Rig Veda · Chapter 8.033

vayaṁ gha tvā sutāvanta āpo na vṛktabarhiṣaḥ |
pavitrasya prasravaṇeṣu vṛtrahan pari stotāra āsate ||

svaranti tvā sute naro vaso nireka ukthinaḥ |
kadā sutaṁ tṛṣāṇa oka ā gama indra svabdīva vaṁsagaḥ ||

kaṇvebhir dhṛṣṇav ā dhṛṣad vājaṁ darṣi sahasriṇam |
piśaṅgarūpam maghavan vicarṣaṇe makṣū gomantam īmahe ||

pāhi gāyāndhaso mada indrāya medhyātithe |
yaḥ sammiślo haryor yaḥ sute sacā vajrī ratho hiraṇyayaḥ ||

yaḥ suṣavyaḥ sudakṣiṇa ino yaḥ sukratur gṛṇe |
ya ākaraḥ sahasrā yaḥ śatāmagha indro yaḥ pūrbhid āritaḥ ||

yo dhṛṣito yo 'vṛto yo asti śmaśruṣu śritaḥ |
vibhūtadyumnaś cyavanaḥ puruṣṭutaḥ kratvā gaur iva śākinaḥ ||

ka īṁ veda sute sacā pibantaṁ kad vayo dadhe |
ayaṁ yaḥ puro vibhinatty ojasā mandānaḥ śipry andhasaḥ ||

dānā mṛgo na vāraṇaḥ purutrā carathaṁ dadhe |
nakiṣ ṭvā ni yamad ā sute gamo mahām̐ś carasy ojasā ||

ya ugraḥ sann aniṣṭṛtaḥ sthiro raṇāya saṁskṛtaḥ |
yadi stotur maghavā śṛṇavad dhavaṁ nendro yoṣaty ā gamat ||

satyam itthā vṛṣed asi vṛṣajūtir no 'vṛtaḥ |
vṛṣā hy ugra śṛṇviṣe parāvati vṛṣo arvāvati śrutaḥ ||

vṛṣaṇas te abhīśavo vṛṣā kaśā hiraṇyayī |
vṛṣā ratho maghavan vṛṣaṇā harī vṛṣā tvaṁ śatakrato ||

vṛṣā sotā sunotu te vṛṣann ṛjīpinn ā bhara |
vṛṣā dadhanve vṛṣaṇaṁ nadīṣv ā tubhyaṁ sthātar harīṇām ||

endra yāhi pītaye madhu śaviṣṭha somyam |
nāyam acchā maghavā śṛṇavad giro brahmokthā ca sukratuḥ ||

vahantu tvā ratheṣṭhām ā harayo rathayujaḥ |
tiraś cid aryaṁ savanāni vṛtrahann anyeṣāṁ yā śatakrato ||

asmākam adyāntamaṁ stomaṁ dhiṣva mahāmaha |
asmākaṁ te savanā santu śaṁtamā madāya dyukṣa somapāḥ ||

nahi ṣas tava no mama śāstre anyasya raṇyati |
yo asmān vīra ānayat ||

indraś cid ghā tad abravīt striyā aśāsyam manaḥ |
uto aha kratuṁ raghum ||

saptī cid ghā madacyutā mithunā vahato ratham |
eved dhūr vṛṣṇa uttarā ||

adhaḥ paśyasva mopari saṁtarām pādakau hara |
mā te kaśaplakau dṛśan strī hi brahmā babhūvitha ||