ઋગ્વેદ · અધ્યાય 4.051

ઇદમ્ ઉ ત્યત્ પુરુતમમ્ પુરસ્તાજ્ જ્યોતિસ્ તમસો વયુનાવદ્ અસ્થાત્ ।
નૂનં દિવો દુહિતરો વિભાતીર્ ગાતું કૃણવન્ન્ ઉષસો જનાય ॥

અસ્થુર્ ઉ ચિત્રા ઉષસઃ પુરસ્તાન્ મિતા ઇવ સ્વરવો ઽધ્વરેષુ ।
વ્ય્ ઊ વ્રજસ્ય તમસો દ્વારોચ્છન્તીર્ અવ્રઞ્ છુચયઃ પાવકાઃ ॥

ઉચ્છન્તીર્ અદ્ય ચિતયન્ત ભોજાન્ રાધોદેયાયોષસો મઘોનીઃ ।
અચિત્રે અન્તઃ પણયઃ સસન્ત્વ્ અબુધ્યમાનાસ્ તમસો વિમધ્યે ॥

કુવિત્ સ દેવીઃ સનયો નવો વા યામો બભૂયાદ્ ઉષસો વો અદ્ય ।
યેના નવગ્વે અઙ્ગિરે દશગ્વે સપ્તાસ્યે રેવતી રેવદ્ ઊષ ॥

યૂયં હિ દેવીર્ ઋતયુગ્ભિર્ અશ્વૈઃ પરિપ્રયાથ ભુવનાનિ સદ્યઃ ।
પ્રબોધયન્તીર્ ઉષસઃ સસન્તં દ્વિપાચ્ ચતુષ્પાચ્ ચરથાય જીવમ્ ॥

ક્વ સ્વિદ્ આસાં કતમા પુરાણી યયા વિધાના વિદધુર્ ઋભૂણામ્ ।
શુભં યચ્ છુભ્રા ઉષસશ્ ચરન્તિ ન વિ જ્ઞાયન્તે સદૃશીર્ અજુર્યાઃ ॥

તા ઘા તા ભદ્રા ઉષસઃ પુરાસુર્ અભિષ્ટિદ્યુમ્ના ઋતજાતસત્યાઃ ।
યાસ્વ્ ઈજાનઃ શશમાન ઉક્થૈઃ સ્તુવઞ્ છંસન્ દ્રવિણં સદ્ય આપ ॥

તા આ ચરન્તિ સમના પુરસ્તાત્ સમાનતઃ સમના પપ્રથાનાઃ ।
ઋતસ્ય દેવીઃ સદસો બુધાના ગવાં ન સર્ગા ઉષસો જરન્તે ॥

તા ઇન્ ન્વ્ એ3વ સમના સમાનીર્ અમીતવર્ણા ઉષસશ્ ચરન્તિ ।
ગૂહન્તીર્ અભ્વમ્ અસિતં રુશદ્ભિઃ શુક્રાસ્ તનૂભિઃ શુચયો રુચાનાઃ ॥

રયિં દિવો દુહિતરો વિભાતીઃ પ્રજાવન્તં યચ્છતાસ્માસુ દેવીઃ ।
સ્યોનાદ્ આ વઃ પ્રતિબુધ્યમાનાઃ સુવીર્યસ્ય પતયઃ સ્યામ ॥

તદ્ વો દિવો દુહિતરો વિભાતીર્ ઉપ બ્રુવ ઉષસો યજ્ઞકેતુઃ ।
વયં સ્યામ યશસો જનેષુ તદ્ દ્યૌશ્ ચ ધત્તામ્ પૃથિવી ચ દેવી ॥