ઋગ્વેદ · અધ્યાય 5.080

દ્યુતદ્યામાનમ્ બૃહતીમ્ ઋતેન ઋતાવરીમ્ અરુણપ્સું વિભાતીમ્ ।
દેવીમ્ ઉષસં સ્વર્ આવહન્તીમ્ પ્રતિ વિપ્રાસો મતિભિર્ જરન્તે ॥

એષા જનં દર્શતા બોધયન્તી સુગાન્ પથઃ કૃણ્વતી યાત્ય્ અગ્રે ।
બૃહદ્રથા બૃહતી વિશ્વમિન્વોષા જ્યોતિર્ યચ્છત્ય્ અગ્રે અહ્નામ્ ॥

એષા ગોભિર્ અરુણેભિર્ યુજાનાસ્રેધન્તી રયિમ્ અપ્રાયુ ચક્રે ।
પથો રદન્તી સુવિતાય દેવી પુરુષ્ટુતા વિશ્વવારા વિ ભાતિ ॥

એષા વ્યેની ભવતિ દ્વિબર્હા આવિષ્કૃણ્વાના તન્વમ્ પુરસ્તાત્ ।
ઋતસ્ય પન્થામ્ અન્વ્ એતિ સાધુ પ્રજાનતીવ ન દિશો મિનાતિ ॥

એષા શુભ્રા ન તન્વો વિદાનોર્ધ્વેવ સ્નાતી દૃશયે નો અસ્થાત્ ।
અપ દ્વેષો બાધમાના તમાંસ્ય્ ઉષા દિવો દુહિતા જ્યોતિષાગાત્ ॥

એષા પ્રતીચી દુહિતા દિવો નૄન્ યોષેવ ભદ્રા નિ રિણીતે અપ્સઃ ।
વ્યૂર્ણ્વતી દાશુષે વાર્યાણિ પુનર્ જ્યોતિર્ યુવતિઃ પૂર્વથાકઃ ॥