ઋગ્વેદ · અધ્યાય 6.047

સ્વાદુષ્ કિલાયમ્ મધુમાઁ ઉતાયં તીવ્રઃ કિલાયં રસવાઁ ઉતાયમ્ ।
ઉતો ન્વ્ અ1સ્ય પપિવાંસમ્ ઇન્દ્રં ન કશ્ ચન સહત આહવેષુ ॥

અયં સ્વાદુર્ ઇહ મદિષ્ઠ આસ યસ્યેન્દ્રો વૃત્રહત્યે મમાદ ।
પુરૂણિ યશ્ ચ્યૌત્ના શમ્બરસ્ય વિ નવતિં નવ ચ દેહ્યો3 હન્ ॥

અયમ્ મે પીત ઉદ્ ઇયર્તિ વાચમ્ અયમ્ મનીષામ્ ઉશતીમ્ અજીગઃ ।
અયં ષળ્ ઉર્વીર્ અમિમીત ધીરો ન યાભ્યો ભુવનં કચ્ ચનારે ॥

અયં સ યો વરિમાણમ્ પૃથિવ્યા વર્ષ્માણં દિવો અકૃણોદ્ અયં સઃ ।
અયમ્ પીયૂષં તિસૃષુ પ્રવત્સુ સોમો દાધારોર્વ્ અ1ન્તરિક્ષમ્ ॥

અયં વિદચ્ ચિત્રદૃશીકમ્ અર્ણઃ શુક્રસદ્મનામ્ ઉષસામ્ અનીકે ।
અયમ્ મહાન્ મહતા સ્કમ્ભનેનોદ્ દ્યામ્ અસ્તભ્નાદ્ વૃષભો મરુત્વાન્ ॥

ધૃષત્ પિબ કલશે સોમમ્ ઇન્દ્ર વૃત્રહા શૂર સમરે વસૂનામ્ ।
માધ્યંદિને સવન આ વૃષસ્વ રયિસ્થાનો રયિમ્ અસ્માસુ ધેહિ ॥

ઇન્દ્ર પ્ર ણઃ પુરએતેવ પશ્ય પ્ર નો નય પ્રતરં વસ્યો અચ્છ ।
ભવા સુપારો અતિપારયો નો ભવા સુનીતિર્ ઉત વામનીતિઃ ॥

ઉરું નો લોકમ્ અનુ નેષિ વિદ્વાન્ સ્વર્વજ્ જ્યોતિર્ અભયં સ્વસ્તિ ।
ઋષ્વા ત ઇન્દ્ર સ્થવિરસ્ય બાહૂ ઉપ સ્થેયામ શરણા બૃહન્તા ॥

વરિષ્ઠે ન ઇન્દ્ર વન્ધુરે ધા વહિષ્ઠયોઃ શતાવન્ન્ અશ્વયોર્ આ ।
ઇષમ્ આ વક્ષીષાં વર્ષિષ્ઠામ્ મા નસ્ તારીન્ મઘવન્ રાયો અર્યઃ ॥

ઇન્દ્ર મૃળ મહ્યં જીવાતુમ્ ઇચ્છ ચોદય ધિયમ્ અયસો ન ધારામ્ ।
યત્ કિં ચાહં ત્વાયુર્ ઇદં વદામિ તજ્ જુષસ્વ કૃધિ મા દેવવન્તમ્ ॥

ત્રાતારમ્ ઇન્દ્રમ્ અવિતારમ્ ઇન્દ્રં હવે-હવે સુહવં શૂરમ્ ઇન્દ્રમ્ ।
હ્વયામિ શક્રમ્ પુરુહૂતમ્ ઇન્દ્રં સ્વસ્તિ નો મઘવા ધાત્વ્ ઇન્દ્રઃ ॥

ઇન્દ્રઃ સુત્રામા સ્વવાઁ અવોભિઃ સુમૃળીકો ભવતુ વિશ્વવેદાઃ ।
બાધતાં દ્વેષો અભયં કૃણોતુ સુવીર્યસ્ય પતયઃ સ્યામ ॥

તસ્ય વયં સુમતૌ યજ્ઞિયસ્યાપિ ભદ્રે સૌમનસે સ્યામ ।
સ સુત્રામા સ્વવાઁ ઇન્દ્રો અસ્મે આરાચ્ ચિદ્ દ્વેષઃ સનુતર્ યુયોતુ ॥

અવ ત્વે ઇન્દ્ર પ્રવતો નોર્મિર્ ગિરો બ્રહ્માણિ નિયુતો ધવન્તે ।
ઉરૂ ન રાધઃ સવના પુરૂણ્ય્ અપો ગા વજ્રિન્ યુવસે સમ્ ઇન્દૂન્ ॥

ક ઈં સ્તવત્ કઃ પૃણાત્ કો યજાતે યદ્ ઉગ્રમ્ ઇન્ મઘવા વિશ્વહાવેત્ ।
પાદાવ્ ઇવ પ્રહરન્ન્ અન્યમ્-અન્યં કૃણોતિ પૂર્વમ્ અપરં શચીભિઃ ॥

શૃણ્વે વીર ઉગ્રમ્-ઉગ્રં દમાયન્ન્ અન્યમ્-અન્યમ્ અતિનેનીયમાનઃ ।
એધમાનદ્વિળ્ ઉભયસ્ય રાજા ચોષ્કૂયતે વિશ ઇન્દ્રો મનુષ્યાન્ ॥

પરા પૂર્વેષાં સખ્યા વૃણક્તિ વિતર્તુરાણો અપરેભિર્ એતિ ।
અનાનુભૂતીર્ અવધૂન્વાનઃ પૂર્વીર્ ઇન્દ્રઃ શરદસ્ તર્તરીતિ ॥

રૂપં-રૂપમ્ પ્રતિરૂપો બભૂવ તદ્ અસ્ય રૂપમ્ પ્રતિચક્ષણાય ।
ઇન્દ્રો માયાભિઃ પુરુરૂપ ઈયતે યુક્તા હ્ય્ અસ્ય હરયઃ શતા દશ ॥

યુજાનો હરિતા રથે ભૂરિ ત્વષ્ટેહ રાજતિ ।
કો વિશ્વાહા દ્વિષતઃ પક્ષ આસત ઉતાસીનેષુ સૂરિષુ ॥

અગવ્યૂતિ ક્ષેત્રમ્ આગન્મ દેવા ઉર્વી સતી ભૂમિર્ અંહૂરણાભૂત્ ।
બૃહસ્પતે પ્ર ચિકિત્સા ગવિષ્ટાવ્ ઇત્થા સતે જરિત્ર ઇન્દ્ર પન્થામ્ ॥

દિવે-દિવે સદૃશીર્ અન્યમ્ અર્ધં કૃષ્ણા અસેધદ્ અપ સદ્મનો જાઃ ।
અહન્ દાસા વૃષભો વસ્નયન્તોદવ્રજે વર્ચિનં શમ્બરં ચ ॥

પ્રસ્તોક ઇન્ નુ રાધસસ્ ત ઇન્દ્ર દશ કોશયીર્ દશ વાજિનો ઽદાત્ ।
દિવોદાસાદ્ અતિથિગ્વસ્ય રાધઃ શામ્બરં વસુ પ્રત્ય્ અગ્રભીષ્મ ॥

દશાશ્વાન્ દશ કોશાન્ દશ વસ્ત્રાધિભોજના ।
દશો હિરણ્યપિણ્ડાન્ દિવોદાસાદ્ અસાનિષમ્ ॥

દશ રથાન્ પ્રષ્ટિમતઃ શતં ગા અથર્વભ્યઃ ।
અશ્વથઃ પાયવે ઽદાત્ ॥

મહિ રાધો વિશ્વજન્યં દધાનાન્ ભરદ્વાજાન્ સાર્ઞ્જયો અભ્ય્ અયષ્ટ ॥

વનસ્પતે વીડ્વઙ્ગો હિ ભૂયા અસ્મત્સખા પ્રતરણઃ સુવીરઃ ।
ગોભિઃ સંનદ્ધો અસિ વીળયસ્વાસ્થાતા તે જયતુ જેત્વાનિ ॥

દિવસ્ પૃથિવ્યાઃ પર્ય્ ઓજ ઉદ્ભૃતં વનસ્પતિભ્યઃ પર્ય્ આભૃતં સહઃ ।
અપામ્ ઓજ્માનમ્ પરિ ગોભિર્ આવૃતમ્ ઇન્દ્રસ્ય વજ્રં હવિષા રથં યજ ॥

ઇન્દ્રસ્ય વજ્રો મરુતામ્ અનીકમ્ મિત્રસ્ય ગર્ભો વરુણસ્ય નાભિઃ ।
સેમાં નો હવ્યદાતિં જુષાણો દેવ રથ પ્રતિ હવ્યા ગૃભાય ॥

ઉપ શ્વાસય પૃથિવીમ્ ઉત દ્યામ્ પુરુત્રા તે મનુતાં વિષ્ઠિતં જગત્ ।
સ દુન્દુભે સજૂર્ ઇન્દ્રેણ દેવૈર્ દૂરાદ્ દવીયો અપ સેધ શત્રૂન્ ॥

આ ક્રન્દય બલમ્ ઓજો ન આ ધા નિઃ ષ્ટનિહિ દુરિતા બાધમાનઃ ।
અપ પ્રોથ દુન્દુભે દુચ્છુના ઇત ઇન્દ્રસ્ય મુષ્ટિર્ અસિ વીળયસ્વ ॥

આમૂર્ અજ પ્રત્યાવર્તયેમાઃ કેતુમદ્ દુન્દુભિર્ વાવદીતિ ।
સમ્ અશ્વપર્ણાશ્ ચરન્તિ નો નરો ઽસ્માકમ્ ઇન્દ્ર રથિનો જયન્તુ ॥