ઋગ્વેદ · અધ્યાય 8.033

વયં ઘ ત્વા સુતાવન્ત આપો ન વૃક્તબર્હિષઃ ।
પવિત્રસ્ય પ્રસ્રવણેષુ વૃત્રહન્ પરિ સ્તોતાર આસતે ॥

સ્વરન્તિ ત્વા સુતે નરો વસો નિરેક ઉક્થિનઃ ।
કદા સુતં તૃષાણ ઓક આ ગમ ઇન્દ્ર સ્વબ્દીવ વંસગઃ ॥

કણ્વેભિર્ ધૃષ્ણવ્ આ ધૃષદ્ વાજં દર્ષિ સહસ્રિણમ્ ।
પિશઙ્ગરૂપમ્ મઘવન્ વિચર્ષણે મક્ષૂ ગોમન્તમ્ ઈમહે ॥

પાહિ ગાયાન્ધસો મદ ઇન્દ્રાય મેધ્યાતિથે ।
યઃ સમ્મિશ્લો હર્યોર્ યઃ સુતે સચા વજ્રી રથો હિરણ્યયઃ ॥

યઃ સુષવ્યઃ સુદક્ષિણ ઇનો યઃ સુક્રતુર્ ગૃણે ।
ય આકરઃ સહસ્રા યઃ શતામઘ ઇન્દ્રો યઃ પૂર્ભિદ્ આરિતઃ ॥

યો ધૃષિતો યો ઽવૃતો યો અસ્તિ શ્મશ્રુષુ શ્રિતઃ ।
વિભૂતદ્યુમ્નશ્ ચ્યવનઃ પુરુષ્ટુતઃ ક્રત્વા ગૌર્ ઇવ શાકિનઃ ॥

ક ઈં વેદ સુતે સચા પિબન્તં કદ્ વયો દધે ।
અયં યઃ પુરો વિભિનત્ત્ય્ ઓજસા મન્દાનઃ શિપ્ર્ય્ અન્ધસઃ ॥

દાના મૃગો ન વારણઃ પુરુત્રા ચરથં દધે ।
નકિષ્ ટ્વા નિ યમદ્ આ સુતે ગમો મહાઁશ્ ચરસ્ય્ ઓજસા ॥

ય ઉગ્રઃ સન્ન્ અનિષ્ટૃતઃ સ્થિરો રણાય સંસ્કૃતઃ ।
યદિ સ્તોતુર્ મઘવા શૃણવદ્ ધવં નેન્દ્રો યોષત્ય્ આ ગમત્ ॥

સત્યમ્ ઇત્થા વૃષેદ્ અસિ વૃષજૂતિર્ નો ઽવૃતઃ ।
વૃષા હ્ય્ ઉગ્ર શૃણ્વિષે પરાવતિ વૃષો અર્વાવતિ શ્રુતઃ ॥

વૃષણસ્ તે અભીશવો વૃષા કશા હિરણ્યયી ।
વૃષા રથો મઘવન્ વૃષણા હરી વૃષા ત્વં શતક્રતો ॥

વૃષા સોતા સુનોતુ તે વૃષન્ન્ ઋજીપિન્ન્ આ ભર ।
વૃષા દધન્વે વૃષણં નદીષ્વ્ આ તુભ્યં સ્થાતર્ હરીણામ્ ॥

એન્દ્ર યાહિ પીતયે મધુ શવિષ્ઠ સોમ્યમ્ ।
નાયમ્ અચ્છા મઘવા શૃણવદ્ ગિરો બ્રહ્મોક્થા ચ સુક્રતુઃ ॥

વહન્તુ ત્વા રથેષ્ઠામ્ આ હરયો રથયુજઃ ।
તિરશ્ ચિદ્ અર્યં સવનાનિ વૃત્રહન્ન્ અન્યેષાં યા શતક્રતો ॥

અસ્માકમ્ અદ્યાન્તમં સ્તોમં ધિષ્વ મહામહ ।
અસ્માકં તે સવના સન્તુ શંતમા મદાય દ્યુક્ષ સોમપાઃ ॥

નહિ ષસ્ તવ નો મમ શાસ્ત્રે અન્યસ્ય રણ્યતિ ।
યો અસ્માન્ વીર આનયત્ ॥

ઇન્દ્રશ્ ચિદ્ ઘા તદ્ અબ્રવીત્ સ્ત્રિયા અશાસ્યમ્ મનઃ ।
ઉતો અહ ક્રતું રઘુમ્ ॥

સપ્તી ચિદ્ ઘા મદચ્યુતા મિથુના વહતો રથમ્ ।
એવેદ્ ધૂર્ વૃષ્ણ ઉત્તરા ॥

અધઃ પશ્યસ્વ મોપરિ સંતરામ્ પાદકૌ હર ।
મા તે કશપ્લકૌ દૃશન્ સ્ત્રી હિ બ્રહ્મા બભૂવિથ ॥