ઋગ્વેદ · અધ્યાય 7.045

આ દેવો યાતુ સવિતા સુરત્નો ઽન્તરિક્ષપ્રા વહમાનો અશ્વૈઃ ।
હસ્તે દધાનો નર્યા પુરૂણિ નિવેશયઞ્ ચ પ્રસુવઞ્ ચ ભૂમ ॥

ઉદ્ અસ્ય બાહૂ શિથિરા બૃહન્તા હિરણ્યયા દિવો અન્તાઁ અનષ્ટામ્ ।
નૂનં સો અસ્ય મહિમા પનિષ્ટ સૂરશ્ ચિદ્ અસ્મા અનુ દાદ્ અપસ્યામ્ ॥

સ ઘા નો દેવઃ સવિતા સહાવા સાવિષદ્ વસુપતિર્ વસૂનિ ।
વિશ્રયમાણો અમતિમ્ ઉરૂચીમ્ મર્તભોજનમ્ અધ રાસતે નઃ ॥

ઇમા ગિરઃ સવિતારં સુજિહ્વમ્ પૂર્ણગભસ્તિમ્ ઈળતે સુપાણિમ્ ।
ચિત્રં વયો બૃહદ્ અસ્મે દધાતુ યૂયમ્ પાત સ્વસ્તિભિઃ સદા નઃ ॥