Rig Veda · Chapter 8.048

svādor abhakṣi vayasaḥ sumedhāḥ svādhyo varivovittarasya |
viśve yaṁ devā uta martyāso madhu bruvanto abhi saṁcaranti ||

antaś ca prāgā aditir bhavāsy avayātā haraso daivyasya |
indav indrasya sakhyaṁ juṣāṇaḥ śrauṣṭīva dhuram anu rāya ṛdhyāḥ ||

apāma somam amṛtā abhūmāganma jyotir avidāma devān |
kiṁ nūnam asmān kṛṇavad arātiḥ kim u dhūrtir amṛta martyasya ||

śaṁ no bhava hṛda ā pīta indo piteva soma sūnave suśevaḥ |
sakheva sakhya uruśaṁsa dhīraḥ pra ṇa āyur jīvase soma tārīḥ ||

ime mā pītā yaśasa uruṣyavo rathaṁ na gāvaḥ sam anāha parvasu |
te mā rakṣantu visrasaś caritrād uta mā srāmād yavayantv indavaḥ ||

agniṁ na mā mathitaṁ saṁ didīpaḥ pra cakṣaya kṛṇuhi vasyaso naḥ |
athā hi te mada ā soma manye revām̐ iva pra carā puṣṭim accha ||

iṣireṇa te manasā sutasya bhakṣīmahi pitryasyeva rāyaḥ |
soma rājan pra ṇa āyūṁṣi tārīr ahānīva sūryo vāsarāṇi ||

soma rājan mṛḻayā naḥ svasti tava smasi vratyā3s tasya viddhi |
alarti dakṣa uta manyur indo mā no aryo anukāmam parā dāḥ ||

tvaṁ hi nas tanvaḥ soma gopā gātre-gātre niṣasatthā nṛcakṣāḥ |
yat te vayam pramināma vratāni sa no mṛḻa suṣakhā deva vasyaḥ ||

ṛdūdareṇa sakhyā saceya yo mā na riṣyed dharyaśva pītaḥ |
ayaṁ yaḥ somo ny adhāyy asme tasmā indram pratiram emy āyuḥ ||

apa tyā asthur anirā amīvā nir atrasan tamiṣīcīr abhaiṣuḥ |
ā somo asmām̐ aruhad vihāyā aganma yatra pratiranta āyuḥ ||

yo na induḥ pitaro hṛtsu pīto 'martyo martyām̐ āviveśa |
tasmai somāya haviṣā vidhema mṛḻīke asya sumatau syāma ||

tvaṁ soma pitṛbhiḥ saṁvidāno 'nu dyāvāpṛthivī ā tatantha |
tasmai ta indo haviṣā vidhema vayaṁ syāma patayo rayīṇām ||

trātāro devā adhi vocatā no mā no nidrā īśata mota jalpiḥ |
vayaṁ somasya viśvaha priyāsaḥ suvīrāso vidatham ā vadema ||

tvaṁ naḥ soma viśvato vayodhās tvaṁ svarvid ā viśā nṛcakṣāḥ |
tvaṁ na inda ūtibhiḥ sajoṣāḥ pāhi paścātād uta vā purastāt ||