ઋગ્વેદ · અધ્યાય 4.050

યસ્ તસ્તમ્ભ સહસા વિ જ્મો અન્તાન્ બૃહસ્પતિસ્ ત્રિષધસ્થો રવેણ ।
તમ્ પ્રત્નાસ ઋષયો દીધ્યાનાઃ પુરો વિપ્રા દધિરે મન્દ્રજિહ્વમ્ ॥

ધુનેતયઃ સુપ્રકેતમ્ મદન્તો બૃહસ્પતે અભિ યે નસ્ તતસ્રે ।
પૃષન્તં સૃપ્રમ્ અદબ્ધમ્ ઊર્વમ્ બૃહસ્પતે રક્ષતાદ્ અસ્ય યોનિમ્ ॥

બૃહસ્પતે યા પરમા પરાવદ્ અત આ ત ઋતસ્પૃશો નિ ષેદુઃ ।
તુભ્યં ખાતા અવતા અદ્રિદુગ્ધા મધ્વઃ શ્ચોતન્ત્ય્ અભિતો વિરપ્શમ્ ॥

બૃહસ્પતિઃ પ્રથમં જાયમાનો મહો જ્યોતિષઃ પરમે વ્યોમન્ ।
સપ્તાસ્યસ્ તુવિજાતો રવેણ વિ સપ્તરશ્મિર્ અધમત્ તમાંસિ ॥

સ સુષ્ટુભા સ ઋક્વતા ગણેન વલં રુરોજ ફલિગં રવેણ ।
બૃહસ્પતિર્ ઉસ્રિયા હવ્યસૂદઃ કનિક્રદદ્ વાવશતીર્ ઉદ્ આજત્ ॥

એવા પિત્રે વિશ્વદેવાય વૃષ્ણે યજ્ઞૈર્ વિધેમ નમસા હવિર્ભિઃ ।
બૃહસ્પતે સુપ્રજા વીરવન્તો વયં સ્યામ પતયો રયીણામ્ ॥

સ ઇદ્ રાજા પ્રતિજન્યાનિ વિશ્વા શુષ્મેણ તસ્થાવ્ અભિ વીર્યેણ ।
બૃહસ્પતિં યઃ સુભૃતમ્ બિભર્તિ વલ્ગૂયતિ વન્દતે પૂર્વભાજમ્ ॥

સ ઇત્ ક્ષેતિ સુધિત ઓકસિ સ્વે તસ્મા ઇળા પિન્વતે વિશ્વદાનીમ્ ।
તસ્મૈ વિશઃ સ્વયમ્ એવા નમન્તે યસ્મિન્ બ્રહ્મા રાજનિ પૂર્વ એતિ ॥

અપ્રતીતો જયતિ સં ધનાનિ પ્રતિજન્યાન્ય્ ઉત યા સજન્યા ।
અવસ્યવે યો વરિવઃ કૃણોતિ બ્રહ્મણે રાજા તમ્ અવન્તિ દેવાઃ ॥

ઇન્દ્રશ્ ચ સોમમ્ પિબતમ્ બૃહસ્પતે ઽસ્મિન્ યજ્ઞે મન્દસાના વૃષણ્વસૂ ।
આ વાં વિશન્ત્વ્ ઇન્દવઃ સ્વાભુવો ઽસ્મે રયિં સર્વવીરં નિ યચ્છતમ્ ॥

બૃહસ્પત ઇન્દ્ર વર્ધતં નઃ સચા સા વાં સુમતિર્ ભૂત્વ્ અસ્મે ।
અવિષ્ટં ધિયો જિગૃતમ્ પુરંધીર્ જજસ્તમ્ અર્યો વનુષામ્ અરાતીઃ ॥