન રિષ્યેદ્ ધર્યશ્વ પીતઃ ।
અયં યઃ સોમો ન્ય્ અધાય્ય્ અસ્મે તસ્મા ઇન્દ્રમ્ પ્રતિરમ્ એમ્ય્ આયુઃ ॥

અપ ત્યા અસ્થુર્ અનિરા અમીવા નિર્ અત્રસન્ તમિષીચીર્ અભૈષુઃ ।
આ સોમો અસ્માઁ અરુહદ્ વિહાયા અગન્મ યત્ર પ્રતિરન્ત આયુઃ ॥

યો ન ઇન્દુઃ પિતરો હૃત્સુ પીતો ઽમર્ત્યો મર્ત્યાઁ આવિવેશ ।
તસ્મૈ સોમાય હવિષા વિધેમ મૃળીકે અસ્ય સુમતૌ સ્યામ ॥

ત્વં સોમ પિતૃભિઃ સંવિદાનો ઽનુ દ્યાવાપૃથિવી આ તતન્થ ।
તસ્મૈ ત ઇન્દો હવિષા વિધેમ વયં સ્યામ પતયો રયીણામ્ ॥

ત્રાતારો દેવા અધિ વોચતા નો મા નો નિદ્રા ઈશત મોત જલ્પિઃ ।
વયં સોમસ્ય વિશ્વહ પ્રિયાસઃ સુવીરાસો વિદથમ્ આ વદેમ ॥

ત્વં નઃ સોમ વિશ્વતો વયોધાસ્ ત્વં સ્વર્વિદ્ આ વિશા નૃચક્ષાઃ ।
ત્વં ન ઇન્દ ઊતિભિઃ સજોષાઃ પાહિ પશ્ચાતાદ્ ઉત વા પુરસ્તાત્ ॥