ઋગ્વેદ · અધ્યાય 6.046

ત્વામ્ ઇદ્ ધિ હવામહે સાતા વાજસ્ય કારવઃ ।
ત્વાં વૃત્રેષ્વ્ ઇન્દ્ર સત્પતિં નરસ્ ત્વાં કાષ્ઠાસ્વ્ અર્વતઃ ॥

સ ત્વં નશ્ ચિત્ર વજ્રહસ્ત ધૃષ્ણુયા મહઃ સ્તવાનો અદ્રિવઃ ।
ગામ્ અશ્વં રથ્યમ્ ઇન્દ્ર સં કિર સત્રા વાજં ન જિગ્યુષે ॥

યઃ સત્રાહા વિચર્ષણિર્ ઇન્દ્રં તં હૂમહે વયમ્ ।
સહસ્રમુષ્ક તુવિનૃમ્ણ સત્પતે ભવા સમત્સુ નો વૃધે ॥

બાધસે જનાન્ વૃષભેવ મન્યુના ઘૃષૌ મીળ્હ ઋચીષમ ।
અસ્માકમ્ બોધ્ય્ અવિતા મહાધને તનૂષ્વ્ અપ્સુ સૂર્યે ॥

ઇન્દ્ર જ્યેષ્ઠં ન આ ભરઁ ઓજિષ્ઠમ્ પપુરિ શ્રવઃ ।
યેનેમે ચિત્ર વજ્રહસ્ત રોદસી ઓભે સુશિપ્ર પ્રાઃ ॥

ત્વામ્ ઉગ્રમ્ અવસે ચર્ષણીસહં રાજન્ દેવેષુ હૂમહે ।
વિશ્વા સુ નો વિથુરા પિબ્દના વસો ઽમિત્રાન્ સુષહાન્ કૃધિ ॥

યદ્ ઇન્દ્ર નાહુષીષ્વ્ આઁ ઓજો નૃમ્ણં ચ કૃષ્ટિષુ ।
યદ્ વા પઞ્ચ ક્ષિતીનાં દ્યુમ્નમ્ આ ભર સત્રા વિશ્વાનિ પૌંસ્યા ॥

યદ્ વા તૃક્ષૌ મઘવન્ દ્રુહ્યાવ્ આ જને યત્ પૂરૌ કચ્ ચ વૃષ્ણ્યમ્ ।
અસ્મભ્યં તદ્ રિરીહિ સં નૃષાહ્યે ઽમિત્રાન્ પૃત્સુ તુર્વણે ॥

ઇન્દ્ર ત્રિધાતુ શરણં ત્રિવરૂથં સ્વસ્તિમત્ ।
છર્દિર્ યચ્છ મઘવદ્ભ્યશ્ ચ મહ્યં ચ યાવયા દિદ્યુમ્ એભ્યઃ ॥

યે ગવ્યતા મનસા શત્રુમ્ આદભુર્ અભિપ્રઘ્નન્તિ ધૃષ્ણુયા ।
અધ સ્મા નો મઘવન્ન્ ઇન્દ્ર ગિર્વણસ્ તનૂપા અન્તમો ભવ ॥

અધ સ્મા નો વૃધે ભવેન્દ્ર નાયમ્ અવા યુધિ ।
યદ્ અન્તરિક્ષે પતયન્તિ પર્ણિનો દિદ્યવસ્ તિગ્મમૂર્ધાનઃ ॥

યત્ર શૂરાસસ્ તન્વો વિતન્વતે પ્રિયા શર્મ પિતૄણામ્ ।
અધ સ્મા યચ્છ તન્વે3 તને ચ છર્દિર્ અચિત્તં યાવય દ્વેષઃ ॥

યદ્ ઇન્દ્ર સર્ગે અર્વતશ્ ચોદયાસે મહાધને ।
અસમને અધ્વનિ વૃજિને પથિ શ્યેનાઁ ઇવ શ્રવસ્યતઃ ॥

સિન્ધૂઁર્ ઇવ પ્રવણ આશુયા યતો યદિ ક્લોશમ્ અનુ ષ્વણિ ।
આ યે વયો ન વર્વૃતત્ય્ આમિષિ ગૃભીતા બાહ્વોર્ ગવિ ॥