Rig Veda · Chapter 4.050

yas tastambha sahasā vi jmo antān bṛhaspatis triṣadhastho raveṇa |
tam pratnāsa ṛṣayo dīdhyānāḥ puro viprā dadhire mandrajihvam ||

dhunetayaḥ supraketam madanto bṛhaspate abhi ye nas tatasre |
pṛṣantaṁ sṛpram adabdham ūrvam bṛhaspate rakṣatād asya yonim ||

bṛhaspate yā paramā parāvad ata ā ta ṛtaspṛśo ni ṣeduḥ |
tubhyaṁ khātā avatā adridugdhā madhvaḥ ścotanty abhito virapśam ||

bṛhaspatiḥ prathamaṁ jāyamāno maho jyotiṣaḥ parame vyoman |
saptāsyas tuvijāto raveṇa vi saptaraśmir adhamat tamāṁsi ||

sa suṣṭubhā sa ṛkvatā gaṇena valaṁ ruroja phaligaṁ raveṇa |
bṛhaspatir usriyā havyasūdaḥ kanikradad vāvaśatīr ud ājat ||

evā pitre viśvadevāya vṛṣṇe yajñair vidhema namasā havirbhiḥ |
bṛhaspate suprajā vīravanto vayaṁ syāma patayo rayīṇām ||

sa id rājā pratijanyāni viśvā śuṣmeṇa tasthāv abhi vīryeṇa |
bṛhaspatiṁ yaḥ subhṛtam bibharti valgūyati vandate pūrvabhājam ||

sa it kṣeti sudhita okasi sve tasmā iḻā pinvate viśvadānīm |
tasmai viśaḥ svayam evā namante yasmin brahmā rājani pūrva eti ||

apratīto jayati saṁ dhanāni pratijanyāny uta yā sajanyā |
avasyave yo varivaḥ kṛṇoti brahmaṇe rājā tam avanti devāḥ ||

indraś ca somam pibatam bṛhaspate 'smin yajñe mandasānā vṛṣaṇvasū |
ā vāṁ viśantv indavaḥ svābhuvo 'sme rayiṁ sarvavīraṁ ni yacchatam ||

bṛhaspata indra vardhataṁ naḥ sacā sā vāṁ sumatir bhūtv asme |
aviṣṭaṁ dhiyo jigṛtam puraṁdhīr jajastam aryo vanuṣām arātīḥ ||