Rig Veda · Chapter 6.046

tvām id dhi havāmahe sātā vājasya kāravaḥ |
tvāṁ vṛtreṣv indra satpatiṁ naras tvāṁ kāṣṭhāsv arvataḥ ||

sa tvaṁ naś citra vajrahasta dhṛṣṇuyā mahaḥ stavāno adrivaḥ |
gām aśvaṁ rathyam indra saṁ kira satrā vājaṁ na jigyuṣe ||

yaḥ satrāhā vicarṣaṇir indraṁ taṁ hūmahe vayam |
sahasramuṣka tuvinṛmṇa satpate bhavā samatsu no vṛdhe ||

bādhase janān vṛṣabheva manyunā ghṛṣau mīḻha ṛcīṣama |
asmākam bodhy avitā mahādhane tanūṣv apsu sūrye ||

indra jyeṣṭhaṁ na ā bharam̐ ojiṣṭham papuri śravaḥ |
yeneme citra vajrahasta rodasī obhe suśipra prāḥ ||

tvām ugram avase carṣaṇīsahaṁ rājan deveṣu hūmahe |
viśvā su no vithurā pibdanā vaso 'mitrān suṣahān kṛdhi ||

yad indra nāhuṣīṣv ām̐ ojo nṛmṇaṁ ca kṛṣṭiṣu |
yad vā pañca kṣitīnāṁ dyumnam ā bhara satrā viśvāni pauṁsyā ||

yad vā tṛkṣau maghavan druhyāv ā jane yat pūrau kac ca vṛṣṇyam |
asmabhyaṁ tad rirīhi saṁ nṛṣāhye 'mitrān pṛtsu turvaṇe ||

indra tridhātu śaraṇaṁ trivarūthaṁ svastimat |
chardir yaccha maghavadbhyaś ca mahyaṁ ca yāvayā didyum ebhyaḥ ||

ye gavyatā manasā śatrum ādabhur abhipraghnanti dhṛṣṇuyā |
adha smā no maghavann indra girvaṇas tanūpā antamo bhava ||

adha smā no vṛdhe bhavendra nāyam avā yudhi |
yad antarikṣe patayanti parṇino didyavas tigmamūrdhānaḥ ||

yatra śūrāsas tanvo vitanvate priyā śarma pitṝṇām |
adha smā yaccha tanve3 tane ca chardir acittaṁ yāvaya dveṣaḥ ||

yad indra sarge arvataś codayāse mahādhane |
asamane adhvani vṛjine pathi śyenām̐ iva śravasyataḥ ||

sindhūm̐r iva pravaṇa āśuyā yato yadi klośam anu ṣvaṇi |
ā ye vayo na varvṛtaty āmiṣi gṛbhītā bāhvor gavi ||